EFESIOS 5 - Lengua Sur (Enxet) Nuevo Testamento

Eyéméxchexa etnehek énxet'ák ektaha nak Dios apketchek

¹ Kóllenxánem kólhágwakxohok ma'a aptémakxa nak Dios, kéxegke kélteme nak Dios apketchek apkelásekhayo.

² kóllenxanmoho kélteme kélásekhamaxkoho, ekhawo m'a ektémakxa axta segásekhayo Cristo, apyenyawákpók axta apagko' yakwayam etnehek segyanmaga negko'o ektémol'a aksok ektekyawa kélméso Dios, tén han ma'a ektémol'a aksok ekwatnamáxche ekmátsal'a etekhánek ekpakneyam Dios.

³ Kéxegke kélteme nak Dios énxet'ák apagkok, megkatakmelak kólxének ma'a ekmaso nak nentémakxa mansexta xama enxoho, tén han ma'a mansexta ekmanyása nak, megkatakmelak nahan kólxének mansexta kélámenyéxa enxoho kóllának.

⁴ Nágkólteme nahan ekmaso kélpeywa, tén han ma'a nempeywa ekyéháxma nak, tén han ma'a ekmanyása nak nempeywa; hakte megkapayhawok antehek nempeywa xa ektaha nak; akke tásek ma'a nelteméseso nak apcheymákpoho Dios.

⁵ kélya'ásegkok eyke kaxwo' kéxegke m'a énxet ektahakxa enxoho apkelané ekmaso nentémakxa mansexta, esenhan ma'a apkelané enxoho nentémakxa ekmanyása nak, tén han ma'a apkelmeyókásamákpoho nak apxakko' aksok (ektaha nak ekhawo m'a nelpeykesamo nak kéleykmáseso), megkawakxók sat apkelteme Wese' apwányam apagkok Cristo tén han Dios xa énxet'ák nak.

⁶ Nágkólho aksa kalyexanchesha kéxegke m'a énxet apkelpeywa ektaha nak mékoho, hakte cháxa keñamak ekxegakmo nak yakwayam ellegásesagkohok ekmaso agko' Dios xa énxet'ák nak, cham'a melyaheykekxoho nak Dios.

⁷ Nágkólpaxkaha aksa kéxegke xa énxet'ák nak.

⁸ Axta kólya'áseykegkok kéxegke Dios, máxa axta entemék kélheykencha'a enxoho ekyaktesakxaxma, wánxa agkok kéltemék eyke kaxwo' kélyepetcheyo Wese' egegkok, ékeso eñamakxa kélheyncha'a nak neyseksa elseyexma, kólteme kéxegke m'a apkeltémakxa nak énxet'ák apheykha nak neyseksa elseyexma.

⁹ Hakte katekkeshok cha'a ekxámokxoho nentémakxa ektakmela xa elseyexma nak, tén han ma'a nentémakxa ekpéwomo nak, tén han ma'a nentémakxa ekmámnaksoho nak.

¹⁰ Kóllenxánem kóllának ma'a ekleklamókxa nak apwáxok antehek Wese' egegkok.

¹¹ Nágkólweyhénekxoho aksa kéxegke aksok mékoho apkeláneyak ma'a énxet'ák apkeleñama nak neyseksa ekyaktesakxaxma, tásek eyke kólxekmósek apyókxoho énxet'ák yakwayam enxoho elya'ásegwók apkeltémakxa xa énxet'ák nak.

¹² Kawomhok nahan negko'o negmegkakto anxének aksok apkelyexamakpoho nak apkeláneyak xa énxet'ák nak.

¹³ Yáxñakxoho agkok nahan entahak ekwetamaxche xa aksok nak eñama ekpekkeneykekxa yáxñakxoho m'a elseyexma, tásek nahan cha'a katnehek ekwetamaxche ektémakxa.

¹⁴ hakte elseyexma kapekkenekxak yáxñakxoho. Ekeso eñamakxa ektéma nak amya'a s'e: “Exatakha, xeyep ektaha nak apteyenma, exnekxa néten nepyeseksa énxet'ák ektaha nak apkeletsapma, Cristo sat yelsásesexma exchep.”

¹⁵ Kóltakmelches kéxegke xa kéltémakxa ektakmela nak. Nágkólteme megkólya'áseyak aksok, wánxa agkok, kólteme ekha kélya'áseyak.

¹⁶ Kólyentamaxkoho cha'a kóllának aksok eltakmela m'a kélewagkexa enxoho cha'a kóllána', hakte yentexek kaxwo' keso negwánxa nak.

¹⁷ Nágkólteme aksa megkólya'áseyak aksok; kóllenxánem cha'a kólya'ásegwomhok ektémakxa nak Wese' egegkok apmopmenyého.

