Yosua 9 - Katɔti Ɔku Kedee

Gibeonƒuɔ Bekyuli Bátɔlɔ Yosua

¹ Ka Israelƒuɔ békpo badi bekyuli pii lɛlɔ ɔsu ni, bana lɛnyi lísie ɔgyu. Na baga bani nlie Yordan ɔƒɛ kanukɔ abi lɛlɔ ku bani nlie abi kaƒɔna ku bani nlie kalɔ ƒiaa na Mediterenia kɔtu úti útédu Lebanon Kɔbi lɛnɔ bénu-ma kɔku. Na baga bamɛni ndi Hitiƒuɔ ku Amoriƒuɔ ku Kanaanƒuɔ ku Perisiƒuɔ ku Hiwiƒuɔ ku Yebusiƒuɔ.

² Na baga bamɛni básala lili na bábla kasusu ka betékpoku Yosua ku Israelƒuɔ.

³ Na ka Gilbeonƒuɔ bénu kalɛ na Yosua ɔ́bla Yerikoƒuɔ ku Aiƒuɔ ni,

⁴ bábla lɛkwɛ lɛdi, na bedie bekyuli badi ka bésie bététi adila bakya aƒo akukudi adi kemmo ku bebuo lɛku ntɛ aƒo akukudi na bényimi-nya basia bebuo beblidi ala betine lɛlɔ.

⁵ Na bágyu lɛwu ku lɛgbanvuo lɛni ndaku bɔbwɛ bákya. Na béti bodobodo ɔni nétu uwi na útili bada.

⁶ Amu na bésie Yosua kudɔ na Gilgal na básu-nwu ku Israelƒuɔ banini, “Kesii kani na bɔ́si ni, kágyu geen. Anwuɔsu bɔɔyɔ́ ka abu ku-mii bɔbla unwi.”

⁷ Amu na Israelƒuɔ béye-ma banini, “Bi ɔsu na bɛɛyɔ́ ka bɔbla unwi? Ɔƒaalɛ bina keliekɔ kátagyunku-bu.”

⁸ Amu na bekyuli bammɔ básu Yosua banini, “Lɛla biala na bɛsu-bu ni, bɔdubɔbla.” Amu na Yosua úye-ma ɔnini, “Amii ndi ɔma? Na wɛ kakɛ na bɛ́si bíbo mɛni?”

⁹ Amu na bekyuli bamɛni bédie kenye banini, “Ati, buvele bɔda-a, kesii kani na bɔ́si kágyu. Na búnu lɛla biala na bina Unwoti Katɔti ɔ́bla na Egyipte kalɔ lɛlɔ

¹⁰ ku lɛla lɛni na úti ɔ́bla Amoriƒuɔ baga inyɔ bani nélie Yordan Ketu ɔƒɛ katukɔ kakɛ. Na baga bammɔ ndi Ɔga Sihon ɔni nási Hesbon ku Ɔga Og ɔni nási Basan na ɔɔdi lɛga na Astarot.

¹¹ Na bula batɔnkune ku bula bekyuli bani ƒui nlie bula kalɔ lɛlɔ nása kenye na básu-bu banii bɔwia adila adi bɔda bula ulu busie na bɔta na bɔyu ulu na bubasiaku-mii. Na básu-bu ka buboku lɛlɔ kalɔ bute-mii na buvele-mii na bunyimiku-mii na bɔ́bla unwi.

¹² Bɛnu adila ani udu bɔda. Uwi ɔni na bɔ́ta ɔma na bɔdubo ni, nka bodobodo ɔni béƒi ɔwɔdi na búti bɔda. Nsu binwini bɛnu kalɛ na ɔ́kwii na útili ɔ́bla!

¹³ Lɛnɔ uwi ɔni búwi ntɛ buyile bula aƒo amɛni ni, ese ɔwɔdi. Nsu bɛnu ka ana ƒui ábwɛ. Na ɔ́si ulu ɔgyu ɔni bɔ́si ɔsu. Na bula lɛwu ku agbanvuo lɛnɔ ƒui ábwɛ.”

