1 CORINTIOS 13 - Lengua Sur (Enxet) Nuevo Testamento

¹ Ekpakmetchek agkok ko'o m'a ektémakxal'a apkelpakmeyesma énxet tén han sekpakmeta enxoho m'a ektémakxa nak apkelpakmeyesma Dios apkelásenneykha, wánxa agkok, méko eyke katnehek seyásekhayo, máxa atnehek ko'o m'a sawó ekyentaxno elletnaheykhal'a, esenhan axhok ko'o m'a sawó elpayhe ekmasol'a elletnaheykha.

² Ekxénchek agkok ko'o amya'a eñama nak Dios, ekya'ásegkok agkok nahan ma'a Dios apmopmenyého ektaha nak ekpowásamáxkoho, esenhan ma'a sekya'ásegko enxoho ekyókxoho aksok, yetneyk agkok may'áseyam ko'o ekmowána nak kaltakhésha xóp elekhaheyak elyawe nak, wánxa agkok, méko eyke katnehek seyásekhayo, mékoho atnehek ko'o.

³ Elmeyásegkek agkok énxet meyke aksok apagkok ekyókxoho aksok ahagkok nak, ekmések agkok nahan sekyókxa yakwayam kawatnaxche, wánxa agkok, méko eyke katnehek seyásekhayo, yawanchek hepasmok xa.

⁴ Ekha negásekhayo ekteme m'a negya'áseykegkoho nak nelenmáxamáxkoho, tén han ma'a ektakmela nak nentemésesakxa egmók, ekha negásekhayo nahan ekteme m'a magnatha nak egmók, tén han ma'a megkeymáxkoho nak nempeywa, tén han ma'a mageymáxkoho nak,

⁵ ekha negásekhayo nahan ekteme m'a manteme nak ekmaso nentémakxa, tén han ma'a mólmeyókasamáxkoho egagko' nak nentémakxa; tén han ma'a manlo nak, tén han ma'a megkaxéneykha nak egwáxok sẽltemésesakxa ekmaso;

⁶ ekha negásekhayo ekteme m'a megkapeykáseykekxa nak egwáxok aksok ekmaso, wánxa aksa kapeykásekxak egwáxok ma'a amya'a ekmámnaksoho nak.

⁷ Ekha negásekhayo ekteme m'a nenlegeykegkoho nak ekyókxoho aksok, tén han ma'a magya'áseyam nak ekyókxoho aksok, tén han ma'a nelhaxanma nak ekyókxoho aksok, tén han ma'a nelenmáxamáxkoho nak ekyókxoho aksok.

⁸ Megkamassegwomek xa negásekhayo nak. Xama ekhem sat kamassegwók apkelxeyenma énxet'ák ma'a amya'a eñama nak Dios, kamaskok sat nahan apkelpakmeta m'a amya'a magya'áseyak nak. Kamaskok sat nahan apkelapmenyého m'a negya'ásegwayam nak.

⁹ Megkasawhomáxkohok ekteme ekpéwomo xa negya'ásegwayam nak tén han ma'a nenxeyenma nak amya'a eñama Dios,

¹⁰ hakte kammok sat néxa xa, cham'a ekwa'a sat ma'a ektaha nak ekmámnaksoho agko'.

¹¹ Sektémakxa étkok axta ko'o sektéma cha'a sekpakmeyesma m'a ektémakxal'a kapakmétek sakcha'a, keñe axta anhan ektéma elchetamso ewáxok ma'a ektémakxal'a sakcha'a elchetamso awáxok, temegkek axta anhan ekxéneykha ewáxok ma'a ektémakxal'a ekxéneykha awáxok sakcha'a. Xama axta sektaha sekwányam ekyenyókek axta m'a ektémakxal'a sakcha'a.

¹² Kaxwo' eyke yáma negyekpelchágkek negko'o ektémol'a nelanyantáxama ápak, cham'a ekmasextohol'a negyekpelche; Xama ekhem sat eyke katnehek negweté egagko' xa. Háwe ko'o ekyókxoho sekya'ásegwayam se'e kaxwo' nak, xama ekhem sat eyke ay'ásegwomhok ma'a Dios, ekhawo ektémakxa nak sey'áseykegkoho ko'o Dios.

¹³ Antanxo ekyetna m'a ektaha nak megkamassegwayam; magya'áseyam, nelhaxneykha, tén han negásekhayo; wánxa eyke ektaha ektakmela neyseksa antanxo xa negásekhayo nak.