APOCALIPSIS 1 - Lengua Sur (Enxet) Nuevo Testamento

Sẽlxekmósamo eñama Jesucristo

¹ Keso ektahakxa axta aksok apxekmósamo Dios Jesucristo s'e, yakwayam enxoho elxekmósek Cristo m'a ektaha nak apkelásenneykha peya kañehémhok katnehek xa. Apya'asásegwokmek axta Jesucristo apchásenneykha apwesey Juan xa, cham'a apcháphasa axta aphakxa xama apchásenneykha apkeñama néten.

² Apkeltennáha axta Juan ekmámnaksoho agko' ekyókxoho aksok ektahakxa axta apweté, cham'a aptaha nak han apxeyenma m'a amya'a eñama nak Dios, cham'a amya'a apkeltenneykencha'a axta anhan Jesucristo.

³ Apkeleñémo agko' énxet ektaha nak apkelyetseté xa amya'a ekxeyenma nak yakwánxa katnehek, apkeleñémo nahan ma'a ektaha nak apháxenmo, cham'a apkelyaheykekxoho nak ektémakxa eknaktáxésamaxche, hakte chágketwokmek kaxwo' ekhem yakwánxa nak katnehek xa.

Juan aptáxéseso siete apchakneykekxexa

⁴ Ko'o Juan, ektáxésesek ko'o siete apchakneykekxexa nak ma'a yókxexma Asia. Kólma kéxegke segméso naksa nak Dios segemleykekxoho, tén han ma'a meyke ektahakxa egwáxok eñama nak ma'a Dios, cham'a apha nak kaxwo', cham'a aphama axta nahan nano' axta, cham'a peya nak han ewata', cháxa eleñama nak han ma'a siete espíritu apheyncha'a nak nápakto' Wese' apwányam Dios aphamakxa xa,

⁵ tén han eleñama m'a Jesucristo, aptaha nak ekmámnaksoho agko' apxeyenma aptémakxa Dios, aptaha axta nahan apmonye apxátekhágwayam nepyeseksa apkeletsapma axta, aptaha nak han ekha kélyaheykekxoho nepyeseksa kelwese'e apkelwányam nak keso náxop. Egásekhayok negko'o Cristo, egmasésesek axta nahan mólya'asáxma, cham'a apyegkena axta éma apagkok,

⁶ entemésesek axta anhan negko'o nenlánamáxkoho nempasmo nelmaxnéseso Dios énxet'ák apagkok yakwayam anlának nentamheykha eñama nak ma'a Dios, aptaha nak Jesucristo Apyap. ¡Apagkok sat cha'a etnehek Jesús ma'a ektémakxa nak apcheymákpoho tén han ma'a ektémakxa nak apmopwána! Katnahagkok sat.

⁷ Apkexyekmek sat agkok Cristo neyseksa yaphopé, apyókxoho énxet sat éta', kammohok sat apweté m'a ektaha axta apkelyetxakxo; apxámokxoho énxet'ák sat kallapwomagkok apheykha nak keso náxop, ellekxagwaha sat nahan, Cristo eñamakxa. Nakso', katnehek sat.

⁸ Aptahak Wese' Dios ekha apyennakte s'e: “Ko'o sekteme eyeynókxa tén han ektemegwánxa néxa,” cham'a apha nak kaxwo', cham'a aphama axta nahan nano' axta, cham'a peya nak han ewata'.

Ekwetamaxche ektémakxa Cristo apcheymákpoho

⁹ Ko'o Juan sektaha nak may'áseykmoho xamo' kéxegke Cristo, Jesús sekyepetcheyo keñamak sewákxoho nahan ko'o xa sekteme señama nepyeseksa Dios énxet'ák apagkok tén han sewákxoho seklegeykegkoho xamo' kéxegke, tén han sewákxoho m'a ektémakxa nak kélwaskápeykekxoho, yakwayam enxoho alenmaxaxkohok seklegeykegkoho ko'o. Elhésekmek axta ko'o yókxexma étkok ekwesey Patmos, eñama seklegaso m'a amya'a eñama nak Dios, cham'a aptemésesama axta ekmámnaksoho Jesús.

¹⁰ Apmeyk axta ko'o sekwanmagko Espíritu Santo cham'a Wese' egegkok ekhem apagkok ekpagkanamaxchel'a, ekleg'ak axta ko'o netámen kélpeywa ekyennakte agko' ektémol'a kapáwak kélakkahaso.

¹¹ Entahak axta amya'a seyáneyáxko s'e; “Etaxés sat weykcha'áhak ektahakxa nak apweté, yapháses sat ma'a siete apchakneykekxexa nak yókxexma Asia, cham'a Efeso tén han ma'a Esmirna, tén han ma'a Pérgamo, tén han ma'a Tiatira, Sardis, Filadelfia, tén han ma'a Laodicea.”

¹² Ekpeynchaxkok axta ko'o seltamho ótak ma'a ektaha axta sepakhetcheso, ekwet'ak axta siete chálewaso elyátekto elyenma.

¹³ Keñe axta nahan sekwet'a aphó énxet neyseksa xa chálewaso nak. Aphóxek axta aptaxno, apweyktamok axta apmagkok, sawo ekyátekto elyenma axta nahan aptete apnenyek.

¹⁴ Máxa axta nekkések apwa' ekmopé apwa' xa énxet nak, máxa axta m'a yeyam appok ekmopél'a, keñe axta apakta'ák máxa m'a táxa eyálewel'a.

¹⁵ Kelápogwategkek axta nahan apmagkok ektémol'a sawo ekyentaxno ekyexwáseykekxal'a kélyamasma neyseksa táxa, kayhek axta nahan appeywa, máxa axta extegyawa m'a ekteyeykenxal'a yegmen.

¹⁶ Siete yaw'a axta aphágkok ma'a apmek ekpayhókxa nak apkelya'asamakxa, keñe axta apátog ektepa sókwenakte ánet nekha ekmahantal'a, máxa axta ekhem elyenma m'a nápát.

¹⁷ Xama axta sekwet'a ko'o xa, elpólenteyk axta náxop apkenmágkaxa ektémol'a ótsapok, wánxa agkok, aptahak axta seyáneya sepaknegwa'awo apmek ekpayhókxa apkelya'asamakxa s'e: “Náheyé', ko'o sekteme eyeynókxa tén han ektemegwánxa néxa,

¹⁸ sekteme nahan mamassegwayam. Etsepmeyk axta ko'o, kaxwo' eyke ekheyk megkatnegwayam enéxa. Yetneyk ko'o ketchesama átog sekmowána alkok átog ma'a apkelmaheykegkaxa nak apkeletsapma axta.

¹⁹ Etaxés ektahakxa nak aksok apweté: cham'a ekyetna nak kaxwo' tén han ma'a peya sat nahan kataxchek.

²⁰ Cháxa aksok ekyexamaxche xa apwet'a exchek aphágko yaw'a émek ekpayhókxa nak selya'asamakxa, tén han ma'a apwet'a exchek siete chálewaso sawo ekyátekto elyenma; cham'a siete yaw'a nak, ekyetchesamaxkoho m'a Dios apkelásenneykha eláneykha nak ma'a siete apchakneykekxexa nak, keñe m'a siete chálewaso nak ekyetchesamaxkoho m'a kélakneykekxexa.