1 SAN JUAN 1 - Lengua Sur (Enxet) Nuevo Testamento

Amya'a ekyennaktésamo egnenyek

¹ Nentáxesásak negko'o kéxegke neltennasa m'a amya'a ekyennaktésamo egnenyek ekyetnama axta sekxo' agko', cham'a nenlegaya axta tén han ma'a negwetaya axta, hakte negwetayak axta negko'o xa amya'a ekyennaktésamo nak egnenyek, nempaknegweykmók axta anhan.

² Enxekmowáseyxkók axta negko'o xa amya'a ekyennaktésamo nak egnenyek, negwetayak axta, neltenneykha axta anhan cha'a negko'o nenxeyenma xa; neltennasegkek axta anhan kéxegke xa ekyennakte egnenyek megkatnegwayam enéxa nak, axta yetnók ma'a aphamakxa nak Dios Egyap, cháxa ekyennakte egnenyek senxekmowásamáxkoho axta negko'o xa.

³ Neltennáseyha negko'o kéxegke neltennasa m'a negwetaya axta negko'o, cham'a nenlegaya axta anhan, yakwayam enxoho hegyepetchekxak negko'o kéxegke, ekhawo ektémakxa nak negko'o negyepetcheyo Dios Egyap tén han ma'a Jesucristo aptaha nak Dios Apketche.

⁴ Nentahak negko'o nentáxéseso kéxegke xa ektaha nak, yakwayam enxoho kayágwomhok agko' ekpayheykekxa egwáxok negko'o.

Dios apteme elseyexma

⁵ Cháxa amya'a sẽlxekmósama axta negko'o Jesucristo xa neltennáseyncha'a nak han kéxegkáxa: Dios apteme elseyexma, méko nahan ekyaktesóxma m'a.

⁶ Nenxénchek agkok negko'o nentaha negyepetcheyo Dios, keñe agyepetchesek nahan nenlané m'a nentémakxa ekmaso ekyetchesamaxkoho nak ekyaktesóxma, negmowána amya'a antehek ma'a nentahakxa enxoho nempeywa, háwe nahan katnehek ekmámnaksoho aksok nenlané.

⁷ Negheyk agkok negko'o neyseksa elseyexma, ekhawo m'a ektémakxa nak Dios apha neyseksa elseyexma, antehek nahan negko'o móxpánchásamáxche, hegmasésesek nahan ekyókxoho nentémakxa mólya'asáxma m'a Jesucristo éma apagkok, aptaha nak Dios Apketche.

⁸ Nenxénchek agkok negko'o manláneya mólya'asáxma, magakhémo egagko' antehek nentahakxa nempeywa, megkeytek nahan egwáxok negko'o m'a amya'a ekmámnaksoho nak;

⁹ neltennásek agkok negko'o Dios ektémakxa nenlané mólya'asáxma, egwanchek magya'ásók Dios aptaha meyakmagkaseyam aptémakxa appeywa, tén han ektaha ekpéwomo agko' ma'a aptémakxa nak, yakwayam enxoho meyakmagkásekxék ma'a nentémakxa nak mólya'asáxma, hegmasésesek nahan ma'a ekyókxoho nentémakxa ekmaso nak.

¹⁰ Nenxénchek agkok negko'o manláneya mólya'asáxma, máxa antemésesek apmopwána amya'a Dios, megkatnehek nahan nakso' negma m'a ektémakxa nak appeywa.