2 CORINTIOS 10 - Lengua Sur (Enxet) Nuevo Testamento

Pablo apchátegmowéyak amya'a apxénamap

¹ Ko'o Pablo, eltamhok ko'o kaxének kélwáxok kéxegke ektémakxa axta ménnaktésamakpoho Cristo, tén han ektémakxa axta segásekhayo. Kólxének cha'a kéxegke sektaha ko'o ekyelkamáxkoho ewáxok sekha enxoho kélnepyeseksa kéxegke keñe anhan kólxének cha'a keynnakmakha sekpeywa sekha enxoho makhawo.

² Ekwákxeyk sat agkok kélhágkaxa sekteyánegwákxoho enxoho kéxegke, eltamhok ko'o mehelyateyagkók agkések sekpeywa ekyennakte m'a énxet'ák senxeyenma nak eñama nenlané m'a aksok apkeláneyol'a énxet, ewanchek ko'o agkések sekpeywa ekyennakte xa énxet'ák nak.

³ Nakso', negko'o nentaha énxet neleñama keso náxop, akke ólnápéxchek negko'o ektémol'a elnapakpok énxet apheykha nak keso náxop.

⁴ Háwe eleñamakxa agko' náxop nelmeykha nelmeykencha'a nak negko'o, Dios apmopwána eyke negmeykha negko'o, ekmowána nak kamassesók ma'a aksok ekhaxtamoma nak negyáwa negko'o. Cháxa ektémakxa nak cha'a negko'o negmaseseykmo amya'a megkamámnaksoho xa,

⁵ tén han ma'a ekyókxoho ektémakxa nak eleymáxkoho apkelpakmeyesma énxet'ák megkahayol'a cha'a kólyekpelchágwók Dios. Nentemésesek negko'o elmomaxche m'a ekyókxoho ektémakxa nak elchetamso apwáxok énxet keso náxop, yakwayam enxoho katnehek elyaheykekxoho Cristo.

⁶ Peyk nahan anlegásesagkohok negko'o m'a apyókxoho énxet melyaheykekxoho nak, cham'a kéltaha enxoho ekmámnaksoho kélyaheykekxoho kéxegke.

⁷ Kóllano hana kéxegke ektémakxa. Xénchek agkok apwáxok enxama aptaha apkeñama nepyeseksa Cristo énxet'ák apagkok, kéméxchek nahan kaxének apwáxok nentaha negko'o xa Cristo énxet'ák apagkok.

⁸ Ekyeykháseykmók agkok ko'o eyeymáxkoho sekpeywa axének ma'a ektémakxa nak ekha sẽlyaheykekxoho, méko eyke katnehek semegkasakxa; hakte egmések axta Wese' egegkok sẽlyaheykekxoho yakwayam ólyennaktésesok apteme melya'áseyam énxet'ák, háwe eyke yakwayam agmasésesók ma'a ektémakxa nak ekha melya'áseyam.

⁹ Momenyék ko'o kaxének kélwáxok sekmoko alyegwakkasek kéxegke ektahakxa nak sektáxéseso weykcha'áhak.

¹⁰ Yetneyk énxet apxeyenma nak sekmésama cha'a sekpeywa ekyennakte, tén han magweyseykekxo cha'a sekpeywa, cham'a sektáxéseso nak cha'a weykcha'áhak seyaphásesama kéxegke, keñe exnek cha'a sekwokmo enxoho sekyókxoho m'a, méko hetnehek seyáyo, kawanyexkohok cha'a sektahakxa enxoho sekpeywa.

¹¹ Enxet apteme enxoho appeywa xa, kéméxchek ey'asagkohok nentémakxa nak cha'a negko'o nempeywa, tén han ma'a nentémakxa nak cha'a nentáxéseso weykcha'áhak negha enxoho makhawo, sat nahan antehek negko'o negheyncha'a enxoho kélnepyeseksa kéxegke xa ektaha nak.

¹² Nakso' negko'o magmáheyo aghésaxkohok, esenhan agyetchesaxkohok ma'a énxet'ák eleymáxkohol'a apkelpakmeyesma exénakpekxohok apancha'awo'. Elyéháxma eyke aptamhágkok xa énxet'ák nak, hakte apkelyetsáteyak apancha'awo' aptamhágkok ma'a apkeltémakxa nak, cham'a aphésamo nak cha'a mók apkeltémakxa.

¹³ Magyeykhasagkók sat eyke negko'o eleymáxkoho nelpakmeyesma ólxénaxchekxohok egagko'. Hakte Dios aptaha sempekkencheso cha'a néxa ektémakxa nak nentamheykha. Eg'awók axta anhan negko'o Dios ólwomhok kélhágkaxa kéxegkáxa tegma apwányam Corinto.

¹⁴ Ekeso eñamakxa magyeykhágwokmoho cha'a negko'o m'a ekwánxa axta sempekkencheso néxa Dios, agyeykhágwomhok axta negko'o ekwánxa sempekkencheso néxa Dios, cham'a magheykencha'a enxoho kélnepyeseksa kéxegke nano' axta. Negko'o axta nenso egmonye'e kélnepyeseksa kéxegke amya'a ektakmela eñama nak Cristo.

¹⁵ Megkeyxkók cha'a negko'o nelpeywa anxének ma'a pók énxet'ák nak apkeltamheykha. Magyeykhágwokmohok cha'a negko'o m'a ekwánxa axta sempekkencheso néxa Dios. Egmenyék eyke negko'o agyánchesamhok nentamheykha kélnepyeseksa kéxegke neyseksa kélyancháseyak kélteme megkólya'áseyam, akke cha'a agyeykhágwokmohok ma'a sempekkencheso axta néxa Dios.

¹⁶ Egmenyék nahan negko'o kapayheykxak ektémakxa nak nentamheykha tén han anlegaksek tásek amya'a ekweykmoho m'a makhawók agko' kélheykegkaxa nak kéxegke, wánxa agkok, magmenyék eyke negko'o óltemeykha m'a apkeltamhágkaxa enxoho pók énxet'ák, yakwayam enxoho megkaleyxkok negko'o nelpakmeyesma anxének ma'a aptekkeso nak aptamheykha pók énxet'ák.

¹⁷ Apmokók agkok keyxkohok appeywa exénakpekxohok apagko' xama énxet, kéméxchek keyxkohok appeywa exének ma'a Wese' egegkok.

¹⁸ Hakte háwe énxet eyeymáxkoho appeywa exénakpekxoho apagko' ma'a ekpayhawo nak kalkohok kélwáxok aptémakxa, akke m'a énxet apxeyenma nak Dios aptaha ektakmela aptémakxa.