1 TIMOTEO 5 - Lengua Sur (Enxet) Nuevo Testamento

Nentémakxa nentakmelchásamáxkoho nepyeseksa énxet'ák apteme nak melya'áseyam

¹ Ná egkes aksa appeywa ekyennakte énxet apwányam nak, wánxa agkok, ey'ásesagkoho aksa ekhawo aptemésesamakxal'a apyap; etne nahan elána' wokma'ák ma'a aptemésesamakxal'a elának apkelyáxeg apancha'awo nak.

² Etne elána' kelán'ák elwányam ma'a aptemésesamakxal'a egken, etnéses nahan kelán'a étkók ma'a aptemésesamakxal'a elának apkelyáxeg kelwán'ák nak, meyke étsapma apnenyek.

³ Epásem tampe' meyke nak ekya'awánxa yakwayam kapasmok,

⁴ wánxa agkok, yetneyk agkok étchek kelán'a tampe', esenhan ekha enxoho atawan'ák, kéméxchek sekxo' elya'asagkohok ektémakxa neltakmelcheso ekheykha enxagkok xa étchek nak, tén han xa atawan'ák nak, tén han exnéshok mók ma'a ektémakxa axta apchásekhayo apyepmeyk, hakte cháxa ektakmela antehek xa, kalkohok nahan apwáxok Dios antehek.

⁵ Tampe' ekteme enxoho axakko' agko', katnehek cha'a eyásenneykekxa Dios, megkayensemek nahan ekteme nempeywa nelmaxnagko, kalmaxnak Dios ekyókxoho ekhem tén han ekyókxoho axta'a.

⁶ Keñe m'a tampe' ekyetleykekxa enxoho aksok ekyespagko nak, máxa katnehek étsapma neyseksa ekyenneykha empehek.

⁷ Etne sat yának tampe' xa tén han ma'a námokkok, yakwayam enxoho megkólxénchásekxók ektamheykegkaxa.

⁸ Negko'o megkaxéneykha enxoho egwáxok nenteme egnámokkok, ekyagwánxa agkok megkaxénmakha egwáxok ma'a ekheykha nak enxagkok, máxa katnehek negyensakmo enxoho nenteme magya'áseyam, asagko' agko' nahan katnehek nentémakxa, manxohok ma'a énxet'ák metné nak melya'áseyam.

⁹ Kéméxchek cha'a kanaktáxesaxchek elwesey tampe' ekweykmo nak sesenta apyeyam agkok, cham'a ekteme axta wánxa xama atáwa.

¹⁰ Kéméxchek nahan kólya'asagkohok ektakmela axta ektémakxa, tén han ma'a ektakmela enxoho éktegkeso étchek, tén han ma'a ekteme enxoho elápeykha ektaha apkelwayam axagkok, tén han ma'a elyenyesesamo enxoho apmagkok énxet'ák apteme nak melya'áseyam, tén han ma'a ekpasmoma enxoho m'a énxet'ák apkellegeykegkoho nak, tén han elenxáneykmoho enxoho elané m'a ekyókxoho ektémakxa nak nentamheykha ektakmela.

¹¹ Wánxa agkok, nágkóltáxeses aksa ekwesey tampe' yáma étkok enxoho, kayensamok katnehek megkay'áseyam Cristo, eñama aksok ekyespagko, hakte kámenyéhok kategyekxak makham atáwa.

¹² Eksexnánemaxche agko' eyke katnehek ekyensakmo enxoho elané m'a ektémakxa axta ekpeywa eltennasama Dios.

¹³ Kamhagkok nahan cha'a nátegma, megkamáheyo katneykha nahan katnekxa', háwe ekwánxa agkok ma'a megkamáheyo nak katneykha, wánxa agkok, eltennágwayam nátegma nahan katnehek, ñohok nahan katnehek ma'a ektahakxa enxoho amya'a, kaxénwók aksa ma'a megkapayhawo nak kaxének.

