Yosua 8 - Katɔti Ɔku Kedee

Israelƒuɔ Báyila Ai Ɔma Ku Udu

¹ Amu na Unwoti ɔ́su Yosua ɔnini, “Ta na eti ƒula bekpone ƒui na bɛkɔ bisie Ai bitékpoku-ma.” Na ɔ́su-nwu ɔnini, “Bitayia-ma, na ɔdi lɛnɔ enu ataƒɛ-nwu, ɔsika ami Unwoti ndubɔya na bɛdi Aiƒuɔ lɛlɔ. Na ndubɔnyonu bana ɔga ku bana ɔma ku bana bekyuli ku bana kɔlɔ lɛkya-mii enu kemmo.

² Na bɛyila Ai ɔma ku ɔga ku bekyuli bammɔ ƒui udu aani kalɛ na bɛ́bla na Yerikoƒuɔ. Nsu bibo kuƒi ka biti bana ala ku bana bebuo. Bɛtu akpagya na bitábɛ na biyu-ma bɛtu na bitékpoku-ma.”

³ Anwuɔsu Yosua ɔ́ta na anwu ku nwuna bekpone ƒui bátu akpagya ka betékpoku Aiƒuɔ. Na údie bekpone bani ngyi bukpo geen aani nkyuli mpim avlaatɛ na báta usien ɔmmɔ.

⁴ Na ɔ́su-ma ɔnini, “Bise atu kaduɛ na bɛbla lɛla lɛni mɔɔsu-mi mɛni. Bitábɛ ɔma ɔmmɔ ɔvi ɔni ngye. Nsu bitagyunku ɔma ɔmmɔ bitagya. Na binye kagyumana.

⁵ Na ami Yosua ku mina bekpone bɔdubɔni bude ɔma ɔmmɔ. Na si Aiƒuɔ báta ka bebekpoku-bu ni, bɔdubunwini kama na bukeli aani kalɛ búkeli kudeedi mmɔ.

⁶ Na ɔdubɔya na babi basiaku-bu úti útédu ka bɔya na balɛ ɔma ɔmmɔ kemmo. Na badubɔkali ka búkeli na bɔda aani kalɛ bɔ́bla kudeedi mmɔ.

⁷ Na si ɔlɛ lɛni ni, na bɛta bina kabɛkɔ mmɔ na bitádi ɔma ɔmmɔ lɛlɔ. Ɔsika Unwoti Katɔti ɔdubo ɔma ɔmmɔ buti bɔkya bina enu kemmo.

⁸ Na si úti ɔma ɔmmɔ ɔkya bina enu kemmo ɔ́wɔlɔ ni, na bɛtu ogya bɛkya ɔma ɔmmɔ kemmo na bɛbla bɛsia Unwoti ɔda ɔni na úbo-mii lɛlɔ. Na bɛdi mina litemi lɛmmɔ lɛlɔ.”

⁹ Ɔmmɔ kama Yosua ɔ́ya na bekpone bammɔ bátɔlɔ. Na bésie batábɛ Ai ɔma ɔmmɔ ɔƒɛ kanukɔ kakɛ na ɔma ɔni ɔtɛ Ai ku Betel ntɛ. Na bátábɛ na benye kagyumana. Nsu Yosua ku bekyuli bammɔ báƒɔ lɛlɔ bákya mmɔ usien umodi ɔmmɔ.

¹⁰ Kadi kegye ɔtanta tutuutu ni, Yosua ɔ́ta na ɔ́lɔ nwuna bekpone bakladi ƒui ɔ́sala. Na anwu ku Israelƒuɔ batɔnkune bátɔnku-ma na bakɔ bésie Ai.

¹¹ Na anwu ku bekpone bani ƒui nkya-nwu kudɔ bésie Ai ɔma kabɛnye na katɔ kakɛ na kɔwɛ kɔni nkya ama ku Aiƒuɔ ntɛ.

