1 CORINTIOS 5 - Lengua Sur (Enxet) Nuevo Testamento

Ekmaso nentémakxa mansexta

¹ Legáxchek axta amya'a kélxama kéxegke aptamhákxo aptáwa apteme egken. Cháxa ektaha nak magmasexta ekmaso agko' nentémakxa xa, magwetyehek nahan katnehek nepyeseksa énxet'ák melya'áseyak nak Dios xa.

² ¡Megkamassak makham eleymáxkoho kélwáxok kéxegke! ¡Tásek eykhe kalánhok kélwáxok ellapwámeyak! Enxet ektahakxa enxoho apteme xa, kéméxchek kóltekkesek kélnepyeseksa kéxegke.

³ Maxnak eykhe ko'o sekyókxoho kélnepyeseksa kéxegke kaxwo' nak, xénchek eyke ewáxok máxa entahak sekwokmo enxoho sekyókxoho. Yetlo sekxeyenma Jesucristo Wese' egegkok apwesey ekxénak ko'o seltamhókxa kóltemésesek énxet apteme enxoho xa, hakte máxa entahak sekwokmo enxoho sekyókxoho xa.

⁴ Kélaknakxeyk sat agkok kéxegke, kaxének sat ko'o ewáxok kéxegke, máxa sat katnehek sekwokmo enxoho sekyókxoho, keytek sat nahan Jesús Wese' egegkok apmopwána kélnepyeseksa kéxegke.

⁵ Keñe sat kólmések Satanás, yakwayam kamasésók apyókxa xa énxet nak, aphagák sat eyke kawagkasaxchek teyp, apwakto sat Wese' egegkok.

⁶ Megkatakmelak keyxkohok kélpeywa kéxegke eñama elánamáxche xa ektéma nak; Kélya'ásegkok eyke ektémol'a cha'a amya'a s'e: “ketsék kempáseyak awanchek kampasagkok apyókxoho hótahap kélyelakteso.”

⁷ Kólchexa' kéxegke xa kempáseyak apák eknaktawáseykencha'a nak, yakwayam enxoho kólxohok kéxegke m'a pan kaxwé kélyelaktesól'a. Kélhawók kéxegke m'a pan meyke kempáseyak aptamákpohol'a ekhem mólwagkayam Pascua. Hakte apmatñegkek axta Cristo negko'o segyanmaga, aptaha nak Nekkések Apketkok kélpagkancheso ekhem mólwagkayam nak Pascua.

⁸ Kéméxchek negko'o ólsawáseshok Pascua egagkok nak, yetlo magyexamaxkoho, tén han antemésesek ekmámnaksoho agko' nentémakxa, ekyetchesamaxkoho nak ma'a pan meyke kempáseyak nak; akke katakmelak ólsawáseshok yetlo ekmaso nentémakxa, tén han ma'a nentémakxa nak mólya'asáxma, ekyetchesamaxkoho nak kempáseyak apák.

⁹ Mók sektáxéseso weykcha'áhak axta seltennasa kéxegke maltamho kólpaxkaha m'a énxet ektaha nak apkeláneyak ekmaso nentémakxa mansexta.

¹⁰ Axta altennásak kéxegke maltamho kólpáxakwomhok kélagko' ma'a énxet apkeláneyak nak ekmaso nentémakxa mansexta keso náxop, esenhan ma'a énxet apkelmeyókásamákpoho nak aksok apagkok, esenhan ma'a apkelmenyexmo nak, esenhan ma'a apkelpeykesamo nak kéleykmáseso, kéméxchek eykhe kéxegke kamaskok kélha keso náxop yakwayam megkólpaxkaha xa énxet'ák nak.

¹¹ Axta eyke eltennásak ko'o kéxegke maltamho kólyepetchaha m'a énxet apkeltemesásamap nak egyáxeg, cham'a apkelané nak ekmaso nentémakxa mansexta, esenhan ma'a apkelmeyókásamákpoho nak aksok apagkok, esenhan ma'a apkelpeykesamo nak kéleykmáseso, esenhan ma'a aptekkeseyam nak apmopwána amya'a, esenhan ma'a anmenáto nak, esenhan ma'a apmenyexmo nak. Nágkóltawho nahan xamo' kélto énxet apteme nak xa.

^12-13 Mehepayhawok ko'o atnehek selyekpelchémo énxet'ák mehentémo xamo' nak magya'áseyam; Dios sat eyke etnehek apkelyekpelchémo xa énxet'ák nak. Akke kéméxchek kéxegke kóltehek kélyekpelchémo m'a egyáxeg nentémo xamo' nak magya'áseyam. Kóltekkes kélnepyeseksa kéxegke énxet apkelané nak mey'asáxma.