¹⁴ Ekeso eñamakxa seltamho nak ko'o kategyekxak atáwa tampe' yáma étkok enxoho, katnahagkok agkok naklaw'ák ma'a, katnehek nahan eltakmelcheso tegma, tén han megkalanyek ma'a ektémakxa ekmaso nak, yakwayam enxoho megkeytek yakwánxa etnehek hẽlyamatchesha m'a sẽlenmexeykha nak, negko'o nenteme nak magya'áseyam.

¹⁵ Mók xama tampe' nahan yensakmok ekteme megkay'áseyam, keñe ekyetlákxo m'a Satanás.

¹⁶ Yetneyk agkok xama kelán'a ekteme enxoho megkay'áseyam, ekteme enxoho tampe' m'a námokkok nak, kéméxchek kapasmok xa tampe' nak, yakwayam enxoho megkaxámásesek aptahakxa m'a énxet'ák apkeltamheykha nak kélakneykekxexa; keñe sat elepwának epasmok tampe' m'a énxet'ák apkeltamheykha nak kélakneykekxexa, cham'a tampe' ektaha nak meyke ekya'awánxa yakwayam kapasmok.

¹⁷ Enxet'ák apkelwányam ektaha nak aptakmelchesamo apkelmeykha apnámokkok kélakneykekxexa, kéméxchek keytek ekyawe kéláyo, ekyagwánxa agkok ma'a énxet'ák apkeltenneykha nak tásek amya'a, cham'a apkelxekmósamol'a apnámokkok.

¹⁸ Hakte temegkek eknaktáxésamaxche weykcha'áhak se'e: “Nágkóltetches aksa átog táma weyke yágkelwána kéltemesáseykha kélaptékxo enxoho aksok kélcheneykekxa.” Temegkek nahan eknaktáxésamaxche s'e: “Enxet ektaha nak aptamheykha, payhawók exkak ekyanmaga aptamheykha.”

¹⁹ Nágyeyxho aksa exchep kéltekkesáseykha nak apwesey xama énxet apkemha apmonye nak kélakneykekxexa, mepasma enxoho apkánet énxet esenhan apkántanxo ektaha apweteykegkoho.

²⁰ Enxet'ák ektaha nak melwáteseyam apkelané mey'asáxma, kéméxchek xép egkések appeywa ekyennakte nápakta'awo' apyókxoho énxet'ák, yakwayam enxoho anhan yeyk ma'a apyókxoho énxet'ák nak.

²¹ Ekmések ko'o sekpeywa exchep nápakto' Dios, tén han nápakto' Jesucristo, tén han nápakta'awo' ma'a Dios apkelásenneykha kélyeseykha nak, seltamho elának se'e seyánayakxa nak etnehek meyke apteméseso apyeykhamap pók elanok énxet, tén han seltamho exnéshok mók ma'a aptemésesakxa enxoho énxet.

²² Ná epekhaksoho aksa exchep enegkenek apmék apkátek xama énxet enxoho yakwayam enxoho megkawakxók xép xa ektémakxa nak mey'asáxma pók énxet. Etnakhes ma'a ekyókxoho ekmaso nentémakxa nak.

²³ Ná eyen aksa wánxa yegmen, eyen sat nahan ketsék vino, hakte káskohok cha'a exchep apwáxok.

²⁴ Tásek cha'a katnehek ekwetamaxche ektémakxa melya'asáxma nápakha énxet'ák amonye enxoho apkelmaheyak ma'a yakwánxa enxoho kóltehek kélyekpelchémo, axayók sat eyke kataxchek ektémakxa melya'asáxma m'a pók énxet'ák nak.

²⁵ Hawók nahan ektémakxa m'a nenlané nak nentamheykha ektakmela, tásek katnehek ekwetamaxche. Keñe m'a aksok ektakmela nenlané megkótemaxche nak, yawanchek sat cha'a kakpósaxkohok.