¹⁸ Nágkólteme anmenáto, hakte katnéseshok cha'a énxet memágwayam aptémakxa xa; wánxa agkok, kólho epékesesagkok kéltémakxa Espíritu Santo.

¹⁹ Kóltennasha cha'a kélmók ma'a eñama nak salmos, cham'a kélpakhetchásexkoho enxoho, yetlo m'a negmeneykmaso eleñama nak Dios, tén han ma'a negmeneykmaso aptekkeso nak Espíritu, kólmeneykmes, kólteméses nahan apcheymákpoho Wese' egegkok ekweykmoho kañók agko' kélwáxok.

²⁰ Kólmés cha'a ekxeyenma kélwáxok Dios Egyap, cham'a ektahakxa enxoho cha'a kéxegke yetlo kélxeyenma Jesucristo Wese' egegkok apwesey.

Nentémakxa neltakmelcheso egketchek tén han entáwa

²¹ Kólteme cha'a kélyaheykekxoho kélmók eñama m'a kélteme nak kéláyo Cristo.

²² Kelán'ák ekha nak anakteyegka'a, kólyahakxoho cha'a kélnakteyegka'a, ekhawo m'a ektémakxa nak kélyaheykekxoho Wese' egegkok.

²³ Hakte énxet ekha nak aptáwa, apteme apkemha apmonye agkok ma'a aptáwa, ekhawo ektémakxa nak Cristo apteme apkemha apmonye nepyeseksa Dios énxet'ák apagkok. Cristo nahan apteme apkelwagkaso teyp ma'a ektaha nak Dios énxet'ák apagkok, hakte cháxa Cristo apyókxa xa.

²⁴ Kéméxchek nahan katnehek elyaheykekxoho agko' atáwa kelán'a ekha nak atáwa, ekhawo aptamheykegkaxa nak Dios énxet'ák apagkok apkelyaheykekxoho m'a Cristo.

²⁵ Enxet'ák ekha nak apnakteyegka'a, kólásekhoho kélnakteyegka'a, ekhawo ektémakxa axta apkelásekhayo Cristo m'a ektaha nak Dios énxet'ák apagkok, apmeyásekpók axta apagko' yakwayam etnehek apyanmaga xa Dios énxet'ák apagkok nak.

²⁶ Apkelanak axta Cristo xa yakwayam enxoho etnésesek apkelpagkanamap ma'a ektaha nak Dios énxet'ák apagkok, aptemésesek axta anhan meyke ekyepetche xama aksok ekmanyása eñama m'a appeywa nak, tén han eñama m'a apkelyenyeso axta neygmen,

²⁷ yakwayam enxoho etnésesek apkeleymákpoho enaklakxohok apagko' ma'a aphamakxa nak, meyke ekyepetche xama aksok ekmanyása, esenhan ma'a aksok ekmaso nak, tén han meyke m'a xama aksok ekhawo nak xa, wánxa agkok apkelpagkanamap aksa etnésesagkok, tén han etnésesagkok apkelpéwomo.

²⁸ Ekhawo ektémakxa nak ma'a énxet ekha nak aptáwa, yásekhohok ma'a apyókxa nak, kéméxchek nahan etnehek apchásekhayo aptáwa xa ektaha nak. Enxet ektahakxa enxoho apchásekhayo aptáwa, etnehek nahan apchásekhamakpekxoho apagko'.

²⁹ Hakte méko kataknók ma'a ektémakxa enxoho ekyókxa, kólagkok aksa ekto, kóltakmelchesek nahan, ekhawo aptemésesamakxa nak Cristo m'a ektaha nak Dios énxet'ák apagkok,

³⁰ hakte cháxa ektaha Cristo apyókxa xa, negko'o anhan nenteme neleñama xa Cristo apyókxa nak.

³¹ “Ekeso eñamakxa elyamhopa enxoho énxet, eyenyók sat ma'a apyap tén han ma'a egken, yakwayam etnehek apyepetcheyo wánxa m'a aptáwa, katnehek sat máxa xama negyókxal'a, cháxa ánet nak.”

³² Cháxa ektaha nak ekpowásamáxkoho agko' xa, ekxénchek ko'o m'a Cristo tén han ma'a Dios énxet'ák apagkok nak.

³³ Akke ekxénak nahan ko'o eyéméxko kóltehek kéxegke kélásekhayo m'a kélnakteyegka'a nak, ekhawo m'a ektémakxa nak kélásekhamaxchekxoho kélagko', hawók nahan kelán'ák ekha nak anakteyegka'a, kólteme ekha kélyaheykekxoho kélnakteyegka'a.