2 CORINTIOS 13 - Lengua Sur (Enxet) Nuevo Testamento

Kéleyso énxet'ák tén han néxa ekxeyenma apwáxok Pablo

¹ Antanxo peyk katnehek kaxwo' sekteme meyk'a kéxegke. Sat kólánekxak ekyókxoho amya'a m'a apkelxéna enxoho apkánet énxet ektaha apkelweteykegkoho, apkántanxo esenhan.

² Elenxanakmók ko'o sekméso sekpeywa énxet'ák apkeláneykegko axta melya'asáxma nano' axta, tén han ma'a apyókxoho énxet'ák nak, keso sekha nak makhawo kéxegke, ekhawo sektahakxa axta seláneya kéxegke ekwokmo axta ánet sekteme meyk'a; megkapyósek sat alanok kéxegke sektaha sat makham meyk'a kéxegke,

³ hakte kélmenyék kéxegke kólwethok appakmeta Cristo eñama ko'o. Hakte háwe ekyelkamáxkoho m'a aptemésesamakxa nak cha'a kéxegke Cristo, wánxa agkok, apxekmósek eyke ektémakxa ekha apyennakte kélnepyeseksa kéxegke.

⁴ Nakso' axta eykhe aptéma máxa apyelkamákpoho Cristo kélyepetchesama axta aksok ektegyeso, wánxa agkok apheyk eyke makham eñama Dios apmopwána. Hawók nahan ektémakxa nak negko'o xa, egwákxók negko'o m'a ektémakxa nak apyelkamákpoho Cristo, wánxa agkok, anxek sat eyke negko'o xamo' Cristo yetlo Dios apmopwána yakwayam ampasmok kéxegke.

⁵ Kólyetsátekxa hana kéxegke kélagko' kéltémakxa, yakwayam enxoho kólya'ásegwomhok ekyennakwokmo kélteme megkólya'áseyam; nakso' kexaha ekyenná kélteme megkólya'áseyam; kólyekpelchaxkoho kélagko'. ¿Yagkólyekpelchágwokmok kéxegke apha kélwáxok Jesucristo? ¿Enxoho axta eykel'a kóllanak kéxegke apkeltamhókxa axta kóllának Dios?

⁶ Nakso' negko'o nentemesásak peya kólyekpelkohok kéxegke nenlaneya negko'o m'a nentamheykha nenteme nak seykha amya'a.

⁷ Nelmaxnakkek cha'a negko'o Dios, yakwayam enxoho megkóllanyek kéxegke aksok ekmaso xama enxoho; háwe eyke yakwayam anxekmóshok kéxegke ektakmalma negko'o nenlané nentamheykha, kéxegke yakwayam kóllának aksok eltakmela eyke, ñekhe máxa manláneya enxoho negko'o m'a nentamheykha nak.

⁸ Hakte magwanchek negko'o anlának xama aksok ektawáseykha m'a amya'a ekmámnaksoho nak, wánxa aksa cha'a nempasma negko'o m'a amya'a ekmámnaksoho nak.

⁹ Ekeso eñamakxa elpayheykxo nak cha'a negko'o egwáxok nentaha nelyelkamáxkoho, cham'a kéltaha enxoho cha'a kélyennakte kéxegke; anlenxanmohok sat nahan negko'o nelmaxnéseso kéxegke yakwayam enxoho katnegwók ekpéwomo kéltémakxa.

¹⁰ Ektáxésesek kéxegke s'e weykcha'áhak nak amonye sekteyánegweykekxoho kéxegke, yakwayam enxoho meynnaktésaxkók amha m'a sekmowána nak alának aksok kélnepyeseksa kéxegke, cham'a segkésa axta Wese' egegkok, háwe eyke yakwayam amasésesók kélteme megkólya'áseyam kéxegke, yakwayam alyennaktésesek kélteme megkólya'áseyam akke.

¹¹ Elyáxeg, amonye selwateso, emenyék kólmok ektakmeleykha kélwáxok, kóllenxánem kóltehek ekpéwomo kéltémakxa. Kólwaskápekxoho, kólteme megkólchexeymáxkoho, kólteme anhan meyke ektahakxa kélwáxok; exek sat kélnepyeseksa kéxegke Dios aptaha nak eñamakxa segásekhayo tén han meyke ektahakxa egwáxok.

¹² Kólpeykes cha'a kélmók yetlo ekpayheykekxa kélwáxok.

¹³ Apkeláphásesek ekxeyenma apwáxók kéxegke apyókxoho ẽlyáxeg'a apteme nak melya'áseyam.

¹⁴ Keytek sat cha'a kélnepyeseksa kéxegke m'a ektémakxa nak segméso naksa Wese' egegkok Jesucristo m'a segemleykekxoho nak, tén han ma'a Dios segásekhayo nak, exek sat nahan cha'a kélwáxók Espíritu Santo kélyókxoho kéxegke.