1 SAN JUAN 2 - Lengua Sur (Enxet) Nuevo Testamento

Cristo apteme negásenneykekxa negko'o

¹ Etchek selásekhayo nak, ektahak ko'o sektáxéseso kéxegke xa ektaha nak, yakwayam enxoho megkóllanyek megkólya'asáxma. Apkelanak agkok mey'asáxma enxama, yetneyk eyke negko'o énxet negásenneykekxa apwesey Jesucristo, aptaha nak appéwomo, yakwayam henlánekxések nápakto' ma'a Dios Egyap.

² Apmeyásamákpók axta apagko' Jesucristo yakwayam emátog, yakwayam enxoho megkólyakmagkásekxék nentémakxa mólya'asáxma; háwe eyke ekwánxa agkok negko'o, akke anhan megkólyakmagkásekxék apkeltémakxa m'a apyókxoho énxet'ák apheykha nak keso náxop.

³ Nelyahakxók agkok negko'o apkeltémókxa nak antehek Dios, egwanchek antemésesek nakso' negyekpelchágwokmo m'a Dios.

⁴ Aptemék agkok appeywa enxama s'e: “Ekya'ásegkok ko'o Dios”, keñe melyahakxók ma'a apkeltémókxa nak antehek Dios, apmopwána amya'a énxet apteme enxoho xa, megkeytek nahan apwáxok ma'a amya'a ekmámnaksoho nak.

⁵ Negko'o ektahakxa enxoho nelyaheykekxoho Dios appeywa, nakso' katnehek nentaha negko'o negásekhayo Dios, cháxa kañék nahan negya'ásegwayam negko'o nentaha negyepetcheyo Dios xa ektaha nak.

⁶ Apxénchek agkok enxama aptaha apyepetcheyo Dios, kéméxchek etnehek ma'a aptémakxa axta Jesucristo.

Axnagkok nelánemaxchexa antehek

⁷ Elyáxeg selásekhayo, háwe axnagkok nelánemaxchexa antehek se'e sektáxésesa nak kéxegke; cháxa nelánemaxchexa antehek kélxawáya axta kéxegke nano' xa, cha'a nano' nelánemaxchexa antehek ma'a amya'a kéllegaya axta kéxegke.

⁸ Akke axnagkok nelánemaxchexa antehek se'e sektáxésesa nak kéxegke, ektaha nak ekmámnaksoho, ekyetnama nak ma'a Cristo ekhawo ekyetnama nak han kéxegkáxa, hakte peyk kamaskok ma'a ekyaktesóxma nak, chápogwatchek kaxwo' ma'a chálewaso ekmámnaksoho nak.

⁹ Apxénchek agkok enxama apha neyseksa elseyexma, etaknók eyke m'a apyáxeg aptémo xamo' nak mey'áseyam, makhemek makham apha neyseksa ekyaktesóxma.

¹⁰ Enxama apchásekhayo enxoho apyáxeg aptémo xamo' nak mey'áseyam, exek neyseksa elseyexma, megkalanaksek nahan mey'asáxma xama aksok enxoho.

¹¹ Wánxa agkok, enxama aptaknagko enxoho apyáxeg aptémo xamo' nak mey'áseyam, apheyk makham neyseksa ekyaktesakxaxma, neyseksa ekyaktesakxaxma nahan eweynchamha, mey'asagkek nahan ma'a apmahágkaxa enxoho, hakte ekyaktesóxma temésesók meyke apakta'ák.

¹² Kélketchek, kéxegke ektáxesásak se'e weykcha'áhak nak, hakte axta eyakmagkásekxak Dios ektémakxa megkólya'asáxma eñama m'a ektahakxa axta aksok apkelané Jesucristo.

¹³ Enxet'ák ekha nak apketchek, kéxegke ektáxesásak se'e weykcha'áhak nak, hakte kélya'ásegkok axta m'a énxet aphama axta sekxo' agko'. Kéxegke kéltaha nak kélketkók, kéxegke ektáxesásak se'e weykcha'áhak nak, hakte kélmalanchek axta neyseksa kelyekhama' ekmowána.

¹⁴ Kélketchek, kéxegke exchek ektáxesásak xa, hakte kélya'ásegkok ma'a Dios Egyap. Enxet'ák ekha nak apketchek, kéxegke exchek ektáxesásak xa, hakte kélya'ásegkok axta m'a aphama axta sekxo' agko'. Kéxegke kélketkók nak, kéxegke exchek ektáxesásak xa, hakte yetneyk kélwaskapma kéxegke, kélpekkenchek axta anhan kélwáxok Dios appeywa, hakte kélmalanchek axta neyseksa kelyekhama' ekmowána.

