1 CORINTIOS 15 - Lengua Sur (Enxet) Nuevo Testamento

Cristo apxátekhágwayam

¹ Elyáxeg, kaxwo' emenyék ko'o kaxénwakxohok kélwáxok kéxegke m'a tásek amya'a seltennásencha'a axta kéxegke. Keso amya'a kélma axta takha' kéxegke s'e, cháxa keñamak ekyennakwokmo nak kélteme megkólya'áseyam kéxegke xa.

² Cháxa keñamak nahan peya nak kólwagkasaxchek teyp kéxegke xa amya'a nak, cham'a kéllenxanakmoho enxoho kélyennaktésamo kélteme megkólya'áseyam; axta agkok katnék xa ektaha nak, chakhók axta kóltehek kéxegke megkólya'áseyam.

³ Elmeyókásók axta amonye selxekmósa kéxegke m'a nelxekmowásamáxche seltámeye axta emonye ko'o. Elxekmósek axta ko'o kéxegke m'a apketsapma axta Cristo eñama m'a nentémakxa nak mólya'asáxma, ekhawo m'a ektémakxa nak ekxeyenma eknaktáxésamaxche;

⁴ Kelátawanyegkek axta, keñe axta apxátekhágwokmo antanxo ekhem ekhawo ektémakxa nak ekxeyenma eknaktáxésamaxche;

⁵ apxekmowáseykpekxók axta Pedro, keñe axta apxekmowáseykpekxoho nahan ma'a doce apkeltámeséyak axta.

⁶ Keñe axta natámen, apxekmowáseykpekxoho nahan teyp quinientos ẽlyáxeg'a, apxámok makham apheyncha'a xa énxet'ák nak, apkeletsepmék eykhe nahan nápakha.

⁷ Keñe axta anhan apxekmowáseykpekxoho Santiago, keñe axta anhan apxekmowáseykpekxoho m'a apyókxoho seykha amya'a ektaha axta apwetayo Jesús.

⁸ Axayók axta exekmowáseykpohok ko'o ektémol'a sakcha'a megkapekhésamo katyamok.

⁹ Ko'o eyke sekteme kóneg nepyeseksa énxet'ák seykha amya'a nak, megkapayhawok nahan altamhaxchek ko'o seykha amya'a, hakte ekmenxeneykha axta Dios énxet'ák apagkok.

¹⁰ Ektemegkek eyke ko'o kaxwo' seykha amya'a hakte tásek axta setnésesamakxa Dios, háwe nahan eyakhémo m'a ektémakxa nak segkéso naksa seyásekhayo, wánxa agkok, xámok axta eyke ko'o selané sektamheykha, maxnawok ma'a pók énxet'ák seykha amya'a nak, háwe axta eyke ko'o selané ahagko' xa sektamheykha nak, Dios axta eyke aptaha sepasmo.

¹¹ Cháxa neltenneyncha'a nak negko'o xa, ko'o tén han ma'a pók seykha amya'a nak, cháxa kéltéma nak kéxegke megkólya'áseyam xa.

Apnakxátekhágwayam apkeletsapma axta

¹² Neltennáha agkok negko'o m'a apxátekhágwayam axta Cristo, ¿yaksak ektaha kélxéna nak kélnápakha kéxegke menakxátekhágweykmo cha'a m'a apkeletsapma axta?

¹³ Hakte, agkok enakxátekhágweykmok cha'a apkeletsapma axta, mexátekhágwomek axta nahan Cristo,

¹⁴ axta agkok nahan exátekhágweykmok Cristo, chakhók axta óltennaha negko'o, chakhók nahan keytek megkólya'áseyam kéxegke.

¹⁵ Kaxtemek axta menakxátekhágwayam cha'a apkeletsapma axta, nelmowancha'a amya'a axta antehek negko'o nenxeyenma nak ma'a amya'a eñama nak Dios, hakte anxének ma'a apxátekháseykmo axta Dios Cristo, cham'a megkatnaha enxoho ekmámnaksoho apxátekháseykmo Dios ma'a Cristo, cham'a ektaha enxoho nahan nakso' menakxátekhágweykmo cha'a m'a apkeletsapma axta.

