FILIPENSES 4 - Lengua Sur (Enxet) Nuevo Testamento

Kalpayhekxa cha'a kélwáxok eñama kélyepetcheyo Wese' egegkok

¹ Elyáxeg selásekhayo sekmámenyého ahagko' nak alwetekxa', kéxegke kélteme selásekhayo, kéxegke nahan kélteme kélpeykáseykekxa cha'a ko'o ewáxok, kéxegke nahan kélteme sekxawé naksa ko'o. Kólteme cha'a kélyennaktésamo kélteme megkólya'áseyam Wese' egegkok.

² Eltamhok ko'o kaxhok mók awáxók Evodia tén han Síntique, cham'a nentémakxal'a anlának nentémo xamo' nak magya'áseyam Wese' egegkok.

³ Xép apteme nak cha'a sekxegexma ahagko' sektamheykha, eltamhok ko'o epasmok xép xa ẽlyáxeg'a nak, hakte kelenxáneykmók axta sepasmo ko'o ektémakxa seltenneykha tásek amya'a xa kelán'ák nak, Clemente axta anhan, tén han ma'a pók énxet'ák ektaha axta sektamheykha xamo' ko'o. Naktáxésamaxchek nahan apkelwesey m'a weykcha'áhak eknaktáxésamaxchexa nak apkelwesey énxet'ák ekyetnama nak ekyennakte apnenya'ák.

⁴ Kalpayhekxa cha'a kélwáxok eñama kélyepetcheyo Wese' egegkok. Eltennásekxók makham, kalpayhekxa' kélwáxok.

⁵ Eltamhok ko'o kólyekpelchaxkohok kéxegke kéltaha ektakmeleykha kélwáxok. Chágketwokmek apweyktamxa Wese' egegkok.

⁶ Nágkólho aksa keytnakhaksohok kélwáxok xama aksok, wánxa agkok, kóltennés Dios ekyókxoho xa, cham'a kéltaha enxoho nempeywa nelmaxnagko; kólmaxna Dios, kólmes nahan ekpayheykekxa kélwáxok;

⁷ keñe sat egkések kéxegke Dios meyke ektahakxa egwáxok eñama nak ma'a Dios, cham'a ektaha nak ekyawe agko', ekyeykhágweykmoho nak ma'a ekweykenxal'a apya'áseyak énxet; katakmelchesesek sat kélwáxok kéxegke xa meyke ektahakxa egwáxok eñama nak Dios, tén han ma'a ektémakxa nak elchetamso kélwáxok, hakte kélyepetcha'awók kéxegke Cristo Jesús.

Kaxén kélwáxok ma'a ekyókxoho aksok eltakmela nak

⁸ Amonye selwateso elyáxeg, kaxén kélwáxok ma'a ekyókxoho aksok ektaha nak ekmámnaksoho, tén han ma'a ekyókxoho aksok eyéméxko nak antehek negáyo, tén han ma'a ekyókxoho aksok ektaha nak elpéwomo, tén han ma'a ekyókxoho aksok ektaha nak eláxñeyo, tén han ma'a ekyókxoho aksok ekleklamókxa nak kélwáxok kataxchek antehek, tén han ma'a ekyókxoho aksok ektakmela nak cha'a ekxénamaxche. Kaxén kélwáxok ma'a ekyókxoho aksok ektakmela nak, eyéméxko nak katakmelek nenxeyenma.

⁹ Kóllána m'a sektahakxa axta selxekmóso kéxegke, tén han ma'a sektahakxa axta sekméso sekpeywa, cham'a kélleg'a axta sekxéna, cham'a kélwet'a axta anhan selana ko'o. Kólteme sat cha'a xa ektaha nak, exek sat kélwáxok kéxegke m'a Dios, aptaha nak eñamakxa meyke ektahakxa egwáxok.

