COLOSENSES 1 - Lengua Sur (Enxet) Nuevo Testamento

Pablo ekxeyenma apwáxok

¹ Ko'o Pablo sekteme Jesucristo seykha amya'a apagkok eñama Dios apmopmenyého atnehek, egyáxeg Timoteo ko'o sekxegexma

² sektáxésesa weykcha'áhak ẽlyáxeg'a meyenseyam nak apkelyetlo Cristo, apheykha nak ma'a tegma apwányam Colosas, cham'a ektaha nak Dios énxet'ák apagkok. Dios Egyap sat etnehek apméso naksa kéxegke m'a ektémakxa nak segemleykekxoho, tén han egkések meyke ektahakxa kélwáxok eñama nak Dios.

Pablo apkelmaxnéseso énxet'ák melya'áseyam

³ Nelmaxnésesek agkok cha'a kéxegke, agméshok cha'a negko'o ekxeyenma egwáxok Dios, Jesucristo Wese' egegkok Apyap,

⁴ hakte nenlegágwakteyk axta negko'o amya'a ektémakxa megkólya'áseyam kéxegke Cristo Jesús, tén han ekyetna kélásekhayo m'a apyókxoho ektaha nak Dios énxet'ák apagkok,

⁵ cham'a kélásekhayo ektekkesesama nak kélhaxneykha yakwayam kólxawak ma'a aksok kéltakmelchesesama nak kéxegke m'a néten. Kéllegayak kéxegke kéltenneykha xa nelhaxneykha nak, cham'a kélleg'a axta kéltenneykha amya'a ekmámnaksoho, ektaha nak amya'a ektakmela agko'.

⁶ Payhekxeyk nahan kaxwo' ekyókxoho yókxexma xa amya'a kéltennáseykencha'a axta kéxegke, tekkesesek nahan aksok eltakmela eleñama néten énxet'ák, ekhawo ektahakxa axta anhan kélnepyeseksa kéxegkáxa, cham'a sekxo' axta kélleg'a kéxegke ektémakxa segásekhayo Dios, cham'a kélya'ásegwokmo axta nahan ektaha ekmámnaksoho m'a ektémakxa nak segásekhayo Dios.

⁷ Cháxa apkelxekmósa axta kéxegke egyáxeg Epafras xa, aptaha nak egyáxeg negásekhayo, cham'a sempasmoma axta nentamheykha negko'o, aptaha nak han meyenseyam apkelané aptamheykha eñama nak Cristo yakwayam epasmok kéxegke.

⁸ Ensántegkesek axta anhan negko'o amya'a Epafras ekyetna kélásekhayo kéxegke, cham'a kélásekhayo aptekkeseso nak kélwáxok Espíritu.

⁹ Ekeso eñamakxa magyensakmo nak negko'o nelmaxnéseso kéxegke eyeynawo m'a nenlegakxa axta amya'a, axta anhan agyensakmok nelmaxnagko Dios neltamho elya'asásegwomhok agko' ma'a ektémakxa nak apmopmenyého, tén han neltamho egkések ma'a ekyókxoho ektémakxa nak negya'ásegwayam, tén han ma'a kélyekpelchágwayam ektaha nak apméso Espíritu,

¹⁰ yakwayam enxoho kólewának kóltehek ma'a eyéméxchexa nak etnahagkok Wese' egegkok énxet'ák apagkok, kóllának cha'a m'a ekleklamókxa nak apwáxok antehek Wese' egegkok, tén han kóltehek ma'a ekyókxoho nentémakxa ektakmela nak, tén han kólyekpelchágwomhok agko' ma'a Dios.

¹¹ Nelmaxnakkek negko'o Dios neltamho etnésesek kéxegke ekha kélyennakte eñama m'a apmopwána eyeymáxkoho nak; yakwayam enxoho kólewának kólenmaxaxkohok kéxegke ekyókxoho aksok, yetlo kélwaskápeykekxoho tén han kéllenxányam,

¹² kólmések sat nahan kéxegke ekxeyenma kélwáxok Dios Egyap yetlo ekpayheykekxa kélwáxok, aptaha nak apkeláneseykekxa kéltahakxa yakwayam kawakxohok kélxaweyák ma'a aksok kélpagkancheso nak yakwayam elxawagkok énxet'ák ektaha nak Dios énxet'ák apagkok, eleñama m'a neyseksa elseyexma aptémakxa nak Wese' apwányam Dios.

¹³ Ẽlhexyawasékxeyk axta negko'o Dios sẽlmoma axta m'a ektémakxa nak ekmowána ekyaktesóxma, ennaklakxeyk axta m'a aptémakxa nak Wese' apwányam Apketche apchásekhayókxa nak,

¹⁴ aptaha nak sẽlwagkaso teyp, axta anhan eyakmagkáseykxak nentémakxa mólya'asáxma.

Meyke ektahakxa egwáxok xamo' Dios eñama m'a apketsapma axta Cristo

¹⁵ Cristo apteme negweté aptémakxa m'a Dios aptaha nak metémap, cham'a Cristo aptaha nak apkemha apmonye Dios Apketche, aphegkek axta amonye elánamáxche ekyókxoho aksok.

