1 TIMOTEO 2 - Lengua Sur (Enxet) Nuevo Testamento

Nelmaxnéseso apyókxoho énxet

¹ Eyeynókxa, eltennásek ko'o kéxegke seltamho kólmaxnésesek apyókxoho énxet'ák, kólána epasmok Dios, kólmaxnéses nahan yakwayam enxoho elmeyók Dios, kólmés nahan ekpayheykekxa kélwáxok Dios eñama appasmo m'a apyókxoho énxet'ák nak.

² Kéméxchek kólmaxnésesek kéxegke apyókxoho kelwese'e apkeláneykha nak apchókxa, tén han ma'a apyókxoho apkelámha apmonye'e nak, yakwayam enxoho katakmelhok negheykha, tén han megkatnegwomóxma negheykha, tén han antehek nempagkanchásamáxche egagko' ma'a Dios, tén han antehek ektakmela nentémakxa nápakta'awo' énxet'ák.

³ Cháxa ektakmela nak antehek xa, kalkohok nahan apwáxok Dios antehek xa.

⁴ Hakte apmenyék Dios ólwagkasaxchek teyp negyókxoho nak, apmenyék nahan agya'ásegwók ma'a amya'a ekmámnaksoho nak.

⁵ Hakte wánxa xama Dios, wánxa nahan xama énxet apmopwána nak épetchásekxak Dios apyókxoho énxet'ák: cham'a Jesucristo.

⁶ Hakte apmeyáseykpók axta apagko' Jesucristo yakwayam emátog yakwayam etnehek segyanmaga eñama nelwagkásamáxche teyp negyókxoho nak, cham'a senxekmósama axta Dios ekwokmo axta ekhem yakweykenxa katnehek ma'a aptémakxa axta appeywa.

⁷ Axta keñamak selyésáxko axta ko'o yakwayam atnehek seltenneykha tásek amya'a, tén han atnehek seykha amya'a, eyáneyaxchek axta anhan ko'o alxekmósek énxet'ák metnaha judíos ma'a eñama nak magya'áseyam, tén han ma'a amya'a ekmámnaksoho nak. Nakso' xa sektahakxa nak ko'o sekpeywa; háwe sekmowána amya'a.

⁸ Emenyék ko'o etnahagkok nempeywa nelmaxnagko énxet apheykha nak ekyókxoho yókxexma, tén han elya'aksek néten apmék yetlo eyáxñeyo apwáxok nápakto' Dios, meyke m'a nenlo nak, tén han meyke m'a nelátegmomaxche nak.

⁹ Emenyék ko'o kawagkohok elnáxameykha kelán'ák yetlo ektakmelchesamo elnáxameykha, meyke m'a ekyeykhásamáxkoho nak elnáxameykha, tásek kólennáxamha, háwe eyke yetlo m'a kélyeykháseykegkoho nak kélnáxegkáseykha kélwa', háwe nahan yetlo m'a sawo ekyátekto elyenmál'a, tén han ma'a aksok ekmomnáwa nak, esenhan ma'a apáwa apkelmomnáwa nak,

¹⁰ tásek katnahagkok ektakmela ektémakxa kelán'ák, ekhawo m'a eyéméxchexa nak katnehek kelán'ák ektaha nak ekpagkanchásamáxche Dios.

¹¹ Kéméxchek kalwanmeyagkok aksa kelán'ák keyxhok ma'a nelxekmowásamáxche nak, yetlo megkátegmoweyak ma'a ektahakxa enxoho amya'a.

¹² Momenyék ko'o kalxekmósek kelán'ák énxet'ák ma'a kañe' apchakneykekxexa nak, momenyék nahan katnehek ekyeykhágweykmoho énxet'ák apkelennay'a nak; emenyék ko'o kalwanmeyagkok aksa kelán'ák,

¹³ hakte apmonye axta apkelané Dios Adán keñe axta axayo' apkelané Eva.

¹⁴ Háwe axta kélyexancháseykha Adán, kelán'a axta eyke kélyexancháseykha, xama axta kélyexancháseyncha'a Eva, kelanak axta megkay'asáxma.

¹⁵ Kalwagkasaxchek sat eyke teyp kelán'ák eñama ekweté étchek, cham'a elenxanakmoho enxoho ekteme megkalya'áseyam yetlo elya'áseykegkoho, tén han elenxanakmoho enxoho m'a eyásekhayo nak, tén han elenxanakmoho enxoho ekteme ekpagkanchásamáxche m'a Dios.