¹⁵ Nágkólteme aksa kélásekhayo ektémakxa nak keso náxop, tén han ma'a aksok ekhéyak nak keso náxop. Enxama apchásekhayo enxoho aksok ekhéyak nak keso náxop, metnehek apchásekhayo m'a Egyap apha nak néten;

¹⁶ hakte megkañamak Dios Egyap ma'a ekyókxoho aksok ektaha nak segméso ektémakxa nak keso náxop, hakte eñamakxa agko' katnehek keso náxop. Keso aksok ektaha nak segméso ektémakxa nak náxop se'e: aksok ekmaso negyespagko nenteme nak énxet, tén han ma'a neltémo nak anxámasagkok aksok ekmátsal'a anlano', tén han ma'a ekpeykáseykekxa nak egwáxok ekxámokma aksok egagkok.

¹⁷ Wánxa agkok, peyk eyke kamassegwók keso náxop, yetlo m'a ekyókxoho aksok ekmaso negyespagko ekyetna nak keso náxop; keñe m'a enxama apkelané nak Dios apmopmenyého, memassegwomek sat cha'a.

Ekmámnaksoho, tén han ekmowána amya'a

¹⁸ Etchek selásekhayo, keso ektemegwánxa néxa s'e negwánxa nak. Kélleg'ak axta kéxegke amya'a peya ewak xama énxet aptaha apkenmexeykha Cristo; apxámágkek kaxwo' énxet'ák apteme nak apkenmexeykha Cristo. Ekeso eñamakxa negya'ásegkoho nak negko'o ektaha ektemegwánxa néxa keso negwánxa nak.

¹⁹ Negyeseksa nahan apkeleñamak apkelánteyapma xa énxet'ák nak; wánxa agkok, háwe axta eyke nelxegexma'a negko'o xa énxet'ák nak, kaxtemek axta ekmámnaksoho apkeleñama negyeseksa negko'o, hempaxkaha axta. Temegkek axta eyke xa ektaha nak, yakwayam enxoho katakmelek ekwetamaxche metnaha apyókxoho énxet apkeleñama negyeseksa negko'o.

²⁰ Apmések axta kéxegke Cristo Espíritu Santo, kélyókxoho nahan yetnak kélya'ásegwayam kéxegke.

²¹ Háwe eñama megkólya'áseyak amya'a ekmámnaksoho sektáxésesa kéxegke weykcha'áhak, wánxa agkok amya'a ekmámnaksoho kélya'áseyak akke keñamak sektáxésesa kéxegke; kélya'ásegkok nahan kéxegke megkañama negmowána amya'a m'a amya'a ekmámnaksoho nak.

²² ¿Yaksak m'a ekteme nak ekmowána amya'a? Cham'a énxet apxeyenma nak Jesús metnaha Mesías. Cháxa aptaha nak han apkenmexma Cristo xa, hakte mexének apwesey Dios Egyap, tén han ma'a Apketche.

²³ Negko'o ektahakxa enxoho manxeyenma apwesey Dios Apketche mantehek negyepetcheyo m'a Dios Egyap; negko'o ektahakxa enxoho nenxeyenma apwesey Dios Apketche, antehek negyepetcheyo m'a Dios Egyap.

²⁴ Ekeso eñamakxa seltamho nak kólpekkenek kélwáxok kéxegke m'a amya'a kéllegé axta sekxo' agko'; yetnegkek agkok kélwáxok ma'a amya'a kéllegé axta sekxo' agko', kóltehek kélyepetcheyo m'a Dios Apketche, tén han ma'a Dios Egyap.

²⁵ Keso sẽltennasama axta Jesucristo hegmések se'e: ekyennakte egnenyek megkatnegwayam enéxa.

²⁶ Ektáxésesek kéxegke seltennasa m'a énxet'ák apkelenxáneykmo nak elyexanchesha kéxegke.

²⁷ Wánxa agkok, apyetneyk eyke kéxegke Espíritu Santo apkelmeyáseyak axta Jesucristo, megkeyméxchek kólamenyého elxekmósek xama énxet enxoho, hakte Espíritu Santo cha'a elxekmósek kéxegke ekyókxoho aksok, ekmámnaksoho nahan ektémakxa nak sẽlxekmóso, háwe ekmowána amya'a. Nágkólyensem kélteme kélyepetcheyo Cristo, ekhawo m'a ektahakxa enxoho apkelxekmóso Espíritu.

²⁸ Etchek selásekhayo nak, ektahak kaxwo' seláneya kéxegke s'e: nágkólyensem kélteme kélyepetcheyo Cristo, yakwayam enxoho megkatneykha negko'o egwáxok, cham'a senxekmowáseykpoho sat Cristo, yakwayam enxoho anhan mólmegkayhek negko'o nápakto' Cristo, cham'a apwakto sat.

²⁹ Kéméxchek nahan kólya'asagkohok kéxegke aptaha Dios apketchek ma'a énxet'ák apkelané nak nentémakxa ekpéwomo, hakte kélya'ásegkok kéxegke aptaha appéwomo m'a Jesucristo.