APOCALIPSIS 21 - Lengua Sur (Enxet) Nuevo Testamento

Axnagkok néten tén han xóp axnagkok

¹ Ekwet'ak axta ko'o axnagkok néten tén han xóp axnagkok natámen xa, hakte massegwokmek axta m'a néten ektaha axta émha amonye, tén han ma'a xóp émha amonye axta, massegwokmek axta anhan wátsam ekwányam.

² Ekwet'ak axta ko'o tegma apwányam aptakmalma Jerusalén aphaxnagkok, apweywentek axta apkeñama m'a néten, apkeñama m'a nápakto' Dios, penchásamáxchek axta kéláneykekxa ektémol'a kelán'a ektaxneykekxa ektaxno yakwayam kalyamhápok.

³ Ekleg'ak axta ko'o kélpeywa ekyennakte agko' eñama m'a ekyetnakxa axta taháno ektakmalma. Entahak axta amya'a s'e: “Apheyk kaxwo' Dios nepyeseksa énxet'ák. Exek sat nahan cha'a xamo', énxet'ák apagkok sat nahan etnahagkok xa énxet'ák nak. Dios sat nahan etnehek Dios apagkok xa énxet'ák nak.

⁴ Emasésesek sat Dios apaktégmenek xa énxet'ák nak, kamaskok sat nétsapma, kamaskok sat nahan ma'a nenlekxagweykha nak, kamaskok sat nahan ma'a senlapwayam nak, kamaskok sat nahan ma'a nenlegeykegkoho ekmáske nak, hakte massegwokmek axta m'a ekyókxoho aksok ekyetnama axta nano' axta.”

⁵ Aptahak axta appeywa m'a ektaha axta apha néten aptaháno ektakmalma. Entahak axta appeywa s'e: “Elanak ko'o axnagcha'ák ekyókxoho aksok.” Aptahak axta nahan se'e: “Etaxés xa, hakte ekmámnaksoho agko' xa amya'a nak, payhawok nahan kóltehek megkólya'áseyam.”

⁶ Keñe axta aptaha seyáneya s'e: “Penchásexchek elánamáxche ekyókxoho aksok, ko'o sekteme sémha emonye, tén han ektemegwánxa néxa, ko'o nahan sekteme eyeynókxa tén han ektemegwánxa néxa. Hem agkok enchakhak énxet, wagkok sat ko'o yegmen eñama m'a ekteyapmakxa nak yegmen ekyennaktésamo nak egnenyek, agkések sat meyke ekyanmaga.

⁷ Enxet ektahakxa enxoho apmalanma, exkekxak sat ekyókxoho xa aksok kélpagkancheso nak, Dios apagkok sat ko'o hetnehek xa énxet nak, keñe sat ko'o atnehek hatte xa énxet nak.

⁸ Keñe m'a énxet apcháyo nak aksok, tén han ma'a énxet'ak apkelyenseyam nak apteme melya'áseyam, tén han ma'a énxet'ák ekmaso nak apkeltémakxa, tén han ma'a énxet'ák apchakhamol'a pók, tén han ma'a énxet'ák ekmaso nak apkeltémakxa kalmopsexta'a, tén han ma'a énxet'ák aptamhéyak nak kelyohóxma'a, tén han ma'a énxet'ák apkelpeykesamo nak kéleykmáseso, tén han ma'a apyókxoho énxet'ák apkelmopwancha'a amya'a nak, sat kalpehemmok apkelmahéyak neyseksa aksok ánek eyálewomakxa xa énxet'ák nak, cham'a ektahakxa nak ánet nétsapma.”

Jerusalén aphaxnagkok

⁹ Apxegakmek axta xama Dios apchásenneykha apkeñama nepyeseksa m'a siete Dios apkelásenneykha nak, cham'a apkelmeykha axta siete egheykok elláneykegkoho siete ektemegwánxa néxa aksok elmasagcha'a. Aptahak axta seyáneya s'e: “Empoho hana, axekmósek sat xép ektémakxa kelán'a ekpagkanamaxche nak, cham'a peya nak etnehek aptáwa Nekkések Apketkok.”

¹⁰ Ekwet'ak axta ko'o ektahakxa sexekmóso m'a Espíritu, máxa axta sekwanmagko séntama Dios apchásenneykha néten egkexe ekwenakte, netno' axta m'a, exekmósek axta tegma apwányam Jerusalén aptakmalma, apweywentek axta apkeñama néten, apkeñama m'a aphakxa nak Dios.

¹¹ Dios elseyexma apagkok axta nahan kelsasóxma xa tegma apwányam nak, máxa axta apkelsasóxma tegma m'a meteymog ektakmalmal'a elyenma, máxa axta m'a meteymog ekyennaktel'a, cham'a ektémakxal'a sokpeysyam elyenma.

¹² Netna'awok axta nahan nepyáwa kélhaxta xa tegma apwányam nak, elyawa axta nahan kélhaxta, doce axta nahan ekyókxoho átog, apchakneykha axta nahan Dios apkelásenneykha ekyókxoho atña'ák, ekyókxoho átog axta nahan naktáxésamaxchek apkelwesey m'a doce pók aptémakxa énxet'ák apkeleñama nak Israel.

