1 SAN JUAN 5 - Lengua Sur (Enxet) Nuevo Testamento

Negmalanma ektémakxa keso náxop

¹ Negyókxoho nenteme nak magya'áseyam Jesús aptaha Mesías, nentemék negko'o Dios apketchek; enxama apchásekhayo enxoho xama énxet ekha nak apketchek, elásekháseshok nahan ma'a apketchek.

² Negya'ásegkok negko'o, kawakxohok nahan nelásekhayo Dios apketchek ma'a negásekha'awo enxoho Dios, tén han nenlana enxoho m'a apkeltémókxa nak antehek.

³ Cha'a negásekhayo Dios ma'a nelyaheykekxoho nak apkeltémókxa antehek; kexyókok ma'a apkeltémókxa nak antehek Dios.

⁴ Negyókxoho nenteme nak Dios apketchek, agmalánek ektémakxa nak keso náxop. Magya'áseyam nahan keñamak negmalanma negko'o ektémakxa nak keso náxop.

⁵ Negko'o ektahakxa enxoho magya'áseyam Jesús aptaha Dios Apketche, agmalánek ektémakxa nak keso náxop.

Dios Apketche apxénamap

⁶ Apwa'ak axta Jesucristo yetlo yegmen, magkenatcheso kélyakpásesama yegmen, tén han yetlo éma magkenatcheso m'a apketsapma axta; háwe axta ekwánxa agkok yegmen, yegmen yetlo éma axta eyke anhan. Espíritu nahan apxeyenma ektaha nakso' xa, apmámnaksoho nahan xa Espíritu nak.

⁷ Antanxo ektaha nak ekxeyenma ektaha nakso' xa;

⁸ Espíritu, yegmen, tén han ma'a éma; hawók nahan mók ekxeyenma xa antanxo nak.

⁹ Magya'ásekmok cha'a negko'o apkelxeyenma énxet'ák ektaha nak apkelweteykegkoho ekmámnaksoho agko', akke ekyagwánxa agkok ektaha ektakmela agko' ma'a ektémakxa nak apxeyenma Dios, hakte Apketche axta apxeyenmak.

¹⁰ Negko'o ektahakxa enxoho magya'áseyam Dios Apketche, keytek egwáxok xa ektémakxa nak apxeyenma Dios; keñe m'a énxet ektahakxa enxoho apya'áseyam Dios, máxa apmopwána amya'a etnésesek ma'a Dios, hakte ey'ások ma'a aptémakxa nak Dios apxeyenma Apketche.

¹¹ Apxeyenmék axta Dios segmésama negko'o ekyennakte egnenyek megkatnegwayam enéxa, cháxa ekyennakte egnenyek ekyetnama nak ma'a Apketche. Cháxa apxeyenma nak Dios xa.

¹² Negko'o ektahakxa enxoho negyepetcheyo Dios Apketche, keytek negko'oxa xa ekyennakte egnenyek nak; keñe ma'a énxet mépetcheyo nak Dios Apketche, megkeytek xa ekyennakte egnenyek nak.

Ektemegwánxa néxa kélméso amya'a énxet'ák

¹³ Kéxegke ektáxesásak se'e weykcha'áhak nak, kélteme nak megkólya'áseyam Dios Apketche, yakwayam enxoho kólya'asagkohok kéxegke ekyetna ekyennakte egnenyek megkatnegwayam enéxa nak.

¹⁴ Magya'ásekmok negko'o Dios, hakte negya'ásegkok negko'o megkatnehek megyaháxenmo Dios aksok nelmaxnagko, cham'a eyakhawo enxoho nelmaxnagko ektahakxa apmopmenyého.

¹⁵ Negya'ásegkok ekyetna negko'o m'a aksok nelmaxnagko axta Dios, ekhawo ektémakxa nak han negya'áseyak negko'o apháxenmo cha'a Dios ma'a nempeywa nelmaxnagko egagkok nak.

¹⁶ Apwet'ak agkok enxama apkelana mey'asáxma apyáxeg aptémo xamo' nak mey'áseyam, cham'a magya'asáxma mehegya'asamol'a nétsapmakxa, kéméxchek elmaxnésesek, Dios sat egkeyásekxak apyennakte xa egyáxeg nak, megkatnaha enxoho m'a mólya'asáxma segya'asamol'a nétsapmakxa. Yetneyk mólya'asáxma segya'asamol'a nétsapmakxa, akke axénak ko'o eyéméxko kólmaxnésesek énxet apkelané nak mólya'asáxma segya'ásamol'a nétsapmakxa.

¹⁷ Ekyókxoho ekmaso nentémakxa ekteme mólya'asáxma; wánxa agkok, yetneyk eyke mólya'asáxma mehegya'asamo nak nétsapmakxa.

¹⁸ Negya'ásegkok eyke negko'o énxet apteme nak Apyap ma'a Dios melanyek mólya'asáxma, hakte Dios Apketche etakmelchesek, megkatnésesamok nahan exma kelyekhama'.

¹⁹ Negya'ásegkok negko'o nentaha Dios énxet'ák apagkok, negya'ásegkok nahan eláneykencha'a kelyekhama' ekyókxoho keso náxop.

²⁰ Negya'ásegkok nahan negko'o m'a apwaya axta Dios Apketche, tén han segmésama negya'ásegwayam yakwayam agyekpelkohok ma'a Dios aptaha nak apmámnaksoho. Negyepetcheyók negko'o m'a aptaha nak apmámnaksoho, cham'a Jesucristo aptaha nak Dios Apketche. Cháxa Dios aptaha nak apmámnaksoho xa, aptaha nak han eñamakxa ekyennakte egnenyek megkatnegwayam enéxa.

²¹ Etchek selásekhayo nak, kólawho sat kéxegke m'a kéleykmáseso megkamámnaksoho kélheyáseykegkoho nak dios.