1 CORINTIOS 9 - Lengua Sur (Enxet) Nuevo Testamento

Apkepwagkexa etnehek seykha amya'a apwetayo axta Cristo

¹ ¿Yagkapayhawok alának ko'o sekmokókxa enxoho alának? ¿Háweya ko'o seykha amya'a? ¿Ya axta ko'o ateyk Jesús Wese' egegkok? ¿Háweya kéxegke kélteme megkólya'áseyam Wese' egegkok eñama m'a sektamheykha axta ko'o?

² Pók énxet'ák kexaha apkeneyk matnaha ko'o seykha amya'a; wánxa agkok, kélya'ásegkok eyke kéxegke sektaha ko'o seykha amya'a. Hakte cha'a keñamak ekwetamaxche sektaha ko'o nakso' seykha amya'a m'a kélyepetcha'awo nak kéxegke Wese' egegkok.

³ Keso seyátegmoweyak ko'o énxet'ák aptaha nak sewanyeykha s'e:

⁴ Payhawók anxawak negko'o nento tén han ma'a negya nak.

⁵ Payhawók eykhe nahan negko'o xa annaklawha egnakteyegka'a megkalya'áseyam nak Wese' egegkok, ekha enxoho, ekhawo aptamheykegkaxal'a pók seykha amya'a nak, ekhawo aptamheykegkaxal'a nahan ma'a Wese' egegkok apkelyáxeg apancha'awo nak, tén han ma'a Cefas.

⁶ ¿Negko'o enxeykel'a wánxa egagkok Bernabé megkapayhawo hempasmok ma'a neghóxo nentémo xamo' nak magya'áseyam?

⁷ Magwetyehek etnehek aptegye apagko' sẽlpextétamo m'a aksok apagkok nak. Magwetyehek nahan xama énxet ektaha apkeneykekxa xama anmen yámet meto enxoho ekyexna. Metnehek nahan meya nekkések neme apyegmenek apagkok ma'a énxet ektaha nak aptakmelcheso nekkések, cham'a apkelyakhapa enxoho.

⁸ Nágkólána aksa ektémakxa nak elchetamso apwáxok énxet xa, xeyenmék nahan ma'a Moisés segánamakxa apagkok nak.

⁹ Hakte temegkek eknaktáxésamaxche weykcha'áhak eknaktáxésamaxche nak segánamakxa s'e: “Nágkóltetches aksa átog weyke yagkelwána kélaptékxo enxoho aksok kélcheneykekxa.” Háwe eyke ekxeyenma ektemesáseykha apwáxok Dios weyke yagkelwána xa,

¹⁰ akke xeyenmak ma'a ekxéneykencha'a nak apwáxok negko'o Dios, hakte negko'o axta keñamak eknaktáxésamaxko xa segánamakxa nak. Enxet ektahakxa enxoho appeyncheyam xóp, ekhawo nahan ma'a énxet ektaha nak aplekkeso aktek aksok ekyexna apnakxo, kéméxchek eleyxek aksa exkak ma'a ekpehewayam nak yakwayam exkak aksok ekyexna eknakxamáxche.

¹¹ Nakso' axta agkok negkeneykekxo aktek eñama Dios kélnepyeseksa kéxegke, cham'a neltennáseyncha'a axta tásek amya'a, payhawók ólmaxnak kéxegke antawók aksok negmeykencha'awol'a.

¹² Payhawók agkok nahan elmaxnak kéxegkáxa aksok ma'a pók seykha amya'a nak, negko'o eyke ekyagwánxa agkok negmowána ólmaxnak aksok kéxegke. Wánxa agkok, akke agásenneykekxak negko'o xa negmowána nak ólmaxnak kéxegke aksok, nelenmáxexkók axta ekyókxoho aksok, yakwayam enxoho mólya'aksexma m'a ektémakxa nak kéltenneykha tásek amya'a.

¹³ Kélya'ásegkok kéxegke ektémakxa énxet'ák apkeltamheykha nak kañe' tegma appagkanamap, tegma appagkanamap nahan cha'a kañék aptéyak, keñe m'a énxet'ák apkeláneykhal'a ekwatnamáxchexa aksok kélméso Dios, etawagkok nekha m'a ápetek kélmésol'a Dios.

¹⁴ Ekhawo nahan ektémakxa m'a énxet'ák apkellegaso nak tásek amya'a, apkeltamhok axta Wese' egegkok kañék ekpasmo xa ektémakxa nak apkeltenneykha tásek amya'a.

