EFESIOS 6 - Lengua Sur (Enxet) Nuevo Testamento

¹ Kélketchek, kólyahakxoho cha'a kélyepmeyk eñama kélásekhayo m'a Wese' egegkok, hakte payhawók kóltehek xa.

² Emha amonye nelánémaxchexa antehek kélyepetchesama nak sempekkencháseykekxa axta appeywa Dios se'e: “Kólyahakxoho kélyepmeyk tén han ma'a kélchána,

³ yakwayam enxoho katakmelhok kélha, keñe anhan kawegkohok kélha keso náxop.”

⁴ Kéxegke énxet'ák ekha nak apketchek, nágkóllókas aksa kélketchek, wánxa agkok, kólektegkes aksa yetlo kélpeykesáseyak, kólxekmós nahan ektémakxa nak negásekhayo Wese' egegkok.

⁵ Kéxegke kélteme nak kélmomaxche kéltemesáseykha aksa, kólyahakxoho cha'a kéxegke kelwese'e kélagkok apheykha nak keso náxop. Kólteme nahan cha'a kélyaheykekxoho, kólteme nahan cha'a kéláyo, yetlo meyke kélyexamaxkoho xama enxoho, ekhawo m'a kéltémakxal'a kóllának kéltamheykha eñama nak Cristo.

⁶ Kóllanés cha'a aksok wese' kélagkok, háwe ekwánxa agkok ma'a apkelánencha'a enxoho yakwayam enxoho yának katakmelak kéltamheykha, akke tásek kóltehek kéltamheykha m'a aptémakxal'a énxet ektaha nak Cristo apchásenneykha, kóllának yetlo ekmáheyo agko' kélwáxok ma'a eñama nak Dios apmopmenyého.

⁷ Kóllána' cha'a kéltamheykha yetlo kélmáheyo kóllána', máxa kóltehek ma'a kéllánesa enxoho aksok Wese' egegkok, háwe m'a énxet'ák.

⁸ Kélya'ásegkok eyke kaxwo' kéxegke peya kólxawak ekyanmaga eñama Wese' egegkok ma'a ektémakxa enxoho aksok ektakmela kéllané, megkeyxek ma'a kélteme enxoho kélmomaxche, esenhan ma'a kélteme nak megkólmomaxche.

⁹ Hawók nahan kéxegkáxa kelwese'e nak, kólhésho kéltémakxa m'a apkeltémakxa nak kélásenneykha, nágkólmes cha'a kélpeywa ekyennakte kélláneykha kólmawhok kóltemesesamhoxma. Kaxén kélwáxok kéxegke hawók mók kélyaheykekxoho Wese' egegkok apha nak néten, kéxegke kélteme nak kelwese'e, tén han kéxegke kélteme nak kélmomaxche, kaxén nahan kélwáxok Wese' egegkok mehentemésesama cha'a negyeykhamaxche egmók nenteme nak énxet.

Nelmeykha eleñama néten nenteme nak negyetlo Cristo

¹⁰ Elyáxeg eltamhok ko'o kóltehek kaxwo' ekha kélyennakte neyseksók kélyepetcheyo Wese' egegkok, eñama m'a ektémakxa nak ekyawe agko' apmopwána.

¹¹ Kólahakkasaxkoho kélagko' cha'a m'a ekyókxoho kélmeykha ektaha axta Dios apkelmeyáseyak kéxegke, yakwayam enxoho kólewának kólenmexek ma'a sẽlyexancháseykha nak kelyekhama'.

¹² Hakte mólnápexchek negko'o énxetók xamo', akke nennápexchek ma'a kelyekhama' elásenneykha eleñama nak tekhenxet, cham'a ekha nak elmowána, ekha nak han kélyaheykekxoho, cham'a eláneykencha'a nak keso náxop ekyaktésamakxa nak exma.

¹³ Ekeso eñamakxa eyéméxko nak kólahakkasaxkohok kélagko' kéxegke m'a kélahakkásamáxche ektaha nak apkelmeyáseyak Dios, yakwayam enxoho kólewának kólenmaxaxkohok ma'a eyahapwa'a enxoho kéxegke aksok ekmaso xama ekhem, kóltehek sat kéxegke ekha kélyennakte, cham'a kélpenchásawo enxoho kélláneykekxa kéltahakxa.

¹⁴ Kólteme ekha kélyennakte, yetlo kélahakkásamáxche m'a amya'a ekmámnaksoho nak ektémol'a nenteté nenxet. kólahakkasaxche kéxegke m'a nentémakxa ekpéwomo nak ektémol'a sẽlpextétamo apchahakkaso apnenyek.

¹⁵ Kólpenaksoho kélatcháseykekxa kélatcheso kélmagkok, yakwayam enxoho kólxog kólsawha tásek amya'a segmésamo nak meyke ektahakxa egwáxok.

¹⁶ Kólteme nahan kélahakkásamáxche m'a megkólya'áseyam nak, yakwayam enxoho kólewának kólsapanchesesek ekyókxoho kelyekhama' yágke agkok elálewomo nak.

¹⁷ Kólma kéxegke nelwagkásamáxche teyp ektémol'a sẽlpextétamo apketcheso apkátek, yakwayam kólahakkasek kélpátek, kólma nahan kéxegke Dios appeywa ektémol'a agmaha sókwenakte, ektaha nak apméso kéxegke m'a Espíritu Santo.

¹⁸ Nágkólyensem kéxegke kélteme nempeywa nelmaxnagko: kólmaxna cha'a Dios yetlo appékesáseyak Espíritu. Kóleyxmakha cha'a kéxegke, meyke elleklágwayam, kólmaxnéses nahan cha'a m'a apyókxoho énxet'ák ektaha nak Dios énxet'ák apagkok.

¹⁹ Helmaxnéses nahan ko'o xa, yakwayam enxoho hegkések Dios ma'a eyéméxchexa nak atnehek sekpeywa, yakwayam enxoho nahan wawának apakmétek yetlo meyke seyeye, tén han alyekpelchásesamhok énxet'ák ma'a amya'a melya'áseykegko axta, ektaha nak segwagkasamo teyp.

²⁰ Eyáphásek axta ko'o Dios yakwayam atnehek sekxeyenma m'a ektémakxa nak amya'a apagkok, cháxa keñamak sekha nak kaxwo' ko'o sẽlpextétamakxa xa. Helmaxnéses cha'a ko'o yakwayam enxoho axének apwesey Cristo yetlo meyke seyeye xama enxoho.

Ekxeyenma egwáxok

²¹ Tíquico negko'o egyáxeg aptaha nak negásekhayo, aptaha nak han meyenseyam sempasmeykha nentamheykha eñama nak Wese' egegkok, sat esakxések kéxegke ekyókxoho amya'a setnamakxa nak ko'o m'a, tén han ma'a ektémakxa nak ko'o aksok selané.

²² Ekeso eñamakxa seyáphasa nak kélhágkaxa kéxegke xa egyáxeg nak, yakwayam enxoho eltennaksek ektémakxa negheykha negko'o, yakwayam enxoho anhan elwaskakkásekxohok kéxegke.

²³ Dios Egyap tén han Jesucristo Wese' egegkok sat egkések ẽlyáxeg'a meyke ektahakxa apwáxók, apchásekhayo, tén han melya'áseyam,

²⁴ etnehek sat nahan apméso naksa apyókxoho énxet'ák ektaha nak apchásekhayo Wese' egegkok Jesucristo m'a ektémakxa nak segemleykekxoho, yetlo m'a apchásekhayo megkamassegwayam nak.