EFESIOS 1 - Lengua Sur (Enxet) Nuevo Testamento

Ekxeyenma ewáxok

¹ Ko'o Pablo sekteme Jesucristo seykha amya'a apagkok eñama Dios apmopmenyého. Enxet'ák apheykha tegma apwányam Efeso ektáxesásak ko'o s'e weykcha'áhak nak, cham'a apkelánamákpoho nak Dios énxet'ák apagkok, cham'a melya'áseyam nak han Cristo Jesús.

² Dios Egyap tén han Jesucristo Wese' egegkok sat etnehek apméso naksa kéxegke m'a ektémakxa nak segemleykekxoho, tén han ma'a meyke ektahakxa egwáxok nak.

Nenxawé aksok eltakmela eleñama néten eñama Cristo

³ Oltemésesek sat apcheymákpoho Dios, Jesucristo Wese' egegkok Apyap, hakte egmések axta negko'o Dios ekyókxoho ektémakxa aksok eltakmela m'a néten, neyseksók nenteme negyepetcheyo Cristo.

⁴ Dios axta sẽlyeseykha negko'o eñama Cristo, eyeynamókxa m'a sekxo' axta ekmáheyo kalanaxchek keso náxop, yakwayam enxoho antehek nempagkanchásamáxche Dios, tén han antehek meyke nensexnánémaxche nápakto' Dios. Segásekhayo axta keñamak Dios

⁵ sempagkanma negko'o yakwayam hentehek apketchek eñama m'a Jesucristo, ekhawo m'a ektémakxa axta apmopmenyého elána'.

⁶ Ekeso eñamakxa neltemésesa nak cha'a negko'o apcheymákpoho Dios, eñama m'a segméso naksa axta ektémakxa nak segemleykekxoho, cháxa keñamak nahan sempasmo nak negko'o Dios xa, eñama m'a Apketche aptaha nak apchásekhayo.

⁷ Segásekhayo ekyawe agko' axta keñamak Dios segmasésesa m'a ektémakxa axta nelmomaxche eñama m'a apyegkenma axta éma apagkok Apketche, meyakmagkásekxak nahan nentémakxa nak mólya'asáxma.

⁸ Enxekmósek axta negko'o ekwánxa segásekhayo Dios, egmések axta ekxámokxoho ektémakxa negya'ásegwayam tén han negyekpelchágwayam.

⁹ Egya'asásegwokmek axta anhan ma'a ektémakxa nak apmopmenyého elána' ektaha nak ekpowásamáxkoho, cham'a apkeláneykekxa apagko' axta apmáheyo elána'.

¹⁰ Dios sat yanchásekxak ekxámokxoho aksok ekhéyak nak néten tén han keso náxop, yakwayam katnehek wese' agkok ma'a Cristo ekhawo xa ektémakxa nak apmáheyo elának Dios. Katnehek sat xa ektémakxa nak aksok apmáheyo elának Dios, cham'a ekwokmo sat ekhem.

¹¹ Ẽlyéseykha axta negko'o Dios sekxo' agko', yakwayam enxoho anxawak aksok sẽlpagkancheso yakwayam hẽlmések, eñama nenteme negyepetcheyo m'a Cristo, ekhawo m'a ektémakxa nak apmopmenyého apagko' elának Dios, aptaha nak cha'a apkelané ekyókxoho aksok ektakmelakxa enxoho apkelano.

¹² Apkeláneyak axta Dios xa, yakwayam enxoho óltemésesek apcheymákpoho Dios eñama m'a ektémakxa nak ekyawe agko' apcheymákpoho, negko'o nenteme axta egmonye'e nelhaxneykha Cristo.

