Yosua 5 - Katɔti Ɔku Kedee

¹ Amu ka Amoriƒuɔ baga bani nlie bésie Yordan Ketu ɔƒɛ kanukɔ ku Kanaanƒuɔ baga bani nlie ɛpu amadɔ ƒui bénu kalɛ na Unwoti ɔ́ya na Yordan ɔ́kwii na Israelƒuɔ bésie bávi-nwu kemmo ni, liƒu lɛda-ma geen na enu áƒɛ-ma na Israelƒuɔ bamɛni ɔsu.

Yosua Úkulo Israelƒuɔ Ago Na Gilgal

² Uwi ɔmmɔ kemmo kani na Unwoti ɔ́su Yosua ɔnini, “Wia atabi na adɔ-nya kunye na eti ekulo Israelƒuɔ bammɔ ago.”

³ Anwuɔsu Yosua úkulo-ma ago aani kalɛ kani na Unwoti ɔ́su-nwu mmɔ. Na kesii kani na úkulo-ma ago mmɔ baalɔ banii Aralot na nwuna kalɔ ndi Ago Bukulo Kɔbi.

⁴ Lɛla lɛni ɔsu na Unwoti ɔ́ya na békulo ago ndi ka banana bani ƒui nédu kekpo buse na báta bási Egyipte ni, békpi na kalɔ kakwiidi kemmo.

⁵ Na banana bammɔ ƒui békulo ago. Nsu banana bani ƒui na báwɔ na bana ulu busie na kalɔ kakwiidi kemmo ni, bétekulo tɔ ago.

⁶ Na akwa aavlene na Israelƒuɔ beti bésie bana ulu. Na uwi ɔmmɔ kemmo ni, banana bani ƒui nédu kekpo busie ƒui békpi ka bátádi Unwoti litemi lɛlɔ ɔsu, ɔsika Unwoti úse kenye ka balanu kalɔ kani egyiibi ntu mɔɔyu emini aani uwɔ na kana lɛlɔ bebuo baayu anyi ntu pii mmɔ. Na aka na ɔ́su bana bati kuuku use ka wete-ma.

⁷ Na bana bebi bani náta bákɔ ƒui ni, bétekulo ago. Anwuɔsu kaba kawɔdi kamɛni na Yosua úkulo ago.

⁸ Na uwi ɔni békulo-ma ago báwɔlɔ ni, bekyuli bammɔ belie mmɔ úti útédu ka bana lɛlɛ lɛmmɔ lɛ́sa.

⁹ Amu na Unwoti ɔ́su Yosua ɔnini, “Kɔƒa kɔni mɔɔdu-mii ka bɛdi kabla bablane bite Egyipteƒuɔ ni, lídie-ku bina lɛlɔ ɔmwi.” Anwuɔsu básia kesii kammɔ lɛnyi banii Gilgal. Na lɛni kani baalɔ mmɔ úti úbedu ɔmwi.

¹⁰ Uwi ɔni na Israelƒuɔ bamu bakya Gilgal na kalɔ kani nwi ƒiaa na Yeriko kudɔ ni, bádi Kukpi Lili Bɔvia limeyi useyi ɔmmɔ na kɔbuli kɔmmɔ limeyi leevu-inedi lɛlɔ.

¹¹ Na Kukpi Lili Bɔvia limeyi bɔdi bɔwɔlɔ kadi kégye ni, bádi Kanaan kalɔ kammɔ edula adi ani ndi anta eƒidi ku bodobodo ɔni kemmo na bɔnyi buuubo.

¹² Na ɔ́si uwi ɔmmɔ kama ni, adila ani naasí katɔ na baalɔ-nya banii manna áda bɔna aya. Na Israelƒuɔ básɔ bátadi ɔdi kudii. Na edula ani kani nkya Kanaan kalɔ lɛlɔ kani na baadi.

Yosua Ɔ́nu Katɔti Ukpone Unengudi

¹³ Uwi ɔni na Yosua ɔni uude Yeriko ni, ka ɔ́talaku anumi ni, kɔnakunwi kani na ɔ́nu ɔnana ɔdi ka unye-nwu anumi na ɔ́da kewii kagyɔlɔɔ kadi. Amu na Yosua ɔni ude-nwu na úye-nwu ɔnini, “Adi bula bekpone akɔ unwi, munuu ukisine na adi-bu?”

¹⁴ Na ukpone ɔmmɔ údie kenye ɔnini, “Lɛɛɛdi bana akɔ ɔdi. Mmomu Katɔti bekpone ɔtɔnkune ƒui na ndi. Na ɔƒɛni na líbo.” Amu ka Yosua únu lɛni ni, ɔ́yu ubi kalɔ kɔnakunwi na ɔ́su-nwu ɔnini, “Buvele, Ati, bi na aayɔ́ ka ami, ƒula kabla ɔblane, lɛbla lite-ɔ?”

¹⁵ Mmɔ na Unwoti Ukpone Ɔtɔnkune ɔmmɔ ɔ́su Yosua ɔnini, “Da ƒula lɛgbanvuo die. Ɔsika kesii kani na enye mɛni kese kedee.” Na Yosua ɔ́da nwuna lɛgbanvuo údie aani kalɛ na Unwoti ukpone ɔmmɔ ɔ́su-nwu.