1 TIMOTEO 1 - Lengua Sur (Enxet) Nuevo Testamento

Ekxeyenma egwáxok

¹ Ko'o Pablo, sekteme Jesucristo seykha amya'a apagkok, sektaha nak han selapháseykha eñama apkeltémo Dios segwagkasamo nak teyp, tén han apkeltémo m'a Jesucristo Wese' egegkok, aptaha nak han negayókxa negko'o.

² Timoteo, ektáxésesek xép se'e weykcha'áhak nak, aptaha nak máxa hatte eñama sektémo xamo' may'áseyam. Emenyék ko'o etnehek apméso naksa exchep Dios Egyap, tén han Cristo Jesús ma'a ektémakxa nak segemleykekxoho, tén han egkések ma'a ektémakxa nak ektakmeleykha apwáxok henlano', tén han keytek xép ma'a meyke ektahakxa egwáxok eñama nak Dios.

Sẽléso nelxekmowásamáxche megkamámnaksoho

³ Exnekxa' sat xép Efeso, ekhawo sektahakxa axta seyáneya amonye sekmaheyak ma'a Macedonia, yakwayam enxoho yának melxekmósek nápakha énxet'ák ma'a nelxekmowásamáxche megkamámnaksoho nak,

⁴ yakwayam enxoho anhan yának megyeyxók énxet'ák ma'a amya'a kéltenneykha naksal'a, tén han yának kamaskok apkelanawo énxet'ák ma'a ekwenakte kélnaktáxeséyak axta apkelwesey ẽlyepmeyk nano'. Katekkeshok cha'a apkelátegmomap énxet xa amya'a nak, mehempasmek nahan yakwayam agmok takha' yetlo magya'áseyam ma'a yakweykenxa nak etnehek Dios.

⁵ Emenyék axta ko'o keytek nelásekhamaxkoho sektaha seyáneya exchep xa, cham'a negásekhayo eñama nak nenteme eyáxñeyo egwáxok, tén han eñama m'a megkaxénweykekxohol'a egwáxok nentémakxa, tén han eñama m'a magya'áseyam ekmámnaksoho nak.

⁶ Nápakha énxet'ák nahan apkelyensakmok xa, kelxegánegkásak ma'a megkaxnémo nak mók apkelpakmeyesma, cham'a apkelpakmeyesma ektaha nak mékoho agko'.

⁷ Apmenyék etnahagkok apkelxekmóso apnámokkok ma'a apkeltémókxa nak antehek Dios, neyseksa melya'áseyak ma'a apkeltémakxa nak cha'a apkelpakmeyesma xa énxet'ák nak, melya'ásegkok nahan ma'a ektémakxa nak apkelxekmóso, apkenagkama nak katnék ekmámnaksoho.

⁸ Negya'ásegkok negko'o ektaha ektakmela xa segánamakxa nak, cham'a negakhásáso enxoho nenlana m'a eltémókxa nak antehek.

⁹ Tásek kaxének egwáxok megkóllánésama segánamakxa m'a énxet ektakmela nak apkeltémakxa, akke kéllánesók segánamakxa yakwayam kañásesagkohok ma'a énxet'ák apkelenmexeykha nak segánamakxa, tén han ma'a meyke nak apkelyaheykekxoho, tén han ma'a ekmaso nak apkeltémakxa, tén han ma'a énxet'ák melya'asáxma nak, tén han ma'a énxet'ák metné nak apcháyo Dios, tén han ma'a énxet'ák metné nak apcháyo ektémakxa nak apkelpeykesamo énxet, tén han ma'a énxet'ák apkennápeykekxa nak apyepmeyk tén han ma'a enchána, tén han ma'a apyókxoho énxet'ák apchakhé nak pók,

¹⁰ tén han ma'a énxet'ák apkeláneyak nak ekmaso nentémakxa mansexta, tén han ma'a énxet'ák aphésamo nak apkeltémakxa kelán'a, tén han ma'a énxet'ák apkexeykekxa nak apnámokkok aptegyeykekxa selyakye yakwayam kóltemésesha aksa, tén han ma'a énxet'ák apkelmopwancha'a amya'a nak, tén han ma'a énxet'ák apteméseso nak ekmámnaksoho m'a amya'a megkamámnaksoho nak, cham'a énxet'ák apkeláneykegkohol'a m'a enmexma nak nelxekmowásamáxche ekmámnaksoho nak.

¹¹ Cháxa nelxekmowásamáxche sẽlxekmósama nak tásek amya'a ektaha nak amya'a ektakmela xa, cháxa seyásennagkama nak ko'o Dios aptakmalma añeksek xa.

Negméso ekpayheykekxa egwáxok eñama segemleykekxoho Dios

¹² Ekmések cha'a ko'o ekpayheykekxa ewáxok Wese' egegkok Jesucristo, aptaha axta segkéso sekyennakte, hakte xeyenmék axta apwáxok Dios mayensemek sektamheykha, etnésesek axta nahan ko'o apchásenneykha,

¹³ neyseksa axta eykhe enmexeykha sekpeywa Dios, ekyakmáseykha axta anhan, ekwanyeykha axta anhan, wánxa agkok, axta eyke eyakmagkásekxak sektémakxa ko'o Dios, hakte matnamakxa axta makham ko'o may'áseyam ma'a, axta anhan ay'áseykegkok ko'o m'a aksok seláneya axta.

¹⁴ Cháxa aptahakxa axta Wese' egegkok seyanchesáso segkésa aksa m'a ektémakxa nak segemleykekxoho, egkések axta may'áseyam, tén han ma'a negásekhayo ekyetnamol'a nenteme nak negyepetcheyo Cristo Jesús.

¹⁵ Nakso' agko' se'e, kéméxchek nahan magya'ásók negyókxoho: cham'a apwaya axta Cristo Jesús keso náxop yakwayam elwagkasek teyp énxet'ák melya'asáxma nak, ko'o eyke sekteme sémha emonye may'asáxma nepyeseksa apyókxoho énxet'ák.

¹⁶ Ekeso eñamakxa meyakmagkáseykekxo nak Dios sektémakxa ko'o: yakwayam enxoho kañék ko'o ekwetamaxche m'a ekyókxoho ektémakxa nak mepekhésamap Jesucristo. Cháxa setnamakxa axta ko'o xa yakwayam enxoho elwetak ma'a énxet'ák peya nak han etnehek melya'áseyam Cristo, yakwayam enxoho étak ekyennakte apnenya'ák megkatnegwayam enéxa.

¹⁷ ¡Antehek hana negáyo Wese' apwányam memassegwayam nak, aptaha nak megyetsapma, aptaha nak han metémap, aptaha nak han wánxa xama Dios, óltemésesek nahan apcheymákpoho! Katnahagkok sat.

^18-19 Xép sektemegwayam Timoteo, eyásennakkek xép yakwayam elnapakpok ektakmela kempakhakma yetlo mey'áseyam tén han yetlo m'a megkaxénweykekxoho nak apwáxok aptémakxa, ekhawo m'a ektémakxa axta amya'a eñama Dios apxénamakpo exchep, cham'a nano' axta. Nápakha énxet akke aptawáseyha apteme melya'áseyam eñama melyetleykekxa m'a ektémakxa nak elchetamso apwáxok ektakmela.

²⁰ Cháxa ektahakxa axta Himeneo xa, tén han ma'a Alejandro, cham'a sekmésa axta ko'o Satanás, yakwayam enxoho megkanmexmakha cha'a appeywa Dios.