1 SAN JUAN 4 - Lengua Sur (Enxet) Nuevo Testamento

Espíritu apkeñama Dios, tén han ma'a espíritu apkenmexma nak Cristo

¹ Elyáxeg selásekhayo, nágkolána aksa nakso' aptahakxa apkelpeywa apyókxoho énxet'ák apkelxeyenma nak apyetna Espíritu apkeñama Dios, wánxa agkok, kólyekkón aksa sekxo', yakwayam enxoho kólya'asagkohok espíritu apkeñama Dios kexaha m'a apha nak apwáxok, háwe esenhan katnehek. Hakte apsawheykekxók náxop ma'a énxet'ák apkelmopwána amya'a nak, apkelxeyenmol'a apkelpeywa ektaha eñama Dios.

² Sat kañék kélya'ásegwayam kéxegke énxet apyetna Dios Espíritu apagkok eñama s'e: apyókxoho énxet apkelxeyenma enxoho Jesucristo ekmámnaksoho apwaya apyetchesamakpoho énxet, cháxa énxet apyetna Espíritu apkeñama Dios xa.

³ Enxet mexeyenma enxoho Jesús ektéma xa ektaha nak, méko Espíritu apkeñama Dios xa; wánxa aksa exek apwáxok ma'a espíritu aptaha nak apkenmexma Cristo. Kéllegayak axta kéxegke amya'a apxénamakpoho ewak xa espíritu nak; apheyk eyke kaxwo' keso náxop.

⁴ Etchek selásekhayo nak, kéxegke kélteme nak Dios énxet'ák apagkok, kélmalanchek axta anhan nepyeseksa xa énxet'ák apkelmopwancha'a amya'a nak, hakte apmeyhok apagko' Espíritu apyetna nak kéxegke, kaxnók espíritu apha nak apwáxok énxet'ák apkeleñamakxa apagko' nak keso náxop.

⁵ Apkeleñamakxa apancha'awók akke náxop xa énxet'ák nak; ékeso eñamakxa apkelxeyenma nak aksok eleñama nak keso náxop, yeyxhok nahan cha'a apkeltenneykha m'a énxet'ák ektaha nak apkeleñamakxa apagko' keso náxop.

⁶ Negko'o eyke nentaha Dios énxet'ák apagkok. Enxet ektahakxa enxoho apya'áseykegkoho Dios, yeyxhok cha'a negko'o neltenneykha, keñe m'a metnaha nak Dios énxet'ák apagkok megyeyxók cha'a negko'o neltenneykha. Cháxa keñamak negkegwagko nak kaxwo' agyekpelkohok negko'o m'a énxet apyetna nak espíritu apmámnaksoho, tén han agyekpelkohok ma'a énxet apyetna nak espíritu sẽlyexancháseykha nak.

Dios segásekhayo

⁷ Elyáxeg selásekhayo, kéméxchek ólásekhaxkohok hakte Dios keñamak ma'a nelásekhamaxkoho nak. Apyókxoho énxet apkelásekhamakpoho nak, Dios apketchek ma'a, elya'asagkohok nahan ma'a Dios.

⁸ Enxet ektahakxa enxoho megyásekhayo pók, mey'ásegkok Dios ma'a, hakte Dios apteme eñamakxa m'a negásekhayo nak.

⁹ Enxekmósek axta negko'o Dios ekwánxa ekyawe segásekhayo, cham'a segaphásesa axta negko'o Apketche apwánxa xama keso náxop, yakwayam enxoho agwetak negko'o ekyennakte egnenyek eñama m'a Dios Apketche.

¹⁰ Keso ektémakxa negásekhayo s'e: háwe negko'o eñama negásekhayo Dios, Dios akke keñamak segásekhayo negko'o, apcháphásek axta Apketche yakwayam enxoho meyakmagkásekxék Dios nentémakxa mólya'asáxma eñama m'a apmeyásamákpoho apagko' axta yakwayam emátog, negko'o segyanmaga.

¹¹ Elyáxeg selásekhayo, kéméxchek negko'o xa ólásekhaxkoho', hakte axta temék segásekhayo negko'o Dios xa ektaha nak.

¹² Méko ekwetaya aptémakxa Dios xama enxoho; wánxa agkok, nelásekhaxkók agkok negko'o, exek egwáxok Dios, ekmámnaksoho nahan katnegwók ekyetna negko'o negyeseksa m'a Dios segásekhayo nak.

¹³ Cha'a keñamak ekwetamaxche negyepetcha'awo negko'o Dios ma'a segméso axta Espíritu apagkok, tén han ekwetáxko segyepetcha'awo negko'o Dios.

¹⁴ Negko'o egagko' axta negweté xa, neltenneykha nahan nenxeyenma m'a apcháphásama axta Dios Egyap Apketche yakwayam elwagkasek teyp énxet'ák apheykha nak keso náxop.

¹⁵ Negko'o ektahakxa enxoho nenxeyenma Jesús aptaha Dios Apketche, antehek negyepetcheyo Dios, hegyepetkohok nahan ma'a Dios.

¹⁶ Cháxa keñamak negya'ásegwokmo negko'o segásekha'awo Dios xa, magya'ásekmok nahan. Dios apteme eñamakxa m'a negásekhayo nak, negko'o ektahakxa enxoho nelásekhamaxkoho, negyepetcheyo antehek Dios, hegyepetkohok nahan Dios.

¹⁷ Cháxa ektémakxa nak ektemegweykmo ekmámnaksoho ekyetnama negyeseksa negko'o Dios segásekhayo xa, yakwayam enxoho megkatneykha egwáxok negko'o m'a ekhem nelyekpelchamáxchexa sat; hakte hawók negko'o nentémakxa neyseksa negha náxop ma'a aptémakxa nak Jesucristo.

¹⁸ Ekyetnakxa enxoho negásekhayo, megkeytek negakakxa m'a. Kamaseksohok cha'a negaye m'a negásekhayo ekmámnaksoho nak, hakte katekkeshok cha'a negaye m'a negya'áseyak nak peya hẽlegásesagkohok. Yetneyk agkok apkeye enxama, cháxa megkatnegwokmo makham ekmámnaksoho apchásekhayo xa.

¹⁹ Negásekhayok negko'o Dios hakte segásekhayo apmonye axta.

²⁰ Aptemék agkok appeywa enxama s'e: “Eyásekha'awok ko'o Dios”, keñe etaknók ma'a apyáxeg aptémo xamo' nak mey'áseyam, apmopwána amya'a énxet apteme enxoho xa ektaha nak. Agkok yásekha'awok enxama apyáxeg aptémo xamo' nak mey'áseyam apwetayo nak apyókxoho, metnehek nahan apchásekhayo m'a Dios méteyo nak apyókxoho.

²¹ Egmések axta negko'o Jesucristo apkeltémókxa antehek ektéma nak se'e: enxama apchásekhayo enxoho Dios, kéméxchek nahan etnehek apchásekhayo m'a apyáxeg aptémo xamo' nak mey'áseyam.