¹² Na úti bekpone bani bumomo bɔdubɔbla aani mpim ɛlɔ na úti-ma útábala Ai ku Betel ɔƒɛ kanukɔ kakɛ.

¹³ Na Yosua bekpone ketulodikɔ bátábɛ bakya ɔma ɔmmɔ ɔƒɛ katɔ kakɛ. Na bakladi lɛnɔ bátábɛ bakya ɔma ɔmmɔ ɔ́ƒɛ kanukɔ kakɛ. Nsu Yosua anwu ni, ɔ́ƒɔ lɛlɔ ɔkya kɔwɛ kɔmmɔ kemmo usien ɔmmɔ.

¹⁴ Uwi ɔni na Aiƒuɔ ɔga ɔ́nu lɛni ni, anwu ku ɔma unengudi ɔmmɔ banana ƒui bábla báyu ulu ɔtanta tutuutu ka batásiaku Israelƒuɔ na Yordan Kɔwɛ kakɛ na betékpoku-ma, nsu útati ka Yosua bekpone bábɛ bakya ɔma ɔmmɔ kama na badubo-nwu bukpo bɔsiku mmɔ.

¹⁵ Amu na Yosua ku nwuna bekpone bábla aani si Aiƒuɔ na beekeli. Na béti bésela kalɔ kakwiidi kakɛ.

¹⁶ Na bálɔ Aiƒuɔ banana ƒui básala ka bababɔku-ma. Na bábi básiaku Yosua ku nwuna bekpone. Na bésie ɔgyu. Na bada ɔma ɔmmɔ bese.

¹⁷ Na Ai ku Betel banana ƒui báta na bábi básiaku Israelƒuɔ na bada ɔma bese ɔni na ɔnana ɔdi ɔsɔ utebu na ɔgyumana ɔma ɔmmɔ.

¹⁸ Amu na Unwoti ɔ́su Yosua ɔnini, “Ti ƒula lɛtula tina Ai, ɔsika líti ɔma ɔmmɔ lɛ́kya-a enu kemmo.” Anwuɔsu Yosua ɔ́bla aani kalɛ kani na Unwoti ɔ́su-nwu.

¹⁹ Na ka úti lɛtula lɛmmɔ ɔ́tina ɔma ɔmmɔ lɛni ni, nwuna bekyuli bani nábɛ ƒui báta kɔnakunwi na békeli bétéduo ɔma ɔmmɔ kemmo na bátu ogya bakya-nwu kemmo.

²⁰ Amu ka Aiƒuɔ bénwini na bánu kama ni, bánu uyɔ ɔdi ka ɔkɛ katɔ. Na bánu ka kuƒi kɔdi kɔsɔ kuuubo na basia bekeli. Ɔsika Israelƒuɔ bani nékeli básia kalɔ kakwiidi kakɛ ni, bénwini bénye básiaku-ma.

²¹ Na ka Yosua ku nwuna bekpone bánu ka nwuna bekyuli bakladi bada Ai ɔma bakya na bátu ogya bákya-nwu kemmo ni, bese kalɔ beebo Aiƒuɔ bammɔ taadu.

²² Na Israelƒuɔ bani nkya Ai ɔma ɔmmɔ kemmo lɛnɔ bálɛ bébo na bebunku Yosua bene. Ɔmɛni ɔsu Aiƒuɔ bánu báti ka kekelikɔ kadi kasɔ keeebo. Na bádu Aiƒuɔ bammɔ ƒui kede kede ɔni na ku ukyuli ɔdi útakana na ukeli.

²³ Nsu Aiƒuɔ ɔga amu ni, buƒie na béƒie-nwu béboku Yosua.

²⁴ Uwi ɔni na Israelƒuɔ bádu Aiƒuɔ bani nábi básiaku-ma na kekpokɔ mmɔ ku kalɔ kakwiidi kemmo mmɔ na bátu-ma kuwii ƒui báwɔlɔ ni, bénwini bésie Ai ɔma kemmo na bátádu bekyuli bani ƒui nkya mmɔ.

