Yosua 22 - Katɔti Ɔku Kedee

Yosua Ɔ́ya Na Ruben Ku Gad Kaba Ku Manase Kaba Kakɛ Bekyuli Bénwini Bésie Bana Keliekɔ

¹ Ɔmmɔ kama Yosua ɔ́lɔ Ruben ku Gad kaba ku Manase kaba kakɛ bekyuli ƒui ɔ́sala.

² Na ɔ́su-ma ɔnini, “Bɛ́di Unwoti kabla ɔblane Mose ɔda bubo bɔni na úte-mii mmɔ lɛlɔ kaduɛ. Na binu mina litemi lɛni na lɛ́su-mii lɛnɔ.

³ Na litemi lɛmmɔ ndi ka bitenwini kama bitakya bina banwa Israelƒuɔ uwi ɔmɛni ƒui kemmo. Ɔƒɛni lɛnɔ bɛ́nu kaduɛ na bɛ́di bina Unwoti Katɔti ɔda ɔni úbo-mi lɛlɔ.

⁴ Na aani kalɛ na ɔ́su úse ni, bina Unwoti Katɔti ɔ́ya na kaba kammɔ ƒui bákɛ atu bɔyɔ. Anwuɔsu bɛsɔ binwini na biteesie bitélie bina kalɔ lɛlɔ. Na bitélie kalɔ kani na Unwoti kabla ɔblane Mose úti úte-mii aani bina kadikɔ na Yordan ɔƒɛ katukɔ mmɔ.”

⁵ Nsu Yosua ɔ́sɔ ɔ́su-ma ɔnini, “Binyimo ɔda ɔni na Unwoti kabla ɔblane Mose úbo-mii. Na ɔda bubo bɔmmɔ ndi ka bɛyɔ bina Unwoti Katɔti na bɛsia nwuna litemi anu kaduɛ, na bɛdi nwuna ɔda bubo lɛlɔ, na biti lɛlɔ bɛsia-nwu lɛlɔ, na biti bina kayi ku kɔyu ƒui bitaabla-nwu kabla.”

⁶ Anwuɔsu Yosua úte-ma kusɛ kusɛ na ɔ́ya na bénwini bésie bana kalɔ lɛlɔ.

⁷ Mose néle kalɔ kani nkya Basan úte Manase kaba kakɛ bekyuli. Nsu kaba kakladi bekyuli ama ni, Yosua néle bana kalɔ úte-ma na Yordan ɔƒɛ kanukɔ kakɛ ku Israel kaba bekyuli bakladi. Amu uwi ɔni na Yosua ɔdubo-ma ulu budie ka beteesie bana kuliekɔ ni,

⁸ úti Unwoti kusɛ kusɛ ku etemila amɛni údie-ma ulu. Na ɔ́su-ma ɔnini, “Ɔni na bínwini bísela ɔma mɛni ni, bina enu eyi ebu na bina ɔmantɛ bakɔ ku sika ugyiedi ku ɔƒualadi ku abuala lidu lidu emomo ebu. Na