¹³ Antanxo axta átog ekpayho ekteyapmakxa ekhem, antanxo axta nahan átog ekpayho nexcheyha, antanxo axta nahan átog ekpayho nepyeyam, antanxo axta nahan átog ekpayho nak taxnegwánxa ekhem.

¹⁴ Doce meteymog axta nahan héyegkok ekméyak xa tegma nepyáwa kélhaxta nak, cham'a meteymog eknaktáxésamaxko nak apkelwesey doce Nekkések Apketkok seykha amya'a apagkok nak.”

¹⁵ Apsókha axta nahan kélyetsáteyak ekyátekto elyenma m'a Dios apchásenneykha sepakhetchesa axta ko'o, yakwayam elyetsetagkok xa tegma apwányam nak, tén han ma'a atña'ák nak, tén han ma'a kélhaxta nak nepyáwa.

¹⁶ Hawók axta mók napakhaw'eyk appayhakxa xa tegma apwányam nak, hawók axta nahan mók ma'a apwegkakxa. Apkelyetsátégkek axta Dios apchásenneykha xa tegma apwányam nak: dos mil doscientos kilómetros axta apwegkakxa; hawók axta mók apwegkakxa, hawók axta nahan mók ma'a ekmaheyak nak néten, hawók axta nahan mók appayhakxa.

¹⁷ Keñe axta nahan apkelyetsátégko Dios apchásenneykha m'a tegma apwányam kélhaxta nak nepyáwa; Sesenta y cinco metros axta ekwegkakxa xa, ektémol'a énxet apkelyetsáteyak, cham'a aptahakxa axta apkelyetsátégko Dios apchásenneykha.

¹⁸ Meteymog ekyennakte axta nahan elánamáxche kélhaxtegkeso nepyáwa xa tegma apwányam nak, keñe axta sawo ekyátekto elyenma m'a tegma apwányam nak, máxa axta m'a sokpeysyam la'a elyenma.

¹⁹ Mók ektémakxa meteymog ektakmalma axta kélyepetchesók kélnaxegkáseykencha'a xa tegma apwányam kélhaxtegkeso nak nepyáwa, cham'a ektaha axta ekyennaktéso; meteymog ektakmalma ekyennakte axta sekxo', keñe axta nahan ma'a meteymog ekyapakmatél'a, axta nahan ma'a meteymog ekhól'a sokpeysyam ekhal'a ektáxama, axta nahan ma'a meteymog hópa'atla'a;

²⁰ meteymog ekmopé axta nahan, axta nahan ma'a meteymog ekyexwasél'a, tén han ma'a meteymog yáma ekyátekto ekyepetchel'a yáma hópa'at, axta nahan ma'a meteymog ekyapakmaté ekyepetchel'a hópa'at, axta nahan ma'a meteymog ekyátektol'a, axta nahan ma'a meteymog hópa'at agko' la'a, axta nahan ma'a meteymog yáma ekyátektol'a, meteymog hómáyok axta nahan.

²¹ Doce aksok elyakye ekhó lamom axta m'a doce átog nak, xama aksok ekyakye ekhó lamom axta cha'a elánamáxche xama átog, sawo ekyátekto elyenma agko' axta nahan ma'a ámay nepyeseksa xa tegma apwányam nak, máxa axta m'a sokpeysyamla'a elyenma.

²² Axta ko'o ót'ak tegma apagkanamap xa tegma apwányam nak, hakte Wese' egegkok Dios ekha apyennakte apteme apyakmagkaso tegma appagkanamap, tén han ma'a Nekkések Apketkok.

²³ Axta nahan keyméxchek kalsaksek exma ekhem xa tegma apwányam nak, tén han ma'a apkelsasóxma nak pelten, hakte Dios elseyexma apagkok axta kelsasóxma xa, axta Dios chálewaso apagkok ma'a Nekkések Apketkok.

²⁴ Neyseksa elseyexma sat nahan exmakha énxet'ák keso náxop eñama xa tegma apwányam nak, keñe sat egkések kelwese'e apkelwányam apkeleñama náxop aksok apagkok elmomnáwa xa tegma nak.

²⁵ Yókxoho ekhem sat nahan katnehek ekmayhe átog xa tegma apwányam nak, méko sat nahan katnehek axta'a m'a.

²⁶ Kólmések sat ektémakxa nak ekxákma aksok apagkok eltakmela énxet'ák xa tegma apwányam nak.

²⁷ Wánxa agkok, megkatxek sat eyke aksok ekmanyása m'a, metxek sat nahan ma'a énxet ekmaso agko' nak aptémakxa, esenhan ma'a aksok sẽlyexancheseykha nak, wánxa sat elántexek ma'a énxet'ák eknaktáxésamaxko nak apkelwesey weykcha'áhak eknaktáxésamaxchexa nak apkelwesey énxet'ák peya nak elwagkasakpok teyp, cham'a weykcha'áhak ektaha nak Nekkések Apketkok apagkok.