FILIPENSES 2 - Lengua Sur (Enxet) Nuevo Testamento

Ménnaktésamakpoho Cristo apteme anhan meyke ekhémo

¹ Cristo agkok apkelwaskakkáseykekxoho kéxegke, mések agkok nahan ektakmelwayam kélwáxok kéxegke m'a ektémakxa nak segásekhayo Cristo, apheyk agkok nahan kélwáxok kéxegke Espíritu, kélya'ásegkok agkok nahan kéxegke ektémakxa m'a negásekhayo nak egmók, tén han ma'a ektémakxa nak apmopyósa anlanok egmók,

² kólteme cha'a ekhémo mók elchetamso kélwáxok kélyókxoho nak, yakwayam enxoho helyánchesesagkohok selméso ko'o ekpayheykekxa ewáxok, kólteme megkólchexeymáxkoho eñama m'a ekhémo nak mók kélásekhamaxkoho, kólteme anhan ekhémo mók kélwáxok, tén han kóltehek ekhémo mók kélwáxok ma'a aksok yakwánxa enxoho kóllána'.

³ Nágkóllána aksa xama aksok eñama enxoho m'a kélenmexamaxche nak esenhan ma'a kéleymáxkoho nak, wánxa agkok, kóllána cha'a aksok yetlo megkeymáxkoho kélwáxok. Nágkaxén aksa kélwáxok ektakmela kéltémakxa kéxegke. Kaxén aksa kélwáxok ektakmela apkeltémakxa m'a pók énxet'ák nak.

⁴ Nágkólchetam aksa kélxakko' aksok yakwayam nak kapasmok kélxakko' kélxama enxoho, wánxa agkok, kólchetagkas nahan aksok yakwayam kapasmok ma'a kélnámokkok.

⁵ Katne kéxegkáxa elchetamso kélwáxok ma'a ektémakxa axta elchetamso apwáxok Cristo Jesús.

⁶ Aphawók axta eykhe m'a aptémakxa nak Dios, axta eyke elenxáneykmok exnésakpohok Dios,

^7-8 wánxa agkok apcháxñákxók axta aksa apwaya keso náxop, apheyáseykpekxók axta aptémakxal'a énxet kélásenneykha, apheyásamákpók axta énxet apteyékmo. Axta énnaktésamakpohok apagko', cham'a aphéyáseykpoho axta m'a aptémakxal'a énxet, apmatñegkek axta eñama ekha apkelyaheykekxoho, negmegkaktamakxa axta eykhe m'a ektémakxa axta apmatñama néten aksok ektegyéso.

⁹ Ekeso eñamakxa apmésa nak Dios yakwayam etnehek néten agko' meyke ekhémo, aptemésesek axta nahan ektakmela agko' apwesey neyseksa m'a ekxámokxoho kélwesey nak.

¹⁰ Yakwayam enxoho eltekxeyagkok aptapnák apyókxoho ektaha nak apheykha néten, tén han keso náxop, tén han ma'a elmaheykegkaxa nak eghagák Jesús apwesey eñamakxa ekteme ektakmela agko',

¹¹ yakwayam enxoho anhan elya'ásegwomhok apyókxoho énxet aptaha Jesucristo Wese', yakwayam enxoho kóltemésesek apcheymákpoho Dios Egyap.

Enxet'ák apkelyetleykekxa Cristo apteme elseyexma keso náxop

¹² Elyáxeg selásekhayo, kólyánchesagkoho kélteme kélyaheykekxoho sekpeywa keso sekha nak makhawo' kélhágkaxa kéxegke, ekhawo ektémakxa axta cha'a kélyaheykekxoho sekpeywa sekha enxoho kélnepyeseksa kéxegke. Nágkólyensem ekxéneykha kélwáxok kéxegke m'a ektémakxa nak kélwagkásamáxche teyp, kólteme yetlo kéláyo agko'.

¹³ Hakte Dios aptaha aptekkeseso kéxegke m'a kélmámenyého nak kóllának kéltémakxa ektakmela, aptaha nak han appasmo kéxegke yakwayam kólsawhohok kélteme kélyaheykekxoho m'a ektémakxa nak apmopmenyého.

