GÁLATAS 3 - Lengua Sur (Enxet) Nuevo Testamento

Segánamakxa, magya'áseyam esenhan

¹ ¡Elyéháxma kéxegke kélheykha nak Gálatas! ¿Yaksak elyeykesáxma kéxegke? Tásek axta neltennáseykha negko'o kéxegke m'a Jesucristo kélyepetchesama axta aksok ektegyéso.

² Wánxa aksa eltamhok ko'o helátegmowagkok sektahakxa nak selmaxneyeykha s'e: ¿Kélxawáyaya axta kéxegke Espíritu apkeñama Dios, eñama kélyaheykekxoho m'a eltémókxa nak antehek segánamakxa, enxeykel'a keñamak ma'a kélteme nak megkólya'áseyam tásek amya'a kélleg'a axta?

³ ¿Elyéháxma kélagko' enxeykel'a kéxegke? kélénawók axta kéxegke kélteme axnagkok kéltémakxa xamo' Espíritu, ¿kélmenyéya kaxwo' kólsawhegwomhok kélteme xa eñama kélwaskápeykekxoho ektémakxal'a apkelwaskápeykekxoho énxet?

⁴ ¿Chakhóya axta kélwet'a kéxegke m'a ektahakxa axta? ¡Háwe eyakhémo kélweté xa!

⁵ Apmések agkok cha'a kéxegke Dios Espíritu, apkelanak agkok nahan cha'a aksok sempelakkaso nak agweta' kélnepyeseksa kéxegke, ¿yaksak ektaha apkelana nak cha'a xa? Háwe eñama kéllané kéxegke m'a eltémókxa nak antehek segánamakxa apkeláneya cha'a Dios xa, akke keñamak apkeláneya m'a kéltéma nak kéxegke megkólya'áseyam tásek amya'a kéllegaya axta.

⁶ Aptemegkek axta mey'áseyam Dios Abraham, ékeso eñamakxa apxéna axta Dios aptaha appéwomo Abraham.

⁷ Kéméxchek kéxegke kólya'asagkohok ma'a ektaha nak ekmámnaksoho Abraham aptawan'ák neptámen, cham'a énxet'ák apteme nak melya'áseyam.

⁸ Legasegkek axta eknaktáxésamaxche Abraham amya'a ektakmela ektéma nak se'e: “Apyókxoho énxet sat egkések Dios aksok eltakmela eleñama néten, eñama exchep.” Hakte nano' axta ekyetno eknaktáxésamaxche ekxénamaxko peya etnésásekxak nahan apkelpéwomo Dios ma'a énxet'ák metnaha nak judíos, apteme nak melya'áseyam.

⁹ Aptemegkek axta mey'áseyam Abraham, apmésegkek axta anhan Dios aksok eltakmela eleñama néten, katnohok nahan cha'a m'a énxet'ák apteme nak melya'áseyam, egkéshok cha'a Dios aksok eltakmela eleñama néten ekhawo aptemésesamakxa axta Abraham.

¹⁰ Enxet'ák ektaha nak apcháyo m'a eltémókxa nak antehek segánamakxa exkak sat Dios aplo, hakte temegkek eknaktáxésamaxche s'e: “Exkak sat Dios aplo énxet ektahakxa enxoho mesawhomo apkelané ekyókxoho ektémakxa nak eknaktáxésamaxche weykcha'áhak segánamakxa antehek.”

¹¹ Ekeso eñamakxa negyekpelchawo cha'a metnésesama Dios apkelpéwomo énxet eñama apkeláneyak ma'a eltémókxa nak antehek segánamakxa, hakte temegkek eknaktáxésamaxche s'e: “Enxet apxeyenma nak Dios aptaha appéwomo nakso' sat étak apyennakte eñama mey'áseyam.”

¹² Akke kaxnawok segánamakxa m'a ektémakxa nak magya'áseyam, wánxa eyke aksa katnehek ekpeywa segánamakxa s'e: “Enxet ektahakxa enxoho apsawhomo apkelané m'a eltémókxa nak antehek segánamakxa, memassegwomek sat.”

¹³ Ẽlhaxyawasekxeyk axta negko'o Cristo eyesagkexa yakweykenxa hentemésesek segánamakxa, cham'a apxaka axta Cristo Dios aplo, negko'o eñamakxa, hakte temegkek eknaktáxésamaxche s'e: “Dios aplo apxawé énxet ektahakxa enxoho apketsapma kélmakheyáseykha néten yámet.”

¹⁴ Temegkek axta xa, yakwayam enxoho kawakxohok apméso Dios aksok eltakmela eleñama néten ma'a énxet'ák metnaha nak judíos, eñama m'a Cristo Jesús, cham'a apkeltennasama axta Dios Abraham apmáheyo elána' xa; yakwayam enxoho nahan anxawak negko'o Espíritu apxeyenma axta hegmések Dios, eñama m'a magya'áseyam nak.

