1 CORINTIOS 6 - Lengua Sur (Enxet) Nuevo Testamento

Apkelátegmomap énxet ekha nak melya'áseyam nápakto' énxet segyekpelchémo metné nak mey'áseyam Cristo.

¹ Yetneyk agkok kélxama kéxegke megkaleklo kélwáxok aptahakxa kélmók ¿Yaksak ektaha kélyo'ókmo nak énxet segyekpelchémo metné nak mey'áseyam Cristo yakwayam elánekxések xa? ¿Yaksak ektaha megkólyo'ókmo nak ma'a Dios énxet'ák apagkok apkelpagkanamap nak, yakwayam elánekxések xa?

² ¿Enxeykel'a kólya'ásegkok kéxegke Dios énxet'ák apagkok peya etnehek apyekpelchémo keso náxop? Peyk agkok kóltehek kéxegke kélyekpelchémo ektémakxa nak keso náxop, ¿yaksak ektaha megkólewagko nak kólyekpelkohok aksok ektaha nak ketsék agko'?

³ ¿Yagkólya'ásegkok nahan kéxegke peya kawomhok negyekpelchémo m'a Dios apkelásenneykha apkeleñama nak néten? ¡Negko'o nenteme ekyagwánxa agko' negmowána antehek negyekpelchémo aksok keso negwánxa nak!

⁴ Yetneyk agkok kéxegke kélpakmeteykha eñama megkaleklo kélwáxok ektahakxa kélweté keso negwánxa nak, ¿yaksak ektaha kéltegya'a nak segyekpelchémo énxet metnaha nak appasmo kélakneykekxexa?

⁵ Eltennásek ko'o kéxegke xa yakwayam enxoho kólmegkagwók; ¿Méko enxeykel'a kélnepyeseksa kéxegke xama énxet apmopwána nak ékpelkohok ektahakxa aksok elánamáxche, nepyeseksa apkelyáxeg'a aptémo xamo' nak mey'áseyam?

⁶ Háwe ekwánxa agkok xa apkelnapmap nak ẽlyáxeg aptémo xamo' nak mey'áseyam, wánxa agkok apkelsókok eyke nahan cha'a apkelátegmomap nápakta'awo' ma'a énxet'ák segyekpelchémo metné nak mey'áseyam Cristo.

⁷ Nakso', yentexók agko' keytek kélátegmomaxche kélnepyeseksa kéxegke. Tásek neykhe kólenmaxaxkohok aksa ekmaso kéltemésesakxa nak. Tásek nahan kólhok aksa kólmenyexchesek aksok kélagkok.

⁸ Kéxegke kélagko' eyke kélteme ekmaso kéltémakxa, hakte weykmók kélmenyexcheso aksok apagkok ma'a kélyáxeg kéltémo xamo' nak megkólya'áseyam.

^9-10 ¿Yagkólya'ásegkok kéxegke m'a énxet'ák elmasagcha'a nak apkeltémakxa peya mexkekxék ma'a aptémakxa nak Wese' apwányam Dios? Nágkólana aksa katakmelak ma'a kélanagkama nak katakmelak kéltahakxa, hakte mexkekxék sat aptémakxa nak Wese' apwányam Dios ma'a énxet'ák elmasagcha'a nak apkeltémakxa kalmopsexta'a, tén han ma'a énxet'ák apkelpeykesamo nak kéleykmáseso, tén han ma'a énxet'ák aptawáseykha nak ektémakxa sẽlyamhopma, tén han ma'a énxet'ák aphó kelwána nak, tén han ma'a énxet'ák apkelmenyexmo nak, tén han ma'a énxet'ák apkelmeyókásamákpoho nak aksok apagkok, tén han ma'a énxet'ák anmenát'ák nak, tén han ma'a énxet'ák aptekkesáseykha nak aksa apwesey pók, tén han ma'a énxet'ák apmopwána nak elyexanchesha pók yakwayam exkak selyakye.

¹¹ Cháxa apkeláneykegko axta nápakha énxet'ák apkeleñama kélnepyeseksa kéxegke xa, wánxa agkok, kéltemésesegkek eyke kaxwo' kéláxñeyo kéxegke, kéltemésesegkek nahan kéxegke Dios apkelpagkanma, kéltemésesegkek nahan kélpéwomo eñama apwesey m'a Jesucristo Wese' egegkok tén han eñama m'a Espíritu apkeñama nak Dios egagkok.

Ekpagkanamaxche negyókxa

¹² Katnohok cha'a amya'a s'e: “Ewanchek ko'o alának sekmokókxa enxoho alána'.” Nakso' xa. Háwe eyke ekyókxoho aksok ekpayhawo anlána'. Nakso', ewanchek ko'o alának sekmokókxa enxoho alána', wánxa agkok, magwohók eyke ko'o kamok ewáxok xama aksok enxoho.

¹³ Katnohok nahan cha'a amya'a s'e: “Nento ekyetneykemxa egwokmo', egwokmo' ekyetnamakxa nento.” Nakso' xa, Dios sat eyke emasésók xa ánet aksok nak. Háwe eyke negyókxa yakwayam anlanaksek ekmaso nentémakxa mansexta. Negyókxa ekteme Wese' egegkok apagkok, Wese' egegkok akke apagkok xa negyókxa nak.

¹⁴ Hennakxétekhásók sat nahan negko'o xa Dios eñama m'a apmopwána nak, ekhawo m'a ektahakxa axta apxátekhásekmo Wese' egegkok.

¹⁵ ¿Enxeykel'a kólya'ásegkok kéxegke kélyókxa ekteme eñama Cristo apyókxa? ¿Amoya sat ko'o xama nekha xa kélyókxa eñama nak Cristo, keñe eypetchesók ma'a kelán'a ekyakmagkáseyak nak pók énxet ekpathetéyak ektegye selyakye? Matnehek ko'o xa.

¹⁶ ¿Yagkólya'ásegkok kéxegke xama énxet apyepetcheykha nak kelán'a ekyakmagkáseyak nak pók énxet ekpathetéyak ektegye selyakye, xama katnekxak ekyókxa xa ánet nak? Hakte temegkek eknaktáxésamaxche weykcha'áhak se'e: “Yepetcha'ak agkok mók xa ánet nak, xama aksa katnekxa'.”

¹⁷ Yetneyk agkok xama énxet apyepetcheyo Wese' egegkok, kólteméseshok cha'a wánxa apyepetcheyo m'a espíritu.

¹⁸ ¡Kólyetnakhes ekmaso nentémakxa nak mansexta! Ekyókxoho mók ektémakxa nak apkelané mey'asáxma énxet megkatwásesha apyókxa; keñe m'a énxet apkelané nak ekmaso nentémakxa mansexta, elának ma'a mólya'asáxma enmexma nak negyókxa.

¹⁹ ¿Yagkólya'ásegkok kéxegke kélyókxa ekteme Espíritu Santo tegma appagkanamap apagkok, Dios axta apméso kéxegke, apheyk nahan kélwáxok kéxegke xa Espíritu Santo nak? Háwe kéxegke kélteme kélagkok kélagko' xa kéltémakxa nak.

²⁰ Hakte apkelmeyk axta kéxegke Dios ekha ekyanmaga. Ekeso eñamakxa eyéméxko nak kólmaha kéxegke xa kélyókxa nak yakwayam kóltemésesek apcheymákpoho Dios.