^25-26 Na Yosua ɔ́talaku nwuna lɛtula katɔ ɔ́tina Ai ɔma laa úti útédu ka bádu ukyuli biala asa na ɔ́yula-nwu kalɔ. Na Aiƒuɔ ƒui békpi limeyi lɛmmɔ. Na bekyuli bani nékpi limeyi lɛmmɔ badubɔbla nkyuli mpim leevu-inyɔ bani ndi beleku ku banana.

²⁷ Na bebuo ku akɛla ani nkya ɔma ɔmmɔ kemmo ni, Israelƒuɔ béti ala ammɔ aani kalɛ na Unwoti úbo Yosua ɔda.

²⁸ Ɔmmɔ ɔsu Yosua ɔ́kyula Ai ɔma ɔni na ɔ́yii ku udu. Na mmɔ ɔmu use lɛni úti úbedu ɔmwi kadi.

²⁹ Na Yosua ɔ́kya Aiƒuɔ ɔga kabuli ɔda kugyii lɛlɔ na ɔ́da-nwu ɔ́ƒala mmɔ úti útédu useyi. Na ɔƒɛ úsela kanukɔ ni, ɔ́ya na bédie-nwu kabuli kammɔ na bétébo-nwu báva ɔma ɔmmɔ kabɛnye. Na ɔ́ya na bála atakpɛ pii béwi-nwu lɛlɔ. Na atakpɛ ammɔ amu ewi mmɔ úti úbedu ɔmwi kadi.

Yosua Ɔ́ka Katɔti Ɔda Bubo Etemila Na Ebal Kɔbi Lɛlɔ

³⁰ Ɔmmɔ kama Yosua ɔ́tu lɛkpabi úte Unwoti ɔni ndi Israelƒuɔ Katɔti na Ebal Kɔbi lɛlɔ.

³¹ Na ɔ́tu-nwu ɔsiaku aani kalɛ na Mose ɔni ndi Unwoti kabla ɔblane úbo Israelƒuɔ ɔda kalɛ. Lɛni na bénweni bakya Mose ɔda bubo ɔku kemmo banini, “Biti atabi ani na béteti lɛbuala bátabwɛ bɛbla lɛkpabi bite-mi.” Na lɛkpabi lɛmmɔ lɛlɔ ni, bádu bebuo bákyula bakpa béte Unwoti na bábla unwi bɔbla akpala lɛnɔ.

³² Mmɔ kani na benye baanu, na Yosua úti atabi adi na únweni Mose ɔda bubo etemila ammɔ ɔsia-nya lɛlɔ.

³³ Na Israelƒuɔ ku bana batɔnkune ku kabla bablane ku litemi batɛne ku baƒɔ bani ƒui nkya-ma akɔ benye Unwoti Bunyimi Adaka ɔmmɔ lɛƒɛnyi. Na bénwini anumi bátina Lewiƒuɔ bakpane bani nti Katɔti Bunyimi Adaka ɔmmɔ. Na bekyuli bammɔ kakɛ benye Garisim Kɔbi anumi, na kakɛ lɛnɔ benye Ebal Kɔbi anumi aani kalɛ na Unwoti kabla ɔblane Mose ɔ́su úse kalɛ na beti kusɛ kusɛ bete Israel kadi bekyuli.

³⁴ Na Yosua ɔ́ka ɔda bubo etemila ɔku ɔmmɔ momoomo ɔ́tina-ma. Na ɔ́ka ekpo ani ndanku kusɛ kusɛ ku ewida.

³⁵ Na lɛla lɛdi lítebu na Mose ɔku ɔmmɔ kemmo ɔni na Yosua útaka. Na beleku ku banamu ku baƒɔ bani nkya-ma akɔ lɛnɔ bénu ɔdi.