¹⁶ Agkok enakxátekhágweykmok cha'a apkeletsapma axta, mexátekhágwomek axta anhan Cristo;

¹⁷ axta agkok nahan exátekhágweykmok Cristo, chakhók axta keytek megkólya'áseyam kéxegke: wánxa keytek makham kéxegke m'a megkólya'asáxma nak.

¹⁸ Temegkek axta agkok xa ektaha nak, elmassegwók axta m'a énxet apkeletsapma axta apteme melya'áseyam Cristo.

¹⁹ Nentemék agkok magya'áseyam Cristo apkepwagko hẽlwagkasek teyp wánxa so kaxwo' nak, keñe mehẽlwagkasek teyp ma'a egmonye sat, payhawók axta negko'o kapyóshok henlanok énxet.

²⁰ Nakso' agko' axta eyke apxátekhágweykmo Cristo. Cristo apteme aphawo m'a émha amonye eknakxamáxchel'a aksok ekyexna: Cristo axta nahan apmonye kélxátekháseyam.

²¹ Xama énxet axta keñamak ekwaya nétsapma keso náxop, keñe axta anhan eñama xama énxet ekwaya m'a apnakxátekhágwayam nak apkeletsapma axta.

²² Neletsepmék cha'a negyókxoho negko'o eñama nenteme Adán aptáwen neptámen, ekhawo ektémakxa nak han nenteme nak negyepetcheyo m'a Cristo, negyókxoho sat keytek ekyennakte egnenyek.

²³ Wánxa agkok, enxama sat eyke cha'a hẽlxátekhásók sempehewákxexa enxoho, Cristo eyke sekxo' apmonye kélxátekháseyam, keñe sat apkexyekmo enxoho Cristo, enakxétekhágwók sat nahan ma'a ektaha nak Cristo énxet'ák apagkok,

²⁴ keñe sat kawók néxa ekhem, cham'a yakwánxa sat emasésók Cristo ekyókxoho aksok kelwese'e ekha nak elmowancha'a, cham'a ekha nak han kélyaheykekxoho, tén han ma'a ekha nak elmowancha'a, cham'a yakwánxa sat nahan Cristo egkeyásekxak Dios ma'a aptémakxa nak Wese' apwányam.

²⁵ Hakte Cristo sat etnehek Wese' apwányam ekweykmoho kélnegkenchesa kóneg apmagkok ekyókxoho apkelenmexma;

²⁶ axayók agko' sat katnehek kélmaséseyam ma'a nétsapma ektaha nak han megkatnaha egmók.

²⁷ Hakte Dios axta ektaha apnegkencheso kóneg apmagkok Cristo ekyókxoho aksok. Cháxa ekxeyenma nak weykcha'áhak eknaktáxésamaxche xa, cham'a eksawhomáxkoho nak aksok kélnegkenchesama kóneg apmagkok Cristo, negya'ásegkok eyke negko'o megkaweykmoho m'a Dios, hakte Dios axta apnegkencheso Cristo kóneg apmagkok ekyókxoho aksok.

²⁸ Sawhexkók sat agkok aksok kélnegkencheso kóneg apmagkok Cristo, keñe sat Cristo, etnésesakpok kóneg nápakto' Dios, cham'a aptaha nak Dios Apketche, hakte Dios axta apnegkencheso kóneg apmagkok Cristo ekyókxoho aksok; keñe sat etnehek Dios apsawhomo apkeláneykha ekyókxoho aksok.

²⁹ ¿Háxko sat etnahagkok énxet'ák kélyakpasáseyak axta yegmen eñama m'a apkeletsapma axta, cham'a menakxátekhágweykmo enxoho cha'a m'a apkeletsapma axta? ¿Yaksak ektéma apkeltémo nak kólyakpásesagkok yegmen eñama m'a apkeletsapma axta?

³⁰ Méko agkok nennakxátekhágwayam, ¿yaksak eyke ektéma ekyetnama nak negyeseksa aksok yakwayam nak cha'a hegmasesók ekyókxoho ekhem?

