EFESIOS 2 - Lengua Sur (Enxet) Nuevo Testamento

Nelwagkásamáxche teyp eñama segásekhayo Dios

¹ Máxa kélhapák axta kéxegke nano', eñama m'a kéltémakxa ekmaso axta, tén han eñama m'a megkólya'asáxma axta,

² hakte kélyetlamchek axta kéxegke ektémakxa nak keso náxop, kélláneyak axta anhan kéxegke m'a ekyespagkamakxa nak kelyekhama' wese', eláneykencha'a nak aksok ekha elmowancha'a ekheykha tekhenxet, cham'a elyáteyagkoho nak énxet'ák aptaha nak melyaheykekxoho Dios.

³ Nentemegkek axta anhan negko'oxa negyókxoho xa nano' nentémakxa nak, negyetleykekxo m'a aksok negyespagkamakxa nak, ólyahakxohok axta cha'a ekyókxoho aksok negmokókxa enxoho anlána', negyetleykekxeyk axta ektémakxa elchetamso egwáxok. Axta keñamak eyéméxko henlegásesagkohok ekmaso agko' Dios eñama xa nentémakxa ekmaso nak, ekhawo nahan ma'a apxámokxoho énxet'ák nak.

⁴ Wánxa agkok, awanhek eyke segemleykekxoho Dios, awanhek nahan segásekhayo,

⁵ ékeso eñamakxa segmeyáseykxo nak ekyennakte egnenya'ák xamo' Cristo, cham'a nentémakxa axta makham máxa eghapák eñama m'a nentémakxa axta mólya'asáxma. Apmések axta aksa kéxegke Dios kélwagkásamáxche teyp eñama m'a ektémakxa nak segemleykekxoho.

⁶ Ennakxátekhásekmek axta negko'o Dios xamo' Cristo, eghésakxeyk axta nahan xamo' Cristo m'a néten.

⁷ Apkelanak axta Dios xa, yakwayam enxoho kataxchek ma'a egmonye sat, ekyetna ekyawe agko' segásekhayo negko'o, tén han exekmósek aptaha segméso naksa m'a ektémakxa nak segemleykekxoho eñama Cristo Jesús.

⁸ Kélwagkásexchek axta kéxegke teyp eñama m'a apméso naksa axta kéxegke Dios ma'a ektémakxa nak segemleykekxoho, eñama m'a kélteme nak megkólya'áseyam. Háwe eyke kélweté kélagko' kéxegke xa, kélxawé axta eñama Dios apméso.

⁹ Háwe eñama aksok kéllané xa kélwagkásamáxche teyp nak, yakwayam enxoho méko kawának keyxkohok awáxok.

¹⁰ hakte Dios axta aptaha senlané negko'o; enlanak axta negko'o eñama m'a Cristo Jesús yakwayam enxoho anlának ma'a nentamheykha ektakmela nak, ekhawo m'a apkeláneykekxa apagko' axta Dios ma'a nano' axta.

Meyke ektahakxa egwáxok ekyetna nak negko'o eñama Cristo

¹¹ Kéxegke megkóltaha nak Judíos, apkeltéma nak énxet'ák judíos “meyke kélkahaso”, (cham'a énxet'ák judíos apkelkahásesamol'a apyempehek énxet, apkeltamhomakpekxoho nak apancha'awók “ekha kélkahaso apyempehek”),

¹² kaxénwakxoho kélwáxok kélheykencha'a axta kéxegke meyke Cristo nano' axta, axta kólpáxakxók kéxegke énxet'ák Israel, axta nahan kaweykekxohok kéxegke m'a ekhémo mók nelpakhetchásamáxkoho Dios nak, axta nahan kaweykekxohok kéxegke m'a sempekkencháseykekxa axta appeywa Dios. Kélheykha axta kéxegke keso náxop meyke Dios, tén han meyke elhaxneykha kélwáxok.

¹³ Kaxwo' eyke kéltemék kéxegke kélyepetcheyo Cristo Jesús eñama m'a apyegkenma axta éma apagkok. Makhawók axta kélheykha kéxegke Dios, kéltemesásekxeyk eyke kaxwo' keto' Dios kéxegke.

¹⁴ Cristo apteme senteméseso negko'o meyke ektahakxa egwáxok aptaha axta nahan appaxakteyáseykekxa énxet'ák judíos ma'a énxet'ák metnaha nak judíos, cham'a apmasésa axta ekhó kélhaxta nepyeseksa xa énxet'ák nak. Apyókxa axta keñamak

¹⁵ Cristo apmasésakmo m'a ektémakxa axta segánamakxa eñama judíos, ekha axta eltémókxa antehek, tén han ma'a kéltémókxa nak antehek. Aptemesásekxeyk axta Cristo apyepetcheyo pók énxet'ák judíos, tén han ma'a énxet'ák metnaha nak judíos, aptemesásekxeyk axta wánxa xama énxet'ák aphaxnancha'ák eñama apyepetcheyo Cristo. Cháxa aptahakxa axta Cristo apmasésa ektémakxa axta nelenmexamaxche xa.

¹⁶ Apketsapma néten aksok ektegyéso axta keñamak Cristo apmasésakmo apkelenmexamap énxet'ák judíos tén han ma'a énxet'ák metnaha nak judíos, aptemesásekxeyk axta nahan Cristo apkelásekheykekxoho Dios xa énxet'ák nak, aptemesásekxeyk axta anhan wánxa xama xa énxet'ák nak, ektémol'a wánxa xama negyókxa.

¹⁷ Apwa'ak axta Cristo yakwayam hensókásegmak amya'a ektakmela eñamakxa nak meyke ektahakxa egwáxok negyókxoho nak, ekhawo nak han kéxegkáxa kélheykencha'a axta makhawók Dios, tén han ma'a énxet'ák apheykha axta keto' Dios.

¹⁸ Cristo nahan keñamak negkegwagko negko'o antehek negyepetcheyo Dios Egyap negyókxoho nak, judíos tén han ma'a énxet'ák metnaha nak judíos, eñama m'a aptaha nak apwánxa xama Espíritu.

¹⁹ Ekeso eñamakxa ekmassa nak kéltaha kéxegke pók énxet'ák, massék kélheyncha'a kéxegke megkatnahakxa xapop kélagkok, kaxwo' eyke wákxók kéxegke m'a apkeltémakxa nak Dios énxet'ák apagkok, kéltemék nahan Dios apnámokkok.

²⁰ Kéxegke kélteme máxa xama tegma apkelánamapla'a néten tegma apówhak ekyennaktesol'a tegma, cham'a aptaha nak seykha amya'a, tén han ma'a énxet'ák Dios appeywa apkellegaso nak. Jesucristo eyke apteme meteymog apyennakteso xa tegma nak.

²¹ Cristo apyepetche nahan keñamak peya epenchesakpohok apkelánamap xa tegma nak, cham'a ekyókxoho ektémakxa nak apkelánamap, ekwokmoho aptaha tegma appagkanamap, tén han apyepetcheyo Wese' egegkok.

²² Ekhawo ektémakxa nak han kéxegkáxa, Cristo kélyepetcheyo keñamak kéltaha kélyepetcheykekxa kélmók, yakwayam enxoho kóltehek tegma appagkanamap aphamakxa Dios eñama m'a Espíritu apagkok nak.