¹³ Ekhawo ektahakxa axta anhan kéxegkáxa, kéltemék axta kélyepetcheyo Cristo, kélkahásexchek axta anhan kéxegke magkenatcheso kéltaha Dios énxet'ák apagkok eñama kélxawé m'a Espíritu Santo apxeyenma axta egkések Dios, cham'a kélleg'a axta amya'a ekmámnaksoho ekxénáxko ekyetna kéxegke kélwagkásamáxche teyp, tén han ma'a kéltaha axta megkólya'áseyam Cristo.

¹⁴ Espíritu Santo apteme magkenatcheso eyámnaksoho peya anxawak ma'a aksok sẽlpagkancheso nak yakwayam anxawa', cham'a peya nak hegmések Dios apsawhawo enxoho apmaséseso apteme apkelmomap ma'a ektaha nak énxet'ák apagkok, yakwayam enxoho kóltemésesek apcheymákpoho Dios eñama m'a ektémakxa nak ekyawe agko' apcheymákpoho.

Pablo apkelmaxnagko Dios apkeltémo egkések apkelya'ásegwayam énxet'ák melya'áseyam nak

¹⁵ Ekya'ásegkok ko'o ekyetna kéxegke megkólya'áseyam Wese' egegkok Jesús, tén han ekyetna kélásekhayo apxámokxoho ektaha nak Dios énxet'ák apagkok,

¹⁶ ékeso eñamakxa malwatésakmo nak cha'a ko'o sekméso ekxeyenma ewáxok Dios, kéxegke eñamakxa, xénchek cha'a ko'o ewáxok kéxegke neyseksa sekteme nempeywa nelmaxnagko.

¹⁷ Elmaxnakkek ko'o Dios Jesucristo Wese' egegkok Apyap, ekha nak apcheymákpoho, seltamho egkések kéxegke Espíritu yakwayam elya'ásesagkohok kéxegke m'a aksok senxekmósamo nak Dios, yakwayam enxoho kólyekpelchágwomhok ektakmela agko' kéxegke m'a aptémakxa nak Dios.

¹⁸ Elmaxnakkek cha'a ko'o Dios seltamho elya'ásásegwók kéxegke, yakwayam enxoho kólya'ásegwomhok kéxegke m'a ektémakxa nak kélhaxneykha, cham'a kélhaxneykha apmésa axta kéxegke Dios, tén han kólya'ásegwomhok ekwánxa ektakmela agko' ma'a aksok appagkanchesama nak Dios yakwayam egkések ma'a ektaha nak énxet'ák apagkok,

¹⁹ yakwayam enxoho nahan kólya'ásegwomhok ekwánxa ekyawe meyke néxa m'a ektémakxa nak apmopwána sempasmoma nak cha'a negko'o, nenteme nak magya'áseyam. Cháxa apmopwána senxekmowásawo axta negko'o Dios xa yetlo ekyawe agko' apyennakte, tén han apmopwána,

²⁰ cham'a apxátekhásekmo axta Cristo, tén han aphésákxo m'a néten ekpayhókxa nak apkelya'asamakxa,

²¹ Aptemésesek axta anhan Dios Cristo meyke ekhémo neyseksa m'a ekyókxoho aksok ekha nak elmowancha'a, tén han ma'a ekha nak kélyaheykekxoho, tén han ma'a aksok eláneykencha'a nak keso náxop, tén han ma'a aksok kelwese'e nak, aptemésesek axta anhan Dios Cristo megkaxnémo m'a ekyókxoho aksok ekhágko nak keso negwánxa nak, tén han ma'a egmonye sat.

²² Apnegkenchek axta Dios ekyókxoho aksok kóneg apmagkok Cristo, Apmések axta Dios Cristo m'a ektaha nak énxet'ák apagkok, yakwayam enxoho etnehek apkemha apmonye neyseksa ekyókxoho aksok.

²³ Dios énxet'ák apagkok ekteme Cristo apyókxa, ekteme nahan eksawhomo m'a ektémakxa nak apyókxa Cristo. Cristo nahan apteme ektemegwánxa néxa ekxámokma ekyókxoho aksok.