FILEMÓN 1 - Lengua Sur (Enxet) Nuevo Testamento

Pablo apcháphaso ekxeyenma apwáxok

¹ Ko'o Pablo sekha nak se'e sẽlpextétamakxa, sekmomaxche axta eñama seklegaso apwesey Cristo Jesús. Filemón, xép ektáxesásak se'e weykcha'áhak nak, xép aptaha nak nenxegexma nentamheykha negásekhayókxa, Timoteo nahan sekxegexma sektáxésesa xa.

² Negyepetchásawok nahan nentáxéseso m'a énxet'ák apchakneykekxoho nak apxagkok xép, cham'a egyáxeg kelán'a ekwesey nak Apia, tén han ma'a egyáxeg apwesey nak Arquipo, aptaha nak sempasmo ektémakxa nak nelwaskápeykekxoho negko'o.

³ Dios Egyap tén han Wese' egegkok Jesucristo sat etnehek apméso naksa kéxegke m'a ektémakxa nak segemleykekxoho, tén han egkések ma'a meyke ektahakxa egwáxok nak.

Ektémakxa apchásekhayo Filemón tén han mey'áseyam

⁴ Agkéshok cha'a ko'o ekpayheykekxa ewáxok Dios, cham'a ekxeyenwákxoho enxoho ewáxok xép neyseksa sekteme nempeywa nelmaxnagko,

⁵ hakte ekleg'ak axta ko'o amya'a ektémakxa apchásekhayo exchep tén han ektémakxa mey'áseyam ma'a Wese' egegkok Jesús, tén han apkelásekhayo exchep ma'a apyókxoho énxet'ák apteme nak Dios énxet'ák apagkok.

⁶ Elmaxnakkek nahan ko'o Dios seltamho ey'ásegwomhok ektakmela exchep ma'a ekyókxoho nenxawé nak aksok eltakmela eleñama néten, cham'a ekyetna nak negko'o eñama negyepetcheyo Cristo Jesús, xép aptaha nak nentémo xamo' magya'áseyam.

⁷ Awanhok agko' ko'o ekpayheykekxa ewáxok, ekwaskápekxók nahan eñama m'a ektémakxa nak sẽlásekhayo exchep, eyáxeg, xép keñamak kélpeykesásekxo apwáxók apyókxoho énxet'ák apteme nak melya'áseyam.

Pablo apkeltémo kólásekhekxohok Onésimo, aptaha axta apmomap kéltemesáseykha aksa

⁸ Payhawók eykhe ko'o wának elának xép ma'a eyéméxchexa nak elána', hakte ko'o sekteme Cristo seykha amya'a apagkok,

⁹ wánxa agkok, emenyék eyke agkések xép sekpeywa ektakmela eñama m'a ektémakxa nak nelásekhamaxkoho. Ko'o Pablo, ekwanakmek kaxwo' ko'o, elhésekmek nahan sẽlpextétamakxa sekmáxko, eñama seklegaso apwesey Cristo Jesús.

¹⁰ Eltamhok ko'o epasmok xép Onésimo, aptaha nak máxa hatte eñama nentémo xamo' magya'áseyam Wese' egegkok neyseksa sekha ko'o s'e sẽlpextétamakxa.

¹¹ Apmomap mékoho axta apkenagkók xép Onésimo nano' axta, apwanchek eyke hempasmok kaxwo', xép tén han ko'o.

¹² Eyáphásekxeyk ko'o makham Onésimo aphakxa exchep, etnéses sat ma'a setnésesamakxal'a ko'o.

¹³ Emenyék eykhe ko'o exek Onésimo s'e sekhakxa nak, yakwayam enxoho hepasmok ko'o, yakwayam eykhe hepasmok xép, keso sekha nak kaxwo' sẽlpextétamakxa eñama seltenneykha tásek amya'a.

¹⁴ Momenyék eyke ko'o atnehek sekteme ahagko', cham'a metnaha enxoho exchep appeywa, yakwayam enxoho megkatnehek máxa sekyáteyekegkoho exchep ma'a setnésesakxa enxoho, akke m'a apmopmenyého apagko' enxoho exchep.

¹⁵ Yámagwenaktémók axta kexaha apxega Onésimo ekmassama apkeláneykencha'a exchep, kawegkohok sat kexaha kaxwo' apha Onésimo aphakxa exchep.

¹⁶ Metnehek sat kaxwo' apmomap kéltemesáseykha aksal'a, kamaskok sat exhok kaxwo' ma'a énxet apmomap la'a, sat exhok kaxwo' ma'a aptémakxal'a egyáxeg negásekhayókxa nak. Awanhek ko'o seyásekhayo Onésimo, keñe exchep eyéméxko eyeykhásamhok apchásekhayo ekwánxa nak ko'o seyásekhayo xa egyáxeg nak, háwe ekwánxa agkok ma'a nentemésesamakxal'a énxet, akke tásek etnésesek ma'a nentemésesamakxal'a anlának egyáxeg nentémo xamo' nak magya'áseyam Wese' egegkok.

¹⁷ Xeyenmék agkok apwáxok xép sektaha ko'o apyáxeg eñama m'a ektémakxa nak nenteme magya'áseyam, yáhapmakha xa egyáxeg nak ekhawo setnésesamakxal'a ko'o.

¹⁸ Asagkek agkok aptemésesamakxa, esenhan ma'a ekyetna enxoho apméyak, ko'o sat helmaxnak selyakye yakwayam ayánmagkasesek.

¹⁹ Ko'o Pablo, ko'o ahagko' sektáxéso s'e weykcha'áhak nak, ko'o sat ayánmagkasek. Ewanchek eykhe ko'o altennásekxohok ekyetna seméyak xép, cham'a sekyakmagkasesama axta apwáxok.

²⁰ Eyáxeg etne hana xa sektemésesakxa nak, ekhawo nentémakxal'a nenteme nak magya'áseyam Wese' egegkok; hepeykesásekxa hana ewáxok ekhawo aptémakxal'a egyáxeg nentémo xamo' nak magya'áseyam Wese' egegkok.

²¹ Ektáxésesek xép se'e weykcha'áhak nak, hakte ekya'ásegkok peya elyahakxohok xa seltamhókxa nak etnehek, ekya'ásegkok nahan peya eyeykhásamhok apkelané xa seltamhókxa nak etnehek.

²² Eltamhok nahan ko'o helanaksek yakwánxa axek; hakte emenyék ko'o hegkések Dios yakwayam amyekxak xa kélhágkaxa nak kéxegke ekyakmageykekxa m'a kélteme nak cha'a nempeywa nelmaxnagko selmaxnésesama ko'o yakwayam enxoho alwetekxa'.

Pablo ekxeyenma apwáxok tén han néxa apxeyenma aksok eltakmela

²³ Apcháphásesek nahan ekxeyenma apwáxok xép Epafras aptaha nak sekmomaxkoho xamo' ko'o eñama neltenneykha apwesey Cristo Jesús,

²⁴ tén han apcháphásesa ekxeyenma apwáxok xép ma'a Marcos, Aristarco, Demas tén han ma'a Lucas, aptaha nak cha'a sewháneyo sektamheykha.

²⁵ Wese' egegkok Jesucristo sat etnehek apméso naksa kéxegke m'a ektémakxa nak segemleykekxoho.