³¹ Elyáxeg, ekheyk cha'a ko'o ekyókxoho ekhem keto' setsapmakxa, nakso' agko' xa, hawók agko' ma'a ektémakxa nak ko'o kélpeykáseykekxa ewáxok kéxegke, kélteme nak megkólya'áseyam eñama negyepetcheyo Cristo Jesús Wese' egegkok

³² Elnápexchék axta ko'o aksok nawha'ák ello m'a tegma apwányam Efeso, wánxa agkok, ¿yaksak axta segkésa ko'o m'a? Nakso' agkok menakxátekhágweykmo cha'a m'a énxet'ák apkeletsapma axta, nakso' katnehek ektémakxa nak cha'a amya'a s'e: “¡Antawagkok, agyenagkok nahan, saka sat óletsapok!”

³³ Nágkólho aksa kólyexanchesha, hakte: “Nelxegexma'a elmasagcha'a nak apkeltémakxa, etwasha cha'a m'a ektakmela nentémakxa egagko' nak.”

³⁴ Kólya'ásegwakxoho hana, nágkóllánekxa megkólya'asáxma, hakte melya'ásegkok kélnápakha kéxegke Dios. Ektemek ko'o seláneya kéxegke xa yakwayam enxoho kólmegkágwakxak.

Yakwánxa sat katnehek apnakxátekhágwayam apkeletsapma axta

³⁵ Xama énxet sat kexaha etnehek apkelmaxneyeykha s'e: “¿Háxko sat katnehek enakxétekhágwók apkeletsapma axta? ¿Háxko sat ekteme apyókxa?”

³⁶ ¡Ekyéháxma sẽlmaxneyeykha xa ektéma nak! Kélchenákxeyk agkok aktek, megkatnehek megkatsapma m'a aktek yakwayam enxoho kaltektépok.

³⁷ Megkólchenekxék cha'a m'a yámet ekteyapmal'a, wánxa aksa kólchenekxak ma'a aktek, cham'a hótahap apaktek nak, esenhan ma'a mók aksok aktek nak.

³⁸ Keñe cha'a egkések Dios ektémakxa apmokókxa enxoho etnésesek ektémakxa, ekyókxoho aksok aktek nahan cha'a egkéshok Dios ektémakxa ekteyapma ekpehewayam enxoho.

³⁹ Megkaxnawok mók ma'a ektémakxa nak negyókxa, mók ektémakxa apyókxa énxet, mók ektémakxa nahan ekyókxa aksok nawha'ák, mók ektémakxa nahan ekyókxa náta, mók ektémakxa nahan ekyókxa kelasma.

⁴⁰ Hawók nahan ektémakxa m'a aksok ekhéyak nak néten, tén han keso náxop; keltásek aksok ekhéyak ma'a néten, keltásek nahan aksok ekhéyak nak keso náxop, wánxa agkok, akke kaxnawok mók ektémakxa eltakmalma.

⁴¹ Ekhem eltácheso nak megkaxnawok apkeltácheso m'a pelten, mók ektémakxa nahan apkelapogwate m'a yaw'a; hawók nahan ektémakxa nepyeseksa yaw'a, megkaxnawok mók apkelapogwate apyókxoho nak.

⁴² Hawók nahan ektémakxa apnakxátekhágwayam ma'a apkeletsapma axta, negyókxa eyátawanyamáxkohol'a cha'a ekteme étsapmo, keñe m'a negyókxa ektaha nak ekxátekhágwayam ekteme megkatsapma.

⁴³ Negyókxa kélatawanyamol'a ekteme ekmaso agko'; keñe m'a negyókxa ektaha nak kélxátekháseyam ekteme ekha eyeymáxkoho. Negyókxa kélatawanyamol'a ekteme ekyelkamáxkoho; keñe m'a negyókxa ektaha nak kélxátekháseyam ekteme ekha ekyennakte.

⁴⁴ Negyókxa kélatawanyamol'a ekteme eñamakxa agko' xóp, keñe m'a negyókxa kélxátekháseyam nak ekteme eñamakxa agko' ma'a Espíritu Santo aptaha nak apxátekháseyam. Yetneyk nahan negyókxa ektaha nak aptekkeso Espíritu, ekhawo ektémakxa nak han ma'a negyókxa ektaha nak eñamakxa agko' xóp.

