2 CORINTIOS 11 - Lengua Sur (Enxet) Nuevo Testamento

Pablo tén han seykha amya'a apkelmopwána amya'a

¹ Emenyék ko'o hellanha aksa kéxegke sektaha enxoho sekpeywa ektémakxal'a énxet ekyéháxma. Hellanha sat aksa.

² Hakte Dios keñamak ektémakxa nak selmeyeykha kéxegke. Ekpagkanchesek axta ko'o kéxegke yakwayam agkések wánxa xama kéltáwa, cham'a Cristo, emenyék nahan anaklók kéxegke nápakto' Cristo meyke ekyepetche xama aksok sempeysegkesamo nak, ektémol'a kelán'a étkok meyke kélteméseseykmohoxmal'a.

³ Wánxa agkok, eyekak ko'o kólyexanchesha nahan kéxegkáxa, ekhawo ektémakxa axta elyexancháseykencha'a yéwa ekha ekya'áseykegkoho Eva, eyekak nahan ko'o kólyensók ma'a ektémakxa nak megkólyenseyam ektakmela ekxeyenma kélwáxok ma'a Cristo.

⁴ Kóllanha aksa anhan cha'a kéxegke yetlo ekpayheykekxa kélwáxok énxet ektahakxa enxoho apwé apkeltennasé apwesey pók Jesús, mexnawok m'a neltennáseykencha'a axta negko'o kéxegke; yetlo kélmáheyo nahan cha'a kólmok takha' m'a espíritu mexnawo nak ma'a Espíritu kélxawáya axta kéxegke, tén han kólmok takha' m'a tásek amya'a megkaxnawo nak ma'a kélmoma axta takha' kéxegke.

⁵ Megkaxének cha'a ko'o ewáxok heyeykhágwomhok ma'a seykha amya'a ekha kéláyo nak, ektaha axta axayók apkelánteyapma.

⁶ Mowanchek eykhe ko'o sekya'asakxa sekpeywa, wánxa agkok yetneyk eyke sekya'ásegwayam ko'o. Cháxa nenxekmósamo nak cha'a negko'o kéxegke xa, eñama m'a ekyókxoho aksok nenlané nak.

⁷ ¿Sagkek enxeykel'a ko'o sektahakxa seltennáseykha kéxegke tásek amya'a mama nak ekyanmaga xama enxoho? Ektemesásexchék ko'o kónegók yakwayam enxoho kóltehek néten kéxegke.

⁸ Máxa selyementama selyakye ektemék ko'o m'a mók apchakneykekxexa nak, cham'a sekma axta selyakye segkéso, yakwayam apasmok kéxegke.

⁹ Yetneyk axta ko'o eyéméxchexa aksok sekha axta kélnepyeseksa kéxegke, axta eyke wanagkók helpasmok; hakte egkések axta ko'o aksok eyéméxchexa ẽlyáxeg'a apkelwokmo axta xa apkeleñama m'a Macedonia Elenxanakmók ko'o maltémo helpasmok kéxegke. Sat cha'a atnehek xa ektaha nak.

¹⁰ Nakso' ko'o ektemesásak sekya'ásegwokmo ekmámnaksoho eñama nak Cristo, nakso' nahan ektemesásak méko kawának hemasésesek eyémáxkoho nak cha'a sekpeywa sekxeyenma xa, cham'a ekyókxoho yókxexma nak Acaya.

¹¹ ¿Yaksak ektaha sektaha nak sekpeywa xa? ¿Momenyék enxeykel'a ko'o kéxegke? ¡Apya'ásegkok eyke Dios selámenyého ko'o kéxegke!

¹² Alenxanmohok sat ko'o sekteme m'a sektémakxa nak cha'a mama selyakye, yakwayam enxoho magwohok ma'a énxet'ák apketama nak yakwánxa etnehek keytek nahan se'e ektémakxa nak negko'o eleymáxkoho nelpakmeyesma nenxeyenma m'a nentémakxa nak cha'a;

¹³ seykha amya'a apkelmopwancha'a amya'a eyke m'a, elyexanchesha nahan cha'a énxet'ák, exnésakpohok cha'a m'a Cristo seykha amya'a apagkok nak.

¹⁴ Magkenatchesek eyke negko'o, hakte kaxnésaxkohok cha'a Satanás ma'a Dios apchásenneykha ekha nak elseyexma apagkok.

¹⁵ Ekeso eñamakxa magkenatchesa nak han cha'a elásenneykha nak Satanás apkelenxanakmo cha'a exnésakpohok ma'a énxet Dios apkelásenneykha nak, cham'a Dios aptaha nak appéwomo. ¡Kóllegásesagkohok sat eyke xa énxet'ák nak eñama m'a aksok apkeláneyak eyéméxko nak kóllegásesagkohok!

Pablo aplegeykegkoho neyseksa apteme seykha amya'a

¹⁶ Eltennásekxók makham kéxegke maltamhok kaxének apwáxok kélxama sektaha ko'o seyéháxma; xénchek agkok kélwáxok sektaha ko'o seyéháxma, helho atnehek apakmétek ko'o m'a aptémakxal'a epakmétek énxet ekyéháxma, yakwayam enxoho ko'o xa wawának keyxkohok sekpeywa axénaxchekxohok ahagko'.

