1 TIMOTEO 6 - Lengua Sur (Enxet) Nuevo Testamento

¹ Enxet'ák ektaha nak apkelmomap kéltemesáseykha aksa, kéméxchek kaxének kélwáxok ekpayhawo kóltehek kéláyo wese' kélagkok, yakwayam enxoho megkaxénaxchek ekmaso Dios apwesey, tén han ma'a nelxekmowásamáxche eñama nak Dios.

² Yetneyk agkok énxet apmomap kéltemesáseykha aksa apteme wese' apagkok ma'a wese' apteme nak mey'áseyam Cristo, kéméxchek meyensemek apteme apcháyo, megkaxének apwáxok ewanyohok eñama m'a aptémo xamo' nak mey'áseyam. Kéméxchek eyánchesamhok aksa aptakmelchesamo aptamheykha, hakte kelwese'e melya'áseyam Cristo m'a kéltakmelchesesamol'a kélláneso aksok, ẽlyáxeg segásekhayo nahan ma'a. Eltennaha s'e, elxekmós nahan apnámokkok:

Ekmámnaksoho ekxákma aksok egagkok

³ Yetneyk agkok énxet apkelxekmóso m'a nelxekmowásamáxche mók ektémakxa nak, megkaxnémo enxoho ekxeyenma apwáxok se'e ektémakxa nak negko'o nelxekmowásamáxche ektakmela eñama nak Wese' egegkok Jesucristo, cham'a megkaxnémo nak han apwáxok ektémakxa nak negko'o nelxekmowásamáxche eñama s'e negyetlama nak ektémakxa nelpeykesamo Dios,

⁴ énxet eyeymáxkoho apwáxok xa aptéma nak, mey'ásegkok nahan aksok. Mopmenyék nahan eyensók apkelátegmomap pók exének ektémakxa m'a amya'a kélpeykáseykekxa nak ektémakxa. Cháxa keñamak ekteyapma cha'a nelyásekáseykha xa, tén han ma'a nexpanchásamáxche nak, tén han ma'a negwanyeykha egmók nak, tén han ma'a negaye nak hentemésesamhoxma énxet,

⁵ tén han ma'a megkamassegwayam nak apkelyamatchásamap nepyeseksa énxet ekmaso nak elchetamso apwáxok, melya'áseyak nak ma'a amya'a ekmámnaksoho nak, yának nahan cha'a kañamak senxámáseso aksok egagkok ma'a ektémakxa nak nelpeykesamo Dios.

⁶ Nakso' ekteme senxámásesamo aksok egagkok eleñama néten xa ektémakxa nak nelpeykesamo Dios, akke wánxa exkak ma'a énxet ekpeykáseykekxa nak apwáxok aksok apagkok ekyetnakxa enxoho.

⁷ Axta ansantámhok negko'o xama aksok keso náxop, mansakxók sat nahan xama aksok.

⁸ Yetneyk agkok negko'o nentawakxa, tén han ma'a yakwayam nak antaxnekxa', kéméxchek kapeykásekxak aksa egwáxok negko'o ekyetnakxa enxoho aksok egagkok.

⁹ Enxet apmopmenyého nak etnehek ekxákma aksok apagkok melenmaxakpek ma'a ekyekkónma nak, máxa nahan katnehek kelhanma ekma kamok ma'a apmopmenyého nak elának ekyókxoho ektémakxa nak aksok segyeykesamo nak exma, tén han ma'a sẽtsagkasamo nak, cham'a étsagkasamol'a énxet, elya'asamol'a nahan ma'a sẽlmaseseykenxa nak.

¹⁰ Hakte cham'a negásekhayo nak selyakye ekteme ekteyapmakxa ekyókxoho nentémakxa ekmaso nak; Yetneyk énxet apkelwáteseyam nak apteme mey'áseyam eñama apchásekhayo m'a selyakye, apkellegasásamákpoho apancha'awo' nahan aptamheykegkok.

