2 CORINTIOS 5 - Lengua Sur (Enxet) Nuevo Testamento

¹ Negko'o nenteme negyetchásamáxkoho xama tegma apkeñama nak keso náxop, ektémol'a tegma kélpakxenwayamla'a yakwatakxoho; wánxa agkok, negya'ásegkok eyke negko'o senlánesa Dios tegma memassegwayam ma'a néten megkatnaha nak énxet apkelané, cham'a kélmaséseykmo enxoho se'e tegma nak.

² Ekeso eñamakxa nelpekhégkoho nak negko'o neyseksók negha s'e tegma nak, hakte nelpekhések negko'o aghók ma'a tegma apyetna nak néten;

³ sat nahan hegaklaksek negko'o m'a tegma nak ektémol'a hẽlaklaksek apáwa, yakwayam enxoho mantehek meyke apáwa.

⁴ Nentekkások cha'a negko'o nennama eñama ekyentaxnamo egwáxok neyseksa negha s'e tegma nak, hakte magmenyék antehek meyke apáwa, akke aksa egmenyék negko'o hẽlántaxneyásekxak ma'a nelnakta nak, yakwayam enxoho katnekxak axnagkok ekyennakte m'a negyókxa étsapmo nak.

⁵ Dios axta senláneseykekxa negko'o xa, hakte Dios axta anhan segméso negko'o Espíritu Santo, yakwayam katnehek ekmámnaksoho peya anxawak negko'o m'a aksok peya nak hegmések Dios.

⁶ Ekeso eñamakxa magya'ásekmo nak cha'a negko'o peya katnehek xa. Negya'ásegkok negko'o neyseksa negheykha nak se'e ektémakxa nak negyókxa, teyépek negko'o aphakxa Dios;

⁷ magwanchek eyke negko'o agwetak Wese' egegkok se'e kaxwo' nak. Wánxa agkok, magya'áseyam akke empasmak neyseksók negheykha;

⁸ wánxa agkok, akke agya'ásekmok negko'o, egmenyék nahan negko'o agyenyók se'e negyókxa nak, yakwayam enxoho aghamok xamo' Wese' egegkok.

⁹ Ekeso eñamakxa negámenyého egagko' nak cha'a kalkohok apwáxok Wese' egegkok nentahakxa, megkeyxek ma'a negyenyawa enxoho negyókxa esenhan ma'a magyenyawa enxoho.

¹⁰ Hakte negyókxoho sat ólmahagkok ma'a segyekpelchémókxa nak Cristo, yakwayam enxoho exkak cha'a enxama m'a aksok ekpehewayam nak yakwayam exka', cham'a ektahakxa enxoho apkelané aksok ektakmela esenhan ma'a ektahakxa enxoho apkelané aksok ekmaso neyseksa meyamasma axta m'a ektémakxa nak apyókxa.

Amya'a ekxénamaxche meyke ektahakxa egwáxok

¹¹ Egmenyék cha'a negko'o anlekwomhok énxet'ák, hakte negya'ásegkok negko'o ekpayhawo antehek negaye Wese' egegkok. Ẽlya'ásegkok negko'o Dios, ẽlya'ásegkok kexaha anhan kéxegkáxa. Lapmaxchek sat hẽlyekpelkohok kéxegkáxa.

¹² Móltamhok negko'o ólxénaxchekxohok egagko' makham nentaha ektakmela nentémakxa, kéxegke eyke negmeyásak yakwayam katakmelek senxeyenma negko'o, yakwayam enxoho kólewának kólategmowagkok ma'a énxet'ák eleymáxkoho nak apkelpeywa exének aksok apwetayo nak, keñe mékpelchek ma'a ektémakxa nak elchetamso egwáxok.

¹³ Sẽlyéháxma agkok negko'o, Dios akke keñamak xa. Agkok antahak negko'o sẽlyéháxma, kéxegke eyke yakwayam kapasmok xa.

¹⁴ Cristo segásekhayo cha'a negko'o senláneseyak nentémakxa, eyeynamókxa m'a negya'ásegwokmo axta apketsapma xama énxet segyanmaga negyókxoho nak, keñe anhan segwákxoho negyókxoho negko'o m'a ektémakxa axta apketsapma.

¹⁵ Apketsekkek axta Cristo aptaha segyanmaga negyókxoho nak yakwayam enxoho mantehek negko'o wánxa ekxéneykha egwáxok ma'a negko'o egagko' nak, wánxa kaxénmakha egwáxok ma'a Cristo, apketsapa axta, tén han ma'a apxátekhágwokmo axta negko'o eñamakxa.

¹⁶ Ekeso eñamakxa megkaxnawo nak kaxwo' elchetamso egwáxok negko'o m'a ektémakxa nak elchetamso apwáxok énxet keso náxop, cham'a nentaha enxoho negyekpelchémo xama énxet. Axta entemék cha'a negko'oxa ekxeyenma egwáxok Cristo m'a ektémakxal'a ekxeyenma apwáxók énxet'ák apheykha nak keso náxop, massék eyke kaxwo' ektaha ekxeyenma egwáxok negko'o xa ektaha nak.

¹⁷ Negko'o ektahakxa enxoho negyepetcheyo Cristo, axnagkok nentémakxa katnehek, massegwokmek ma'a nentémakxa nano' axta, axnagkok nentémakxa eyke kaxwo' yetnak.

¹⁸ Dios akke aptaha apkelané ekyókxoho xa, sentemesáseykekxoho apagko' axta anhan nelásekhamaxchekxoho eñama m'a Cristo, egmések axta anhan negko'o nentamheykha yakwayam antemesásekxak apchásekhayo Dios apyókxoho énxet.

¹⁹ Aptemesáseykekxoho apagko' axta Dios apkelásekheykekxoho énxet'ák apheykha nak keso náxop eñama m'a Cristo, meyke apkelanyo m'a ektémakxa nak melya'asáxma énxet; egmések axta anhan negko'o nentamheykha yakwayam ólya'asásegwók énxet'ák ektémakxa xa amya'a nak.

²⁰ Negko'o nenteme nenxeyenma amya'a eñama nak Cristo, máxa cha'a katnehek ma'a Dios apagko' enxoho apkeltémo kóltehek kéxegke xa, eñama m'a nenxeyenma nak negko'o. Ekeso eñamakxa neltamho nak negko'o kólásekhekxohok Dios yetlo nenxeyenma apwesey Cristo.

²¹ Axta elaneyk Cristo mey'asáxma xama enxoho. Negko'o axta eyke keñamak aptemésesa Dios máxa ekha mey'asáxma Cristo, yakwayam enxoho hentemésesek negko'o nelpéwomo Dios, eñama senteméseso m'a Cristo.