1 CORINTIOS 2 - Lengua Sur (Enxet) Nuevo Testamento

Amya'a ekxeyenma Cristo apketsapma néten aksok ektegyéso

¹ Elyáxeg, axta ko'o amáha ektémakxa nak negmowána nempeywa, tén han ma'a amya'a magmowána nak agya'asagkohok, cham'a sekmahágko axta kélnepyeseksa kéxegke seltennáseyncha'a amya'a ekmámnaksoho eñama Dios ektaha nak ekyexamaxche.

² Axta ko'o altamhok ay'asagkohok mók aksok sekha axta kélnepyeseksa kéxegke, wánxa axta m'a amya'a ekxeyenma nak Jesucristo, axta ekyagwánxa agkok seltamho ay'asagkohok ma'a kélyepetcheso axta aksok ektegyéso Jesucristo.

³ Ekyelkáxchek axta senegwokmo kélnápakta'awo' kéxegke, elpexyenegkek axta eñama seyeye.

⁴ Xama axta sekpakmeta kélnepyeseksa kéxegke, yetlókók axta seltenneykha tásek amya'a, axta amáha ko'o ektémakxa nak negmowána nempeywa yakwayam alekwomhok kéxegke. Wánxa agkok, eklekwokmók axta kéxegke eñama Espíritu Santo, tén han eñama m'a Dios apmopwána nak,

⁵ yakwayam enxoho megkatnehek eñamakxa kélteme megkólya'áseyam kéxegke m'a ektémakxa nak apkelya'ásegwayam énxet, wánxa kañék ma'a Dios ekha nak apyennakte.

Dios segya'asásegwayam aptémakxa eñama Espíritu apagkok

⁶ Wánxa agkok, negmáha eyke cha'a negko'o nempeywa eñama negya'ásegwayam nepyeseksa m'a énxet'ák ektaha nak ekyennakwayam apteme magya'áseyam, háwe eyke eñama m'a negya'ásegwayam ekyetna nak keso náxop, háwe nahan eñama m'a kelwese'e nak keso náxop, cham'a peya nak kanyehémhok elmassegwók.

⁷ Akke nenxénak negko'o m'a negya'ásegwayam ekpowásamáxkoho eñama nak Dios, cháxa appósamo axta Dios apkepmenyého elának xa, eyeynamókxa m'a amonye apkelané axta keso náxop, yakwayam enxoho hegwatámhok negko'o m'a ektémakxa nak apcheymákpoho.

⁸ Cháxa melya'áseykegko axta kelwese'e náxop xa, kaxtemek axta apkelya'áseyak, megkólyepetchesek axta aksok ektegyéso Wese' egegkok ekha nak apcheymákpoho.

⁹ Wánxa agkok, temegkek eyke eknaktáxésamaxche weykcha'áhak se'e: “Apkelanesákxek axta aksok Dios ma'a énxet'ák apkelásekhayókxa nak, cham'a aksok megkótémaxko nak, tén han ma'a megkañamáxko nak, tén han ma'a megkaxéneykencha'a nak egwáxok”.

¹⁰ Cháxa segya'asásegwokmo axta Dios eñama Espíritu Santo xa, hakte Espíritu Santo apteme apsawhomo apkelanyo xa ekyókxoho nak, ekweykmoho m'a ektémakxa nak elchetamso apwáxok Dios ektaha nak ekpowásamáxkoho.

¹¹ ¿Yaksak énxet apwanchek ey'asagkohok ekyetno nak kañó' agko' apwáxok énxet? Wánxa ey'asagkohok ma'a espíritu apha nak apwáxok, ekhawo nak han ma'a Espíritu apkeñama nak Dios wánxa aksa ey'asagkohok ma'a aksok ekyetnama nak Dios.

¹² Axta negko'o anxakak espíritu apkeñama nak keso náxop, wánxa axta nenxaka m'a Espíritu apkeñama nak Dios, yakwayam enxoho agya'ásegwók ma'a aksok segméso axta Dios eñama segásekhayo.

¹³ Anxénhok cha'a negko'o xa yetlo negmeykha m'a nempeywa sẽlxekmóso axta Espíritu apkeñama nak Dios, háwe eyke m'a nempeywa sẽltameye nak eñama negya'ásegwayam egagko'. Cháxa nentahakxa nak negko'o neltennáseykha eñama Espíritu m'a énxet'ák apyetna nak apwáxók Espíritu.

¹⁴ Enxet meyke nak apwáxok Espíritu megkamhek apwáxok aksok eleñama nak ma'a Espíritu apkeñama nak Dios, hakte ekyéháxma yána'. Mopwanchek nahan ey'ásegwomho', hakte Espíritu aksa cha'a etnehek apyekpelchémo xa.

¹⁵ Keñe m'a énxet apha nak apwáxok Espíritu, apwanchek etnehek apyekpelchémo ekyókxoho aksok, méko nahan kawának keykpelkohok ma'a énxet nak.

¹⁶ Hakte temegkek eknaktáxésamaxche s'e: “¿Yaksak awanchek kay'asagkohok ektémakxa nak elchetamso apwáxok Wese' egegkok? ¿Yaksak nahan awanchek kalxekmosagkok?” Hawók eyke negko'o ekpakméteykha egwáxok ektémakxa nak ekpakméteykha apwáxok Cristo.