EFESIOS 3 - Lengua Sur (Enxet) Nuevo Testamento

Pablo kélásennagko eswok tásek amya'a nepyeseksa énxet'ák metnaha nak judíos

¹ Ekeso eñamakxa sekha nak kaxwo' ko'o sẽlpextétamakxa eñama Cristo Jesús, ko'o Pablo, eñama selané sektamheykha yakwayam apasmok kéxegke megkóltaha nak judíos.

² Kélya'ásegkok eyke kéxegke aptaha Dios seyásennagko yakwayam alának se'e sektamheykha nak, yakwayam apasmok kéxegke, eñama m'a ektémakxa nak seyemleykekxoho Dios.

³ Apxekmósek axta Dios ektémakxa aksok apkeláneykekxa ektaha nak megkótémaxche, ey'asásegwokmek axta ko'o, ekhawo m'a sektahakxa axta sektáxéseso ekyakwate kéxegke.

⁴ Kélyetsetmeyk agkok xa, kólyekpelchágwók sat sekya'ásegkoho ko'o m'a amya'a ekpowásamáxkoho eñama nak Cristo.

⁵ Axta kólhayok elyekpelkohok énxet'ák xa amya'a ekpowásamáxkoho nak, cham'a nano' axta, wánxa agkok, apxekmósek eyke kaxwo' Dios ma'a seykha amya'a apkelpagkanamap nak, tén han ma'a énxet'ák ektaha nak apkellegaso appeywa eñama m'a Espíritu apagkok nak.

⁶ Keso ektaha nak amya'a ekpowásamáxkoho s'e: kaxhok sat mók apkelxawe aksok kélpagkancheso m'a énxet'ák metnaha nak judíos tén han ma'a énxet'ák judíos, eñama m'a tásek amya'a nak, hakte hawók mók appasmeykekxa Cristo apyókxa, weykekxók nahan apkelxaweyak ma'a apekkeneykekxa axta appeywa Dios eñama Cristo Jesús.

⁷ Ekxawáyak axta aksa ko'o yakwayam atnehek seltenneykha s'e amya'a nak, eñama segkéso naksa m'a Dios, eñama nahan ma'a ektémakxa nak ektamheykha Dios apmopwána.

⁸ Ko'o eyke sekteme kónegók ahagko' nepyeseksa m'a elyáxeg'a ektaha nak Dios énxet'ák apagkok, cham'a apteme nak kóneg; Egkések axta eyke aksa ko'o Dios ektakmela sektamheykha yakwayam atnehek seltennáseykha amya'a ektakmela m'a énxet'ák metnaha nak judíos cham'a amya'a ekxeyenma nak ekxámokma agko' aksok eltakmela eleñama nak Cristo.

⁹ Eyásennakkek axta anhan ko'o Dios yakwayam alya'asásegwók apyókxoho énxet'ák ma'a apmaheyókxa nak elának Dios ektaha nak ekpowásamáxkoho, cham'a aptéma axta cha'a appósamo Dios nano' axta, aptaha nak apkelané ekyókxoho aksok.

¹⁰ Temegkek axta xa yakwayam enxoho elya'ásegwók ekyókxoho ektémakxa apya'áseykegkoho Dios ma'a, Dios apkelásenneykha ekha nak apkelmopwancha'a, tén han ma'a ekha nak kélyaheykekxoho m'a néten eñama apxekmóso m'a Dios énxet'ák apagkok nak.

¹¹ Apkelanak axta Dios xa eñama m'a megkamassegwayam nak apmaheyókxa etnehek, cham'a apsawhawo axta apkelana Wese' egegkok Jesucristo, eñama apchásenneykekxa Dios.

¹² Cristo nahan keñamak nentaha negko'o meyke sẽlya'ásekhaxma yakwayam agyo'ókxak Dios, yetlo megkatnaheykha egwáxok eñama m'a magya'áseyam nak Dios.

¹³ Ekeso eñamakxa seltamho nak ko'o megkalleklágwomek kéxegke eñama s'e seklegeykegkoho nak ko'o kéxegke eñamakxa, yakwayam kalpeykásekxak kélwáxok akke kéxegke xa seklegeykegkoho nak ko'o.

Cristo segásekhayo

¹⁴ Ekeso eñamakxa seltekxeya nak ko'o etapnák xóp nápakto' Dios Egyap,

¹⁵ cham'a apmésama nak apwesey apyókxoho ektaha nak énxet'ák apagkok apheykha nak néten tén han keso náxop.

¹⁶ Elmaxnakkek ko'o Dios Egyap seltamho epekkenchesek kélwáxok kéxegke kélmowána, tén han ma'a kélwaskápeykekxoho eñama nak apméso Espíritu apkeñama nak Dios, eleñama nak ma'a ekheykegkaxa nak ekxámokma agko' aksok apagkok eltakmela eleñama nak néten.

¹⁷ Elmaxnakkek nahan ko'o Dios seltamho exek kélwáxok kéxegke Cristo eñama xa megkólya'áseyam nak. Keñe sat keytek kéxegke kélwaskapma tén han kóllenxanmohok kélyennaktésamo kélteme kélásekhamaxkoho.

¹⁸ kólya'ásegwomhok sat kéxegke xamo' énxet'ák apteme nak melya'áseyam, ekwánxa nak ekyawe segásekhayo Cristo, tén han ma'a ekwánxa nak ekwegkakxa, tén han ma'a ekwánxa nak ekweykmoho kañók agko', tén han ma'a ekwánxa nak ekweykmoho netno' agko'.

¹⁹ Emenyék ko'o kólya'ásegwomhok kéxegke xa Cristo segásekhayo ektaha nak ekyawe agko', megkaxnawok ekyawe m'a ekweykenxal'a negko'o ekxeyenma egwáxok, yakwayam enxoho kalánhok agko' kélwáxok kéxegke m'a aptémakxa nak Dios.

²⁰ Apcheymákpoho sat kaxwo' kóltemésesek Dios, aptaha nak apmopwána eyeykhásamhok elának ma'a ekwánxa enxoho nelmaxnagko negko'o esenhan ma'a ekwánxa enxoho ekxeyenma egwáxok, eñama m'a apmopwána ektamheyncha'a nak negyeseksa negko'o.

²¹ ¡Apcheymákpoho sat kóltemésesek Dios nepyeseksa m'a ektaha nak Dios énxet'ák apagkok eñama m'a Cristo Jesús, megkatnegwayam enéxa! Katnahagkok sat.