¹⁴ Kóllána ekyókxoho aksok yetlo meyke kélpakmeteykha, tén han meyke kélxamáseyak kélpeywa,

¹⁵ yakwayam enxoho megkataxchék ekyetna kéxegke kélsexnánemaxche tén han eyesógwayam kéllané xama aksok enxoho. Kólteme kéxegke Dios apketchek meyke elenchahamaxche kéltémakxa nepyeseksa xa énxet'ák elmasagcha'a nak apkeltémakxa, cham'a apkelxegányam nak. Máxa yaw'a kéltahak kélápogwata kéxegke nepyeseksa xa énxet'ák nak, keso náxop ekyaktésamakxa nak exma,

¹⁶ hakte kéltekkáseyha kéxegke amya'a kélxena m'a amya'a ekyennaktésamo nak egnenyek. Kapayhekxak sat ko'o ewáxok kéxegke eñamakxa, hakte ay'asagkohok sat ko'o megkatnama eyakhémo m'a ektémakxa nak ko'o selteyásamáxche, tén han ma'a ektémakxa nak sektamheykha, cham'a apwakto sat Cristo.

¹⁷ Kayegkenaxchek eykhe ko'o éma ahagkok yakwayam kasawhaxkohok ma'a ektémakxa nak kéxegke kélméso aksok Dios eñama m'a megkólya'áseyam nak, kapayhekxak akke aksa ko'o ewáxok, kawakxohok nahan kélyókxoho kéxegke ektahakxa enxoho ekpayheykekxa ewáxok ko'o.

¹⁸ kalpayhekxa' kéxegkáxa kélwáxok, kawakxoho nahan kéxegkáxa s'e ektémakxa nak ko'o ekpayheykekxa ewáxok.

Timoteo tén han Epafrodito

¹⁹ Apkeltamhok sat agkok Wese' egegkok Jesús, wáphaksek sat heykxa Timoteo kélhágkaxa kéxegke, yakwayam enxoho kapayhekxak ewáxok sekleg'a enxoho amya'a ektémakxa kélha kéxegke.

²⁰ Hakte maték ko'o pók énxet elchetamso apwáxok ektémakxa nak ko'o elchetamso ewáxok, cham'a ekmámnaksoho nak ekxéneykha apwáxok yakwayam epasmok kéxegke.

²¹ Apyókxoho énxet apketámak ma'a aksok apagkok apagko' nak, mektámak ma'a aksok eñama nak Jesucristo.

²² Kélya'ásegkok eyke kaxwo' kéxegke m'a ektémakxa nak aptakmelchásamákpoho Timoteo, kélya'ásegkok nahan ma'a ektémakxa nak sepasmeykha sektamheykha yakwayam ampasmok ma'a ektémakxa nak kéltenneykha tásek amya'a, máxa hatte ektemék sepasmeykencha'a sektamheykha.

²³ Emenyék ko'o wáphaksek Timoteo kélhágkaxa kéxegke, cham'a sekya'ásegwokmo enxoho yakwánxa hetnehek ko'o.

²⁴ May'ásekmok nahan ko'o Wese' egegkok peya kañehémhok sekmeyeykekxa ko'o xa kélhágkaxa nak kéxegke.

²⁵ Xénchek nahan ko'o ewáxok wáphaksek kélhágkaxa kéxegke egyáxeg Epafrodito aptaha nak sekxegexma sektamheykha, aptaha nak han sennapmáxkoho xamo', cham'a kéláphaso axta kéxegke yakwayam hepasmok hegkések ma'a aksok eyéméxchexa nak ko'o.

²⁶ Awanhek apmopmenyého elwetekxak kélyókxoho kéxegke xa egyáxeg nak, yetnakha'awók nahan apwáxok, hakte kéllegayak hek kéxegke amya'a apháxamákpo.

²⁷ Nakso' axta apháxekpo, xegkásawók axta yetsapok; Dios axta eyke apkemleykxohok xa egyáxeg nak, háwe axta apwánxa apagkok apkemleykxoho Dios xa egyáxeg nak, ko'o axta anhan eyemleykxoho, yakwayam enxoho megkayágwomok selapwayam ko'o.

²⁸ Ekeso eñamakxa sekpekheyásawo nak seyáphaso kélhágkaxa kéxegke xa egyáxeg Epafrodito, yakwayam enxoho kalpayhekxak kélwáxok kéxegke kélwetákxo enxoho makham, yakwayam enxoho kasextohok selapwayam ko'o.

²⁹ Kóláhapmakha sat yetlo ekpayheykekxa kélwáxok nentémakxal'a anlának egyáxeg nentémo xamo' nak magya'áseyam Wese' egegkok. Kalkoho cha'a kélwáxok kólwetak kéxegke m'a énxet'ák ekhawo nak aptémakxa Epafrodito,

³⁰ hakte xegkásawók axta yetsapok eñama apkelané aptamheykha eñama nak Cristo. Axta yeyásak apyókxa eyesagkexa sepasma ko'o, cham'a megkólewagko axta kóllának kéxegke.