2 CORINTIOS 6 - Lengua Sur (Enxet) Nuevo Testamento

¹ Nágkólteméses aksa eyakhémo apméso kéxegke Dios ma'a ektémakxa nak segásekhayo, cham'a apxekmósa axta kéxegke eñama nenteme nelpasmomaxkoho nenlané m'a Dios aptamheykha nak.

² Hakte aptemegkek appeywa Dios ekyetnama nak eknaktáxésamaxche s'e: “Ekhaxnawók axta exchep ekwokmo axta ekhem yakwánxa weyxho'. Ekpasmeyk axta exchep ma'a ekwokmo axta ekhem yakwánxa awagkasek teyp.” Wokmek kaxwo' ekhem ekpayhókxa nak hempasmok Dios; wokmek eyke kaxwo' ekhem nelwagkásamáxchexa teyp.

³ Magmeyásak cha'a negko'o nentémakxa ekmaso xama énxet enxoho, yakwayam enxoho megkaxénaxchék ekmaso m'a ektémakxa nak negko'o nentamheykha.

⁴ Wánxa agkok, nenxekmósek cha'a negko'o nentaha Dios apkelásenneykha eñama nenlané xa nentamheykha nak, eñama anhan nelenmáxamáxkoho m'a nenlegeykegkoho nak, tén han ma'a ekxákma nak eyéméxchexa aksok egagkok negko'o, tén han ma'a ekyentaxnamo nak negheykha,

⁵ nentekyaweykha, sẽlheseyam sẽlpextétamakxa, segahapwe énxet apkello, nentamheykha ekyentaxno, nelánteyápeykmoho, tén han meyk sẽlnapma.

⁶ Nenxekmowásawók nahan nentaha negko'o Dios apkelásenneykha eñama m'a eyáxñeyo nentémakxa nak, eñama nahan negya'ásegwayam ma'a amya'a ekmámnaksoho nak, tén han eñama m'a mampekhésamaxche nak, tén han eñama m'a ektakmeleykha nak egwáxok, tén han eñama m'a apha nak negko'o egwáxok Espíritu Santo, tén han eñama m'a negásekhayo ekmámnaksoho nak,

⁷ eñama anhan ma'a neltenneykha nak amya'a ekmámnaksoho, tén han eñama ekyetno negko'o m'a Dios apmopwána nak. Negmáha cha'a negko'o m'a ekpéwomo nak nentémakxa ektémol'a agmaha negmeykha, yakwayam nak agmaha nennapéxchexa enxoho, tén han antehek negahakkásamáxche.

⁸ Mók xama cha'a negko'o hentehek segáyo énxet, mók xama nahan cha'a etnehek segwanyémo énxet, mók ekhem cha'a katakmelek senxeyenma énxet, keñe cha'a mók ekhem kasók senxeyenma. Negmowána amya'a cha'a hentemésesek negko'o neyseksa eykhe ekteme cha'a ekmámnaksoho nempeywa.

⁹ Hẽlyekpelkohok eykhe cha'a negko'o, máxa eyke katnehek cha'a mólyekpelcháxko enxoho. Keto' cha'a negko'o neletsapmakxa, wánxa agkok, makhemek eyke makham negheykha; hẽlegásesagkohok eykhe cha'a, akke antekyawák.

¹⁰ Máxa eykhe entemék sẽllapwámeykegko enxoho negko'o, wánxa agkok, akke kamassegweykmók ekpayheykekxa egwáxok. Máxa eykhe nentemék ma'a meyke aksok egagkok enxoho, wánxa agkok nenxamásesegkek eyke aksok eleñama Dios ma'a apyókxoho énxet; máxa eykhe entemék negko'o méko enxoho aksok egagkok, xámok eyke negko'o m'a aksok eleñama nak Dios.

¹¹ Elyáxeg apheykha nak Corinto, axta ageysákxak nelpakhetchesa kéxegke; axta ampówásawok ma'a ekyókxoho ektémakxa nak elchetamso egwáxok.

¹² Axta agmeyágweykxak negko'o ektémakxa negásekhayo kélnepyeseksa kéxegke; kéxegke eyke cha'a mehenxekmowásawok ektémakxa sẽlásekhayo.

¹³ Eltamhok ko'o helxekmóshok selásekhayo kéxegke ekhawo sektémakxal'a ko'o kélnepyeseksa kéxegke, aptémol'a énxet elának apketchek.

Negko'o nenteme Dios megyetsapma tegma appagkanamap apagkok

¹⁴ Nágkóltemeykha aksa xamo' kéxegke m'a énxet megkaxnawo nak kéltémakxa, cham'a metne nak melya'áseyam. ¿Awancheya katnehek ekxegexma nentémakxa ekpéwomo m'a nentémakxa megkapéwomo nak? ¿Awancheya nahan katnehek ekxegexma elseyexma m'a ekyaktesóxma nak?

¹⁵ Mopwanchek nahan kaxhok elchetamso apwáxok Cristo m'a ektémakxa nak elchetamso awáxok kelyekhama'. Mopwanchek nahan kaxhok mók apwáxok énxet ekha mey'áseyam ma'a énxet metne nak mey'áseyam Cristo.

¹⁶ Mopwanchek nahan Dios tegma appagkanamap apagkok etnehek apxegexma m'a aksok kéleykmáseso nak. Hakte negko'o nenteme Dios megyetsapma tegma appagkanamap apagkok, ekhawo aptémakxa axta appeywa s'e: “Axek sat ko'o nepyeseksa xa énxet'ák nak, aweynchamha sat nahan. Ko'o sat atnehek Dios apagkok xa énxet'ák nak, keñe sat ko'o atnehek énxet'ák ahagkok xa énxet'ák nak.”

¹⁷ Aptahak axta anhan appeywa Wese' egegkok se'e: “Kólántep nepyeseksa xa énxet'ák nak, nágkólpaxkaha anhan. Nágkólpaknegwomho nahan ma'a aksok ekmanyása nak. Keñe sat ko'o almok takha' kéxegke.

¹⁸ ko'o sat nahan atnehek Kélyap kéxegke, keñe sat kéxegke atnehek étchek, aptahak appeywa m'a Wese' egegkok ekha nak apyennakte.”