⁴⁵ Temegkek eknaktáxésamaxche weykcha'áhak se'e: “Apmonye apkelánamap énxet axta Adán, axta aptemék se'e nentémakxa nak negko'o nelyenna nak”; keñe axta m'a Adán ektaha axta apwé axayók agko', espíritu segmésamo ekyennakte egnenyek akke m'a.

⁴⁶ Háwe émha amonye ekwé aksok eleñama nak néten, akke émha amonye ekteyapma s'e ekyetnama nak keso náxop, axayók eyke cha'a katyapok ma'a ektaha nak eñama néten.

⁴⁷ Xóp axta apkeñamak apkelánamákpo apkemha apmonye énxet, náxop axta anhan apkeñamak ma'a; keñe m'a énxet ektaha axta apwé axayo', néten axta apkeñamak ma'a.

⁴⁸ Enxet apheykha nak keso náxop aphawók ma'a énxet apkelánamap axta xóp; keñe m'a énxet apkeleñama nak néten aphawók ma'a énxet apkeñama axta néten.

⁴⁹ Keso ektémakxa nak negko'o neghémo énxet apkelánamap axta xóp, sat nahan katnehek aghágwakxohok ma'a énxet apkeñama nak néten.

⁵⁰ Elyáxeg, emenyék altennaksek kéxegke, yawanchek kaxkekxak aptémakxa nak Wese' apwányam Dios eghápetek tén han ẽxchakkok, ekhawo nahan ma'a aksok étsapmo nak yawanchek kaxkekxak ma'a megkatsapma nak.

⁵¹ Wánxa agkok, emenyék eyke ko'o kólya'ásegwomhok kéxegke aksok ekpowásamáxkoho apmáheyo nak elának Dios. Mansawhaxkok sat agmaskok, hẽlyakmagkasesek sat aksa ektémakxa negyókxa negyókxoho nak,

⁵² ekmanyehe agko' sat eyke magwetéyakla'a, cham'a ekpáwá sat ma'a kélakkahaso ektahakxa nak néxa kélpáwaso. Kólnakxétekhásók sat ma'a énxet'ák apkeletsapma axta yakwayam meletsepekxék cha'a, hakte kapáwak sat ma'a kélakkahaso nak. Hẽlyakmagkasesek sat negko'o ektémakxa negyókxa.

⁵³ Hakte kayakmagkasek sat ektémakxa s'e negyókxa ekmassegweykmoho nak, megkamassegwayam sat katnekxak, keñe sat se'e negyókxa étsapmo nak, megkatsapma sat katnekxa'.

⁵⁴ Tamhákxeyk sat agkok megkamassegwayam se'e negyókxa ekmassegweykmoho nak, tén han ektamhákxo enxoho megkatsapma s'e negyókxa étsapmo nak, katnehek sat ektémakxa nak eknaktáxésamaxche s'e: “Negmalanma axta keñamak kélmaseseykmo nétsapma.

⁵⁵ Nétsapma, ¿háxko ekmahágkaxa kaxwo' ma'a ektémakxa axta elmaláneyak? Nétsapma ¿háxko ekmahágkaxa kaxwo' ektémakxa axta ekmowána hegmakta'?”

⁵⁶ Mólya'asáxma eyke keñamak ekmowána henlegásesagkohok nétsapma, segánamakxa eyke keñamak ekméso ekmowána xa mólya'asáxma.

⁵⁷ ¡Negmések negko'o ekpayheykekxa egwáxok Dios eñama m'a sẽlyaphagkaseykmoho axta eñama Wese' egegkok Jesucristo!

⁵⁸ Elyáxeg selásekhayo, kóllenxanmoho kélyennaktésamo kélteme megkólya'áseyam, nágkólyensem, kólyanchesagkoho cha'a kéltamheykha kélláneya nak ma'a nentamheykha eñama nak Wese' egegkok, hakte kélya'ásegkok kéxegke megkatnaha eyakhémo kéllané kéltamheykha kélláneyol'a cha'a, eñama kélyepetcheyo Wese' egegkok.