Ektakmela nenlenxanyam ektémakxa nak magya'áseyam

¹¹ Xép, aptaha nak Dios énxet apagkok, étnakhes ekyókxoho xa ektéma nak. Etne ekpéwomo aptémakxa, etne appagkanchásamap Dios, etne mey'áseyam, tén han apchásekhayo, tén han apkelenxányam, etne nahan megkeymáxkoho apwáxok.

¹² Elenxanmoho apwaskápeykekxoho eñama nak ma'a ektémakxa nak mey'áseyam. Neygyoho aksa kagketek xép ma'a ekyennakte egnenyek megkamassegwayam nak, axta keñamak apwóneykencha'a exchep Dios xa, ékeso eñamakxa appékásawo axta apxeyenma exchep ektémakxa mey'áseyam nápakta'awo' ma'a apyókxoho énxet ektaha axta apweteykegkoho.

¹³ Ekmések ko'o sekpeywa exchep nápakto' Dios, aptaha nak apméso elyennakte ekyókxoho aksok ekhágko nak, tén han nápakto' ma'a Jesucristo, cham'a appékáso axta appeywa nápakto' Poncio Pilato apxénákpekxoho apagko', eltamhok ko'o

¹⁴ elyahakxohok ma'a sektahakxa nak seyáneya exchep, meyke apxegánegkeseyam xa sektahakxa nak seyáneya, yakwayam enxoho méko kawának kaxénchásekxohok aptémakxa exchep. Etne sat cha'a xa ektaha nak, ekwokmoho apwakto Wese' egegkok Jesucristo.

¹⁵ Esawhohok sat elának Dios xa, cham'a ekwokmo sat ekhem, hakte Dios apteme apwánxa xama Wese' aptakmalma, apteme nahan Wese' apwányam nepyeseksa m'a kelwese'e apkelwányam nak keso náxop.

¹⁶ Apwánxa nahan xama megyetsapma, cham'a apha nak neyseksa elseyexma megkólmowána nak kólyepetchegwomhok. Meteyk nahan xama énxet enxoho, mopwanchek nahan éta'. ¡Apagkok sat cha'a etnehek Dios ma'a ektémakxa nak kéláyo, tén han ma'a ektémakxa nak apmopwána! Katnahagkok sat.

¹⁷ Yána sat metnehek eleymáxkoho apwáxok énxet'ák ekxákma nak aksok apagkok keso náxop, yána sat megyáseneykxék ma'a ekxákma nak aksok apagkok, hakte kamassegwomhok cha'a xa. Akke tásek kólásenneykxak ma'a Dios segyeykháseseykmoho nak segméso ekyókxoho aksok yakwayam agmaha yetlo ekmátsa egwáxok.

¹⁸ Yána sat etnehek ektakmela apkeltémakxa xa énxet'ák nak, yána sat nahan kayeykhágwomhok apkeláneyak ma'a apkeltamheykha ektakmela nak, tén han etnehek memyagweykekxa egkések aksok pók, cham'a ekyetnakxa enxoho aksok apagkok.

¹⁹ Keñe sat katnehek ekmámnaksoho yakwayam elxawagkok ekxákma aksok apagkok egmonye sat eñama xa apkeltamheykha ektakmela nak. Elxawagkok sat nahan ekyennakte apnenya'ák megkatnegwayam enéxa.

Ektemegwánxa néxa kélméso kélpeywa Timoteo

²⁰ Xép, Timoteo, etakmelches ma'a aptamheykha apxaka axta exchep. Nágyeyxho aksa exchep ektémakxa nak amya'a eñama keso náxop ektaha nak han mékoho, nágyeyxho nahan ma'a kélya'ásegwayam megkamámnaksoho ekxénamaxkoho nak ektaha negya'ásegwayam.

²¹ Hakte nápakha énxet'ák apxeyenmak ekyetna xa apkelya'ásegwayam nak, apyetnakháseykmek nahan apteme melya'áseyam. Wese' egegkok sat etnehek apméso naksa kéxegke m'a ektémakxa nak segemleykekxoho.