1 CORINTIOS 11 - Lengua Sur (Enxet) Nuevo Testamento

¹ Kólyetlakxa kéxegke sektémakxa nak ko'o, ekhawo sektémakxa nak ko'o sekyetleykekxo aptémakxa Cristo.

Kelán'ák kañe' kélakneykekxexa

² Egkések cha'a ko'o kéxegke ekpayheykekxa ewáxok, hakte kaxénhok cha'a kélwáxok ko'o, kélenxanakmók nahan kéllané m'a sektahakxa axta selxekmóso kéxegke.

³ Wánxa agkok, eltamhok eyke ko'o kólya'asagkohok kéxegke Cristo apteme apkemha apmonye apagkok énxet, keñe m'a énxet ekha nak aptáwa apteme apkemha apmonye agkok ma'a aptáwa, ekhawo ektémakxa nak han ma'a Cristo apteme apkemha apmonye apagkok ma'a Dios.

⁴ Apchaklásek agkok apkátek énxet aptaha enxoho nempeywa nelmaxnagko, esenhan ma'a apkeltenneyncha'a enxoho amya'a eñama nak Dios, metnahak apcháyo m'a Cristo, aptaha nak apkemha apmonye apagkok.

⁵ Agkok nahan kaklásak akkátek kelán'a ektaha enxoho nempeywa nelmaxnagko, esenhan ma'a eltenneyncha'a enxoho amya'a eñama nak Dios, megkatnahak eyáyo m'a atáwa aptaha nak apkemha apmonye agkok, máxa katnehek ma'a kelán'a kélmópésesamol'a ekyesé.

⁶ Hakte, agkok kaklásak akkátek kelán'a, tásek kamópaksoho ekyesé, wánxa agkok, xénchek agkok awáxok kelán'a eyesagko kayaktének áwa', esenhan ma'a ekmópesawo enxoho ekyesé, tásek kaklaksek akkátek.

⁷ Akke kapayhawok yaklaksek apkátek énxet, hakte énxet apteme kélheyáseykegkoho m'a aptémakxa nak Dios. Kamok cha'a nápát ma'a ektémakxa nak apcheymákpoho Dios, keñe m'a kelán'a, kamok cha'a nát ektémakxa nak apcheymákpoho énxet.

⁸ Hakte, axta yeñamak kelán'a apkelánamákpo énxet, énxet axta eyke keñamak elánamáxko m'a kelán'a.

⁹ Háwe axta kelán'a eñama apkelánamap énxet, énxet axta eyke keñamak elánamáxko kelán'a.

¹⁰ Cháxa keñamak eyéméxko nak cha'a kaklaksek akkátek kelán'a magkenatcheso ekha elyaheykekxoho atáwa, nápakta'awo' ma'a Dios apkelásenneykha.

¹¹ Mopwanchek exek énxet meyke aptáwa, yawanchek nahan kaxek kelán'a meyke atáwa, neyseksa nenteme nak magya'áseyam Cristo, kaxhok mók ekmámenyého mók xa ánet nak.

¹² Nakso' axta elánamáxko kelán'a eñama m'a énxet, nakso' nahan énxet apkeñama kelán'a ektegkeso sekxo' apteyékmo. Ekyókxoho aksok akke ekteme eleñamakxa m'a Dios.

¹³ Kéxegke kélagko' nahan tásek kólyekpelkohok ektakmela enxoho kelán'a katnehek nempeywa nelmaxnagko, meyke eyaklaso akkátek xama enxoho.

¹⁴ Nentémakxa eyke keñamak senxekmóso segmegkasamo elwenaktések apwa' énxet.

¹⁵ Wánxa agkok, tásek eyke kalwenaktések áwa' kelán'a, cháxa ekméso ektakmalma xa; hakte xawáyak axta yakwayam kalwenaktések áwa' kelán'a, yakwayam enxoho kápok akkátek.

¹⁶ Apmokók agkok nahan exének énxet mók amya'a eñama nak xa, kéméxchek ey'asagkohok magya'ásegko negko'o m'a mók apkeltémakxa nak énxet, tén han melya'ásegko m'a Dios énxet'ák apagkok nak.

Nentawáseykha nempasmo ektakmela eñama nak Wese' egegkok

¹⁷ Mowanchek ko'o agkések ekpayheykekxa kélwáxok kéxegke s'e sektahakxa nak sektáxéseso kaxwo', hakte máxa entahak eknaktawásencha'a enxoho kéxegke m'a kélakneykekxexa nak cha'a, yakwayam eykhe katnésesek kéltakmalma.

¹⁸ Entahak axta amya'a seltennáseykha s'e, kélaknákxeyk hek agkok kéxegke yakwayam keytek kélakneykekxa, yetneyk heyke kélexpanchesamaxche kélnepyeseksa kéxegke, mók xama aksa ektemesásak ko'o ekmámnaksoho xa amya'a nak.