¹⁶ Cristo nahan keñamak apkeláneya Dios ekyókxoho aksok ekhéyak nak néten, tén han aksok ekhéyak nak keso náxop, cham'a aksok negwetayo nak, tén han ma'a magwetayo nak, tén han apkeláneya m'a aksok ekha ekmowána ekheykha nak néten eláneykencha'a nak keso náxop, cham'a ekha nak kélyaheykekxoho, ekha nak han elmowancha'a. Cristo nahan keñamak elánamáxko ekyókxoho aksok, Cristo nahan yakwayam etnehek apagkok.

¹⁷ Aphegkek axta Cristo amonye elánamáxche ekyókxoho aksok. Cristo nahan keñamak ektakmela ekhéyak ekyókxoho aksok.

¹⁸ Cristo nahan apteme apkemha apmonye nepyeseksa Dios énxet'ák apagkok, ektaha nak han apyókxa. Aphegkek axta Cristo sekxo' agko', apmonye axta anhan apxátekhágwayam nepyeseksa énxet'ák apkeletsapma nak, yakwayam enxoho etnehek Cristo apkemha apmonye neyseksa m'a ekyókxoho aksok nak.

¹⁹ Hakte leyawók axta apwáxok Dios keytek Cristo m'a ekyókxoho aptémakxa nak Dios.

²⁰ Apmenyék axta Dios katnekxak eyásekheykekxoho ekyókxoho aksok ekhéyak nak keso náxop, tén han ekhéyak nak ma'a néten eñama m'a Cristo. Apkelanak axta Dios xa negásekheykekxoho nak, eñama m'a ekyegkenamaxche axta éma apagkok Cristo néten aksok ektegyéso.

²¹ Axta kólyepetcheyók kéxegke Dios nano' axta, kenmexeykha axta kélwáxok kéxegke Dios eñama m'a aksok ekmaso kélláneyak axta.

²² Wánxa agkok, aptemesáseykxeyk eyke kaxwo' kélásekhamaxchekxoho kéxegke m'a Dios eñama m'a apketsapma axta Cristo, cham'a ektahakxa axta eklegeykegkoho apyókxa. Apkelanak axta Dios xa, yakwayam enxoho etnésesek kéxegke kélpagkanamaxche enaklakxak ma'a aphamakxa nak, meyke ekyepetche xama aksok ekmanyása, tén han meyke kélxéncháseykekxoho kéltémakxa.

²³ Cháxa keñamak eyéméxko nak kóltehek kéxegke kélwaskápeykekxoho eñama ekpasmo m'a megkólya'áseyam nak, meyke kélyenseyam ma'a kélhaxneykha ekyetna nak kéxegke eñama kéllegé m'a tásek amya'a kéltenneykha nak. Cháxa amya'a kéltenneykencha'a nak ekyókxoho yókxexma xa, sekpasmoma nak han ko'o xa ektémakxa kéltenneykha, ko'o Pablo.

Pablo kélásennagko elanaksek aksok Dios énxet'ák apagkok

²⁴ Payhekxeyk kaxwo' ko'o ewáxok seklegágkoho kéxegke eñamakxa, cháxa seksawhegwokmo ko'o eklegeykegkoho sekyókxa xa, cham'a eyéméxko nak eñegkohok Cristo, énxet'ák apagkok eñamakxa, ektaha nak han apyókxa.

²⁵ Etnésesek axta ko'o Dios apchásenneykha nepyeseksa m'a ektaha nak énxet'ák apagkok, apkeltamhok axta asawhohok seklegaso m'a ektémakxa nak appeywa, cham'a segkésa axta sektamheykha yakwayam apasmok kéxegke,

²⁶ cham'a amya'a aptemésesama axta ekpowásamáxkoho Dios nano' axta, cham'a megyahayo axta anhan kataxchek Dios nentámen axta, apxekmósek eyke kaxwo' Dios ma'a ektaha nak énxet'ák apagkok.

²⁷ Apmenyék axta Dios elyekpelchásesók ma'a ektaha nak énxet'ák apagkok, cham'a ekwánxa nak ekxámokma aksok eltakmela apagkok, cham'a ektemésesama axta cha'a ekpowásamáxkoho énxet'ák metnaha nak judíos. Apheyk kélwáxok kéxegke Cristo, cháxa megkólya'áseykegko axta kéxegke xa, aptaha nak han eñamakxa nelhaxneykha m'a negeymáxkoho peya nak anxawak.

²⁸ Nenlegasegkek cha'a negko'o apwesey Cristo, agméshok nahan cha'a negko'o nempeywa apyókxoho énxet'ák, nelxekmósegkek nahan cha'a apyókxoho énxet'ák ekyókxoho ektémakxa nak negya'ásegwayam, yakwayam enxoho annaklók ma'a aphamakxa nak Dios yetlo ekyennakwayam apteme melya'áseyam eñama apkelyepetcheyo Cristo.

²⁹ Ekeso eñamakxa sekwaskápeykxoho nak sektamheykha yetlo sekyennakte, tén han sekmowána, ektaha nak cha'a segkéso m'a Cristo.