Enxet'ák apkeleñama nak Filipos apchancháseykekxa aksok yakwayam egkések Pablo

¹⁰ Awanhek ko'o ekpayheykekxa ewáxok eñama sekyepetcheyo Wese' egegkok, hakte xénchek makham kélwáxok ko'o, akke axénak kéxegke megkaxénweykmo kélwáxok ko'o, wánxa agkok, megkólwanchek axta eyke kélmáheyo helpasmok.

¹¹ Akke axénak ekyetna ko'o eyéméxchexa aksok, hakte eltámeyak ko'o ektakmelcháseykekxa ewáxok ma'a aksok ekyetnakxa enxoho ko'o.

¹² Ekya'ásegkok ko'o ektémakxa negha nenteme nak meyke aksok egagkok, ekya'ásegkok nahan ektémakxa negha m'a ekxámokma nak aksok egagkok. Eltámeyak nahan sekyeykhe m'a ektémakxal'a cha'a negha, megkeyxek kapayhekxak ewáxok ma'a ekyetna enxoho sekto esenhan ma'a seyakha enxoho meyk, esenhan seyeykhágwokmoho enxoho aksok ahagkok, esenhan ma'a méko agko' enxoho aksok ahagkok.

¹³ Ewanchek ko'o ayeykhak ma'a ekyókxoho aksok nak, hakte Cristo aptaha sepasmo ko'o.

¹⁴ Wánxa agkok, tásek axta eyke kéltahakxa kéxegke sepasma m'a ektahakxa axta ekyentaxnamo sekha ko'o.

¹⁵ Kéxegke axta aksa eláphasásak aksok kélancháseykekxa selmésa ko'o eñama ekyakmageykekxa m'a ektahakxa axta seltennáseykha kéxegke tásek amya'a, kéxegke kéleñama nak apchakneykekxexa énxet tegma apwányam Filipos, cham'a sektepa axta ko'o Macedonia eyénawo seltenneykha tásek amya'a.

¹⁶ Hawók nahan ma'a sekha axta ko'o tegma apwányam Tesalónica, eláphasásekxók axta makham kéxegke aksok selanchesáseykekxa yakwayam ategyek ko'o m'a aksok eyéméxchexa nak.

¹⁷ Akke ko'o kaxéneykha ewáxok ma'a nenxawé naksa nak aksok, kéxegke eyke emenyék ko'o kólyánchesagkohok ma'a kéltémakxa ektakmela nak nápakto' Dios.

¹⁸ Hakte ekxakak axta ko'o ekyókxoho m'a aksok selápháseso axta kéxegke, eyeykhágwokmók axta anhan. Eyeykhágwokmók axta ko'o m'a aksok selápháseso axta, cham'a apsókmo axta Epafrodito. Máxa axta entahak ma'a aksok ekwatnamáxche ekmátsa ekpakneyamla'a, cham'a ekleklamol'a apwáxok Dios etekhánek ekpakneyam.

¹⁹ Dios ahagkok sat egkések ma'a ekyókxoho aksok eyéméxchexa nak kéxegke, hakte xámok ekyetna aksok eltakmela m'a Dios eñama m'a Cristo Jesús.

²⁰ ¡Apcheymákpoho sat cha'a kóltemésesek Dios Egyap! Katnahagkok sat.

Pablo ekxeyenma apwáxok

²¹ Eltamhok ko'o kóltennaksek kéxegke seyáphásesa ko'o ekxeyenma ewáxok apkelánamákpoho Dios énxet'ák apagkok eñama m'a Jesucristo. Apkeláphásesek nahan ekxeyenma apwáxók kéxegke ẽlyáxeg'a sekha nak xamo' ko'o.

²² Apkelaphásesek nahan ekxeyenma apwáxók kéxegke apyókxoho énxet'ák ektaha nak Dios énxet'ák apagkok, ekyagwánxa agko' apcháphásesa ekxeyenma apwáxók kéxegke m'a wese' romano apkeláneykha nak.

²³ Jesucristo Wese' egegkok sat etnehek apméso naksa kélyókxoho kéxegke m'a ektémakxa nak segemleykekxoho.