¹⁹ Megkatnehek kexaha megkólexpanchásamáxche kéxegke yakwayam kólya'ásegwomhok ma'a énxet'ák aptaha nak ekmámnaksoho melya'áseyam Cristo.

²⁰ Cha'a keñamak kélexpanchásamáxche kéxegke m'a megkólteméseso nak ekmámnaksoho m'a nempasmo ektakmela eñama nak Wese' egegkok, cham'a kélaknákxo enxoho cha'a kéxegke.

²¹ Hakte epekhaksohok cha'a etwok apto kélxama kéxegke, mewagkasók m'a ekweykenxal'a nentamakxa nento, keñe cha'a nápakha kannápok meyk, keñe nahan nápakha kannápok anmen.

²² ¿Mékoya kéxegke tegma kéltamakxa kélto, tén han kélyeneykegkaxa kélyenéyak? ¿Yaksak ektaha megkólásekha'a nak kéxegke Dios énxet'ák apagkok, tén han kélmésa apkelmegkakto m'a énxet'ák meyke nak aksok apagkok? ¿Háxko sat atnehek alának kéxegke? ¿Axéneya sat ko'o ektakmela kéltahakxa kéxegke? Ma', maxének ko'o ektakmela xa kéltahakxa nak.

Nempasmo ektakmela eñama Wese' egegkok

²³ Ekxakak axta ko'o s'e nelxekmowásamáxche eñama nak Wese' egegkok, cham'a selxekmósa axta kéxegke: chakhawók axta apma pan Wese' egegkok Jesús ma'a axta'a kéláneyakxa axta emakpok,

²⁴ keñe axta natámen apméso ekxeyenma apwáxok Dios apyepta nepyeseksa pan. Aptahak axta s'e: “Keso sekyókxoho sekmésa axta ko'o yakwayam kamátog s'e, yakwayam kapasmok kéxegke. Kóllána' sat cha'a s'e, yakwayam enxoho kaxénwakxohok kélwáxok ko'o.”

²⁵ Hawók axta anhan aptahakxa natámen aptéyak, apmeyk axta egheykok, aptahak axta anhan se'e: “Keso egheykok ekteme axnagkok nelpakhetchásamáxkoho Dios kéltemésesama nak ekmámnaksoho yetlo m'a éma ahagkok nak ko'o, kélyenágkek sat agkok cha'a, kóllána' sat, yakwayam enxoho kaxénwakxoho kélwáxok ko'o.”

²⁶ Kéltokagkek agkok cha'a s'e pan nak tén han kélyenágko enxoho cha'a s'e aksok kélyeta nak egheykok, kéllegásek kéxegke m'a apketsapma axta Wese' egegkok, ekwokmoho m'a apkexyekmo sat makham.

Ektémakxa negma nempasmo ektakmela

²⁷ Kéxegke ektahakxa enxoho kélto s'e pan nak, tén han kélyenágko enxoho s'e kélyeta nak Wese' egegkok egheykok apagkok, yetlo enxoho megkóltakmelcheso, kéllanak megkólya'asáxma enmexma Wese' egegkok apyókxoho, tén han enmexma m'a éma apagkok.

²⁸ Ekeso eñamakxa eyéméxko nak cha'a anlánekxak egwáxok amonye nentéyak xa pan nak, tén han amonye negyenéyak xa aksok kélyeta nak Wese' egegkok egheykok apagkok.

²⁹ Hakte kéltókek agkok aksa, tén han kélyenágko enxoho aksa, meyke kélya'áseyak ma'a ektémakxa nak Wese' egegkok apyókxa, kélsexnánémaxche kélagko' sat katnehek kéltawa enxoho aksa, tén han ma'a kélyenágko enxoho aksa.

³⁰ Ekeso eñamakxa kélxáma nak kélhaxamáxche kéxegke, tén han kéltaha kélyelkamáxkoho, nápakha énxet nahan apkeletsapak kélnepyeseksa.

³¹ Nentakmelchasawók agkok cha'a nenlaneykxo egwáxok negko'o, mehenlegásesagkok cha'a Wese' egegkok.

³² Enlegasásegkok agkok cha'a negko'o Wese' egegkok, yakwayam hẽltameyagkok eyke, keñe anhan mantehek nelsexnánémaxche xamo' ma'a énxet'ák apheykha nak keso náxop.

³³ Elyáxeg selásekhayo, kélaknákxeyk agkok cha'a kéxegke yakwayam kóltawagkok, kólleyx cha'a kélmók.

³⁴ Meyk agkok enchakhak kélxama, tásek etwok apto apxagkok, yakwayam enxoho melegásesagkok Dios eñama ekteme kélakneykekxa xa ektaha nak. Mók aksok sat alánekxések kéxegke, cham'a sekteyánegwákxoho sat kéxegke.