¹⁵ Wánxa agkok, akke ko'o wásenneykekxak xa sekmowána nak almaxnak kéxegke aksok, mataxesásak nahan ko'o kéxegke yakwayam enxoho wának helmések aksok, watsapok ko'o neyk sektaha enxoho xa. Méko kawának hementók se'e ektémakxa nak ko'o ekpayheykekxa ewáxok.

¹⁶ Megkapayhawok ko'o amok eyeymáxkoho ewáxok neyseksa seltenneykha tásek amya'a, hakte xeyenmék ko'o ewáxok seyánémaxko ahagko' alának xa. Ko'o sat laye maltenneyncha'a enxoho tásek amya'a.

¹⁷ Elanak agkok ko'o sektamheykha eñama nak ma'a sekmáheyo ahagko' nak altennaha, payhawók aleyxek hegkések Dios ekyanmaga sektamheykha; elanak agkok ko'o sektamheykha eñama selyáteyeykegkoho, cháxa selana ko'o apkeltamhókxa alának Dios xa.

¹⁸ Cha'a segkéso ko'o Dios ekyakmageykekxa sektamheykha m'a ekpayheykekxa nak ewáxok neyseksa seltenneykha tásek amya'a meyke sekma ekyanmaga xama enxoho; meyke nahan seyasenneykekxa m'a ekpayhawo nak hepasmok ko'o ektémakxa nak sektamheykha seltenneykha tásek amya'a.

¹⁹ Mehetnesásak eykhe ko'o sekmomaxche xama énxet enxoho, ektemesásexkók ahagko' eyke ko'o máxa sekmomaxche nápakta'awo' apyókxoho énxet'ák, yakwayam enxoho axámásekxak énxet apteme mey'áseyam Cristo.

²⁰ Ekheyk agkok ko'o nepyeseksa énxet'ák judíos, axnésaxkohok cha'a énxet'ák judíos, yakwayam enxoho atnesásekxak apteme melya'áseyam; ekhawo nahan sektémakxa cha'a yakwayam atnesásekxak apteme melya'áseyam Cristo ma'a énxet'ák apkelyaheykekxoho nak Moisés segánamakxa apagkok, alyahakxohok cha'a m'a eltémókxa nak antehek Moisés segánamakxa apagkok, háwe eyke m'a selyáteyeykegkoho enxoho yakwayam alyahakxohok.

²¹ Hawók nahan sektémakxa cha'a yakwayam atnesásekxak apteme melya'áseyam Cristo m'a énxet'ák melyaheykekxoho nak Moisés segánamakxa apagkok, axnésaxkohok cha'a ko'o m'a énxet'ák nak, neyseksa eykhe selyaheykekxoho m'a segánamakxa eñama nak Dios, hakte elyaheykekxók ma'a apkeltémókxa nak antehek Cristo.

²² Ekheyk agkok nahan nepyeseksa m'a énxet'ák elyelkamáxkoho nak apteme melya'áseyam, axnésaxkohok nahan cha'a ko'oxa xa énxet'ák nak, yakwayam enxoho atnesásekxak melya'áseyam. Ekheyásexkók cha'a ko'o m'a apyókxoho énxet'ák nak, yakwayam enxoho alwagkasek teyp nápakha, eñama m'a sektahakxa enxoho.

²³ Elanak cha'a ko'o ekyókxoho xa yakwayam apasmok ma'a ektémakxa nak kéllegaso tásek amya'a, yakwayam enxoho hewatámhok ko'oxa m'a ektémakxa nak ekxeyenma tásek amya'a.

²⁴ Kélya'ásegkok kéxegke ektémakxa m'a nelteyásamáxche nak. Apyókxoho yenyahagkok, xama eyke exkak ekyanmaga. Kólenyahak kéxegkáxa kóltesaxchek, yakwayam enxoho kólxawak ekyanmaga.

²⁵ Enxet'ák ektahakxa enxoho apkeláneykekxa aptahakxa yakwayam epasmok apkelteyásamap, melanyek ma'a xama aksok sẽtsagkasamo nak. Etnahagkok cha'a xa ektaha nak, yakwayam enxoho emok ma'a nenteté empátek elánamáxchel'a yámet áwa' ekmanyehel'a kalyameyk; wánxa agkok, nenlenxanakmek eyke negko'o yakwayam agmok ma'a ekyanmaga megkatsagkásamáxche nak.

²⁶ Ko'o nak se'e, magwanyahak aksa ektémol'a neyseksa magya'áseyakla'a negmahágkaxa, makxayha aksa nahan ahakteg'ák ma'a sennápexko enxoho.

²⁷ Añásesagkohok cha'a ko'o sekyókxa, yakwayam enxoho wának helyahakxohok, yakwayam enxoho mehelyenyekxek ko'o natámen selxekmoso enámokkok.