¹⁷ Ektemék agkok ko'o eyeyxkoho sekpeywa xa ektaha nak, ekyéháxma katnehek sekpeywa ko'o, megkatnehek sekpeywa ko'o m'a ekleklamókxa nak apwáxok katnehek nempeywa Wese' egegkok.

¹⁸ ¡Keyxkohok sat nahan ko'o xa sekpeywa axénaxchekxohok ahagko', hakte apxámok énxet eleymáxkoho nak apkelpakmeyesma exének ma'a aksok apkepwagkexa nak elána'!

¹⁹ Kéxegke kéltaha ekha kélya'áseyak, wánxa agkok kélláneyha akke aksa cha'a yetlo kélmáheyo kóleyxhok apkelpeywa m'a énxet'ák elyéháxma nak.

²⁰ Kélláneyha aksa nahan cha'a kéxegke énxet'ák apteméseso nak máxa kélmomaxche, apkeltémo nak han cha'a kólpasmok, apkelyexancháseykha nahan cha'a kéxegke, elwanyohok nahan cha'a kéxegke, etekpagkasek nahan cha'a kélnát kéxegke.

²¹ Amegkawho eyke cha'a ko'o axének xa, ¡nelyelkáxkók negko'o yakwayam antehek xa ektaha nak! Keleyxkok agkok apkelpakmeyesma xa énxet'ák nak, keyxkohok sat nahan ko'o xa sekpeywa, nempeywa ekyéháxma eykhe xa ektéma nak.

²² ¿Hebreos ya xa énxet'ák nak? Ko'o anhan Hebreo. ¿Israelya xa énxet'ák nak? Ko'o anhan sektaha señama Israel. ¿Abraham aptawan'ák neptámenya xa énxet'ák nak? Ko'o neykhe anhan.

²³ ¿Cristo apkeláneykhaya xa énxet'ák nak? Ko'o anhan sekteme Cristo apchásenneykha, ekyeykhágweykmok eyke ko'o xa énxet'ák nak, máxa eykhe ektahak ko'o seyéháxma sektaha sekpeywa xa. Xámok axta ko'o sektamheykha, maxnawok xa énxet'ák nak, xámchek nahan sẽlheseyam sẽlpextétamakxa, kaxnók xa énxet'ák nak. Hágkaxwe anhan amatñaha, kaxnók xa énxet'ák nak, hágkaxwe nahan cha'a kagketagkohok wátsapok ko'o.

²⁴ Cinco anhan weykmók señasáseykegkoho énxet'ák judíos ekweykmoho cha'a treinta y nueve selyekpexcheteykha.

²⁵ Antanxo anhan weykmók seltekpageykha yámet, xama axta eyke selyetné meteymog, antanxo nahan weykmók ekweywéyak yántakpayhe neyseksa sekxega cha'a ko'o. Xegkásók axta anhan aweywagkok ma'a sekmeyncha'a axta yegmen xama axta'a, tén han xama ekhem neyseksók wátsam ekwányam.

²⁶ Hágkaxwe anhan amhagkok mók nekha. Ekwet'ak axta ko'o setnegweykmohoxma kañe' wátsam, tén han setnéseseykmohoxma énxet'ák apkelmenyexma nak, tén han sekwetaya setnéseseykmohoxma énxet'ák sekpeywomo xamo' nak, tén han setnéseseykmohoxma pók énxet'ák nak. Ekwet'ak axta anhan setnegweykmohoxma nepyeseksa tegma apwányam, ekwet'ak axta anhan setnegweykmohoxma yókxexma, tén han ma'a neyseksa wátsam ekwányam nak, tén han sekwetaya setnéseseykmohoxma m'a énxet'ák apkeltemesásamap axta ekha melya'áseyam.

²⁷ Xámok axta anhan sektamheykha, eyampósamok axta anhan; axta anhan atyenmak cha'a; eklegeykegkók axta anhan meyk seyakhe, tén han hem seyakhe; axta anhan atók cha'a sekto; Eklegeykegkók axta nahan neyseksa apmopsamáge, meyke apáwa axta nahan etneyk.

²⁸ Yetneyk nahan setnamakxa nak cha'a ko'o, ekyókxoho ekhem cha'a ko'o ekyetnakhasamo ewáxok ekyókxoho apchakneykekxexa nak.

²⁹ Apháxekpek agkok xama énxet, wahaxaxchek nahan ko'o xa. Kéltegkesek agkok nahan xama énxet, helapwók cha'a ko'o.

³⁰ Yetneyk agkok ko'o xama aksok segkéso eyeymáxkoho sekpeywa axének, keyxkohok sat ko'o sekpeywa axének ma'a ektémakxa nak sekyelkamáxkoho.

³¹ Apya'ásegkok eyke sektéma cha'a ko'o ekmámnaksoho sekpeywa m'a Dios Jesucristo Wese' egegkok Apyap, cham'a ekpayhawo nak cha'a kóltemésesek apcheymákpoho.

³² Apchánchesakmek axta sẽlpextétamo átog nentaxnamakxa nepyeseksa tegma apwányam wese' apchásenneykha apkeláneykha yókxexma apkelanésama nak cha'a aksok ma'a wese' apwányam Aretas, yakwayam enxoho hemok ko'o, cham'a sekha axta ko'o tegma apwányam Damasco.

³³ Wánxa agkok, hówenak apxagkok axta eyke eyakxegkásak énxet'ák setekkesa xama átog étkok. Cháxa setnahakxa axta ko'o sekxegánegkesa m'a énxet'ák apmáheyo axta hemok.