Segánamakxa tén han appekkeneykekxa axta appeywa Dios

¹⁵ Elyáxeg peyk ko'o altennaksek kéxegke m'a aptémakxal'a énxet: Apkelanak agkok xama énxet ma'a ekhémo nak mók apkelpakhetchásamákpoho, keñe epekkenek apwesey m'a weykcha'áhak, méko kawának kaxének ektaha mékoho xa, méko nahan kawának katáxesekxohok mók aksok.

¹⁶ Appekkencháseykxek axta appeywa Dios Abraham tén han ma'a aptáwen neptámen. Megkaxeyenmak eknaktáxésamaxche “aptawan'ák neptámen” apxámokma enxoho, xama akke aksa xeyenmak; temék ekpeywa s'e: “xép aptáwen neptámen”, cham'a Cristo.

¹⁷ Akke ko'o ekxénak se'e: apkelanak axta Dios ekhémo mók apkelpakhetchásamákpoho Abraham, ekmámnaksoho axta anhan aptemesásak. Ekeso eñamakxa megkawagko axta Moisés segánamakxa apagkok kamaseksek xa ekhémo mók apkelpakhetchásamákpoho nak, cham'a ektaha axta ekwé cuatro cientos treinta apyeyam natámen xa, yawanchek axta anhan katnésásekxak mékoho m'a appekkeneykekxa axta appeywa Dios.

¹⁸ Segánamakxa agkok keñamak nenxawé m'a aksok apxeyenma axta hegmések Dios, háwe axta katnehek Dios sempekkencháseykekxa appeywa; wánxa agkok, apkeltennasegkek axta eyke Dios Abraham apmáheyo etnehek apméso naksa xa appekkencháseykekxa axta appeywa.

¹⁹ ¿Háxko axta ektémakxa ektamheykha segánamakxa? Axayók axta enteyapmak xa segánamakxa nak, yakwayam enxoho kapekkenekxak yáxñakxoho m'a ektémakxa nak meyke apkelyaheykekxoho énxet'ák, ekwokmoho aptepa m'a Abraham aptáwen neptámen, aptaha nak kélláneso m'a appekkeneykekxa axta appeywa Dios. Apkelásennáha axta Dios apkelásenneykha apkeleñama néten yakwayam exének ma'a eltémókxa nak antehek segánamakxa, Moisés axta eyke aptamheykha neyseksa.

²⁰ Megkólámenyéhek cha'a xama énxet aptamheykha neyseksa, cham'a apsawhawo enxoho apxakko' apkelané aptamheykha xama énxet, hakte wánxa xama apyetna m'a Dios.

Eyámenyéxa antehek segánamakxa

²¹ ¿Kenmexmeya eltémókxa antehek segánamakxa m'a appekkeneykekxa axta appeywa Dios? ¡Ma', megkanmexmak! Awanchek axta agkok segánamakxa hegmések negyennakte, apwanchek axta anhan exének Dios aptaha appéwomo enxama eñama apkelané m'a eltémókxa nak antehek segánamakxa.

²² Wánxa agkok, xeyenmék eyke eknaktáxésamaxche sẽlmoma negko'o mólya'asáxma negyókxoho nak, yakwayam enxoho yepwának elxawagkok aksok apxeyenma axta egkések Dios ma'a énxet'ák apteme nak mey'áseyam Jesucristo.

²³ Ẽlmomchek axta negko'o eltémókxa nak antehek segánamakxa, cham'a megkaweykxa axta makham magya'áseyam, ekwokmoho m'a senxekmowáséxkoho axta negko'o magya'áseyam.

²⁴ Máxa axta entemék segánamakxa m'a énxet apmomap apkeláneykha sakcha'al'a ekwokmoho apwa'a Cristo, yakwayam enxoho agkegwának negko'o henxének Dios nentaha nelpéwomo eñama nenteme magya'áseyam ma'a Cristo.

²⁵ Massék eyke senlánencha'a negko'o xa segánamakxa nak, keso ekwa'a nak kaxwo' magya'áseyam,

²⁶ hakte megkólya'áseyam Cristo Jesús keñamak kéltaha kélyókxoho kéxegke Dios apketchek,

²⁷ yakpasameygmen nahan keñamak kéltemésesama kéxegke kélyepetcheyo Cristo, kéltemék nahan kaxwo' kélahakkásamáxche kéxegke m'a Cristo.

²⁸ Méko kaxwo' negyeykhamaxche egmók, megkeyxek nenteme enxoho judío esenhan griego, megkeyxek nahan nenteme enxoho negmomaxche esenhan ma'a magmomaxche nak, énxet esenhan ma'a kelán'a, hakte kélyókxoho kéxegke kélteme wánxa xama kélteme nak kélyepetcheyo Cristo Jesús.

²⁹ Kéltemék agkok kéxegke Cristo énxet'ák apagkok, kóltehek nahan Abraham aptawan'ák neptámen, kéxegke nahan peyk kólxewekxak ma'a appekkencháseykekxo axta appeywa Dios Abraham.