¹⁴ Mmɔ na Israelƒuɔ bénu bekyuli bammɔ kalɔ na báƒɔ bana adila ani bada mmɔ adi bádi. Nsu béteye Unwoti kasusu asa na bénu kalɔ.

¹⁵ Ɔmmɔ kama Yosua únu kalɔ na bényimi na bábla unwi. Na Israel batɔnkune bákpali Katɔti lɛnyi bálɛ ugyii béte-ma ka balabla-ma lɛla lɛdi.

¹⁶ Na emeyi atɛ kama ɔni na Israelƒuɔ báakpali Katɔti lɛnyi bényimi ɔmɛni báwɔlɔ ni, bébenu ka Gibeonƒuɔ bamɛni belie bede-ma.

¹⁷ Anwuɔsu Israelƒuɔ báta báyu ulu. Na limeyi lɛtɛdi lɛlɔ bétéduo bana lɛma lɛni kemmo belie. Na lɛma lɛmmɔ ndi Gibeon ku Keriƒa ku Beerot ku Kiriat-Yearim.

¹⁸ Nsu Israelƒuɔ bátadu-ma, ɔsika Israelƒuɔ benengu bése-ma kenye na bana Unwoti ɔni ndi Israelƒuɔ Katɔti lɛnyi kemmo ɔsu. Ɔmmɔ ɔsu Israelƒuɔ béti kɔnyi bakya bana benengu bammɔ.

¹⁹ Nsu bédie lɛlɔ kalɔ banini, “Bɔ́kpali Unwoti ka bulabla-ma lɛla lɛdi. Anwuɔsu bulakana-ma lɛla lɛdi bɔbla ɔƒɛni.

²⁰ Na utalɛka butuku-ma ɔ́si Katɔti lɛnyi lɛni bɔ́kpali ɔsu. Na si bɔɔɔgyi na bútuku-ma ni, Katɔti ɔdubo-bu kɔtu bɔni.”

²¹ Anwuɔsu básu Israelƒuɔ bammɔ banini, “Bɛya-na bɔnyonu-ma.” Mmomu kasusu kani na benengu bammɔ béti ndi ka Gibeonƒuɔ bammɔ badubo ekyweni butaayɔ na beteesie ketu teete Israelƒuɔ.

²² Amu na Yosua ɔ́ya na bálɔ Gibeonƒuɔ bebenyene nwuna anumi. Na úye-ma ɔnini, “Bi ɔsu na bilie bide-bu mɛni na bɛɛtɔlɔ-bu ka bina kasikɔ kágyu?

²³ Ɔ́si lɛla lɛni bɛ́bla mɛni ɔsu ni, Katɔti úwida-mii. Na bina kabla kani na bɛdubo butaabla ndi ka bɛdubo ekyweni butaayɔ na biteesie ketu teesienku Katɔti kakpakɔ.”

²⁴ Amu na Gibeonƒuɔ bammɔ bédie kenye banini, “Ati! Lɛla lɛni ɔsu bɔ́nyi ɔkɔ ɔmmɔ udu ndi ka búnu na ɔdi sɔsɔ ka bina Unwoti Katɔti úbo nwuna kabla ɔblane Mose ɔda ka ɔdubo kalɔ kani ƒui nkya mɛni buti bute-mii. Na ɔdubɔya na bɛdu bekyuli bani ƒui nkya-ka kemmo uwi ɔni na bikpo bisela anumi mɛni. Ɔƒɛni lɛnɔ bɔbla lɛni, ɔsika bɔɔyia-mii geen na bɔgyi ka bula ngba bɔkya ɔgbankpi kemmo.

²⁵ Na ɔƒɛni bɔkya bina enu kemmo. Lɛla biala bɛɛyɔ́ ni, bɛbla-bu.”

²⁶ Ɔmmɔ ɔsu Yosua únye utile Gibeonƒuɔ na ɔ́ya na Israelƒuɔ batadu-ma.

²⁷ Nsu ɔ́ya na Gibeonƒuɔ bammɔ bénwini Israelƒuɔ kabla bablane na baayɔ́ ekyweni na beesié ketu teete-ma ku kesii biala na Katɔti ɔsia kɔnu ka bataakpa-nwu. Ɔmmɔ ndi-ma kabla úti úbedu ɔmwi.