Yosua 7 - Katɔti Ɔku Kedee

Akan Ɔ́bla Likpidi

¹ Na Unwoti ɔda ɔni na úbo Israelƒuɔ ka beteti lɛla biala batakya lɛlɔ si bésie betékpoku Yerikoƒuɔ ni, bátadi-ni lɛlɔ. Ɔsika ɔnana ɔni baalɔ Akan úti ala ammɔ adi ɔ́kya lɛlɔ. Anwuɔsu Unwoti úti kɔnyi kati kati ɔkya Israelƒuɔ. Na Akan ɔmɛni ɔ́si Yuda kaba kemmo na Serah ɔtɔ kemmo. Na Serah náwɔ Sabdi, na Sabdi náwɔ Karmi, na Karmi náwɔ Akan ɔmmɔ.

² Amu na Yosua ɔ́tala bananabi badi ɔ́si bana kakyakɔ na Yeriko ka babɛ na besie na batánu kalɛ na ɔma ɔni baalɔ Ai ɔni nkya Betel ɔƒɛ katukɔ na ude Bet-Awen use. Na bésie bátánu sɔsɔ.

³ Na bási bébo bábasu Yosua banini, “Ɔsɔ utalɛka bekpone bammɔ ƒui bakɔ besie betékpoku Aiƒuɔ. Mmomu tala bekpone aani mpim inyɔ iye ɛtɛ na betékpoku-ma. Ɔsika ɔma ɔmmɔ útebomo na bekyuli bammɔ lɛnɔ beeemomo.”

⁴ Anwuɔsu Yosua ɔ́tala Israelƒuɔ bekpone mpim ɛtɛ ka betékpoku-ma. Nsu ka bésie ni, usi bakɛ na básɔ bénwini.

⁵ Na Aiƒuɔ bekpone bábi básiaku-ma bási ɔma ɔmmɔ kayakun kenye úti útédu atakpɛ adi akɔ. Na bádu Israelƒuɔ bekpone nkyuli aani avlaatɛ-ɛku uwi ɔni na békeli baayu kɔbi kɔdi. Mmɔ na Israelƒuɔ enu áƒɛ-ma na liƒu lise kalɔ lɛɛda-ma.

⁶ Amu na lɛla lɛni nálɛ mɛni ɔsu ni, ɔ́bla Yosua ku Israelƒuɔ benengu kalɛ kadi. Na báni bana lɛwu bábuɛ na báyu bébi kalɔ na Unwoti Bunyimi Adaka anumi. Na bébi kalɔ mmɔ úti útédu useyi uwi. Na béti ɔtumu bewi lili úti ɔɔtina kalɛ baadu kɔnyana.

⁷ Amu na Yosua ɔ́kpali Katɔti na ɔ́su ɔnini, “O Unwoti Katɔti Ɔni Ntulo Ƒui, báyila-bu udu! Na bi ɔsu na átaya na bɔsɔ bɔkya Yordan Ketu ɔvi ɔni nye mmomu?

⁸ Unwoti nsɔ naaati lɛla lɛni lɛsu muedi ɔni na bula bekpone békeli na bátakana bunye bɔsiaku bula bekisine mɛni.

⁹ Kanaanƒuɔ ku bekyuli ƒui badubo bunu ala ani mɔɔlɛ́ mɛni. Na badubo bɔsala na bebo-bu ƒui badu kede kede. Na si ɔmɛni udu ɔlɛ ni, dɛ na adubɔblaku ƒula lɛnyi lɛni lɛƒɔ kuye mɛni?”

¹⁰ Amu na Unwoti ɔ́su Yosua ɔnini, “Ta pla! Bi ɔsu na ebi kalɔ lɛni?

¹¹ Mɔɔsu-ɔ ka Israelƒuɔ bábla likpidi. Na báta bénye ɔda ɔni na líbo-mii mmɔ lɛlɔ. Na béti ala ani na lɛ́su-mi ka bayila mmɔ adi. Na mɔɔsu-ɔ ka buyu na béyu na bányi ɔkɔ lɛnɔ básia-nwu lɛlɔ na béti ala ammɔ bakya bana ala akɔ.

¹² Ɔmɛni ɔsu na Israelƒuɔ bátakana bunye bɔsiaku bana bekisine na bukeli mmomu na bekeli-ma. Ɔsika ala ani udu na ɔlɛka bɛyila ni, bíti-nya bɛkya lɛlɔ. Ɔmɛni ɔsu na ɔ́lɛku-mii lɛni. Na nsɔ lɛɛɛdubo bukpo bute-mii lɛnɔ wetédu uwi ɔni na bɛyila lɛla biala lɛni na lɛ́su-mii.”

¹³ Ɔmmɔ kama Unwoti ɔ́su Yosua ɔnini, “Ta na asu bekyuli bammɔ ka babla lɛlɔ sɛɛn bese kaduɛ na bɔsa kɔnaadi. Ɔsika ami Unwoti Israel Katɔti mɔɔsu-ma nnii, ‘Ala ani na líbo-mii ɔda nnii biti-nya bɛkpa bite-mi ni, bíti adi bɛkya lɛlɔ. Na mɔɔsu-mii ka bilakana bina bekisine anumi bunye bɔsiaku úti útédu ka bídie ala ammɔ bíboku.

¹⁴ “ ‘Anwuɔsu ya na bekyuli bammɔ bebo-mi anumi kɔnaadi ɔtanta na bebenye bana kaba kenye. Na kaba kani na Unwoti ɔ́lɛ lɛnumi ni, na balɛ bebo ɔtɔ kenye. Na ɔtɔ ɔni na Unwoti ɔ́lɛ lɛnumi ni, balɛ bebo na kaduli kenye. Na kaduli kammɔ banana badubɔlɛ bebo unwi unwi.

¹⁵ Na ukyuli ɔni ndubɔlɛ lɛnumi ni, nwuna kudɔ na ala ammɔ akya. Na beti ogya bakyula-nwu ku nwuna akɛla ƒui. Ɔsika úti kɔƒa kubendi uboku Israelƒuɔ lɛlɔ. Na útadi bunyimi bɔni na Katɔti únyimi-ku Israelƒuɔ lɛlɔ.’ ”

¹⁶ Amu ka kadi kégye ɔtanta Yosua ɔ́ya na Israelƒuɔ ƒui bebenye-nwu anumi na kaba kaba kenye. Na Katɔti ɔ́lɛ Yuda kaba lɛnumi.

¹⁷ Na Yosua ɔ́ya na Yuda kaba kammɔ kalɛ kebo na lɛtɔ kenye. Na Katɔti ɔ́lɛ Serah ɔtɔ lɛnumi. Na Yosua ɔ́ya na Serah ɔtɔ bekyuli bálɛ bebo bebenye kaduli kaduli kenye. Na Unwoti ɔ́lɛ Sabdi kaduli bekyuli lɛnumi.

¹⁸ Na Yosua ɔ́ya na Sabdi kaduli banana bálɛ bebo unwi unwi. Na Akan ɔni ndi Karmi ubidi na ɔdi Sabdi uwɔ ni, Katɔti ɔ́lɛ-nwu lɛnumi.

¹⁹ Ɔmmɔ kama Yosua úye Akan ɔnini, “Mina ubi, die lɛlɔ kalɔ na Unwoti ɔni ndi Israelƒuɔ Katɔti anumi na asu lɛla lɛni na ábla. Na teti lɛla lɛdi tabɛla.”

²⁰ Amu na Akan údie kenye ɔnini, “Lɛ́bla likpidi lɛ́ƒiɔ Unwoti Israel Katɔti sɔsɔ. Ya na lɛsu lɛla lɛni lɛ́bla.

²¹ Uwi ɔni bunye kekpo kemmo ni, mmɔ na lɛ́nu Babilon awu buni gyɔlɔɔ ɔdi ku sika ɔƒualadi ebi aƒɔ alɔ ku sika ugyiedi ugyii unwi ɔni unu metulo sika ɔƒualadi ebi koƒo kunwi. Ka lɛ́nu ala ammɔ ni, anumi egyie-mi na líti-nya. Na adubɔnu-nya na mina kevo kemmo ka líku-nya lɛkya mina ɔtɔ kalɔ. Na sika ɔƒualadi ebi ammɔ akya-nwu kalɔ.”

²² Amu na Yosua ɔ́tala bekyuli badi ka batánu si sɔsɔ na Akan úku ala ammɔ ɔkya nwuna ɔtɔ kalɔ, na sika ɔƒualadi ebi ammɔ ɔkya-nwu kalɔ.

²³ Amu na bekyuli bammɔ bétéku ala ammɔ balɛku kevo kammɔ kemmo beboku. Na béti-nya béboku Yosua na Israelƒuɔ lɛnɔ bánu ala ammɔ. Na Yosua úti ala ammɔ útéwi Unwoti anumi.

²⁴ Ɔmmɔ kama Yosua ku Israelƒuɔ béƒie Akan ku bebi bananabi ku belekubi ku nwuna ɔmantɛ bakɔ ku baƒonu ku bebuo beblidi ala betine bani na ubo ku sika ɔƒualadi ku awu gyɔlɔɔ ku sika ugyiedi ugyii ku nwuna kevo ku ala ani nse-nwu, na béti anwu ku ala ammɔ ƒui bésienku kɔwɛ kɔni baalɔ banii Akɔ nwuna kalɔ ndi Lɛbibo Kɔwɛ.

²⁵ Na Yosua ɔ́su-nwu ɔnini, “Bi ɔsu na áya na lɛbibo lɛmɛni líbo-bu lɛlɔ. Unwoti ɔdubɔya na awɔ lɛnɔ ebo abi ɔmwi!” Amu na Israelƒuɔ bammɔ bébo Akan atabi badu. Na bébo nwuna bebi ku bebuo bammɔ lɛnɔ atabi badu. Na bákya bana ƒui ku ala ammɔ ogya.

²⁶ Na bála atabi lisu pim lɛdi bálɛ Akan lɛlɔ. Na atabi lisu lɛmmɔ lɛlɛ mmɔ úti úbedu ɔmwi. Ɔmmɔ ɔsu na baalɔ kesii kammɔ banii Lɛbibo Kɔwɛ. Na ɔmɛni ɔ́ya na Unwoti kɔnyi kati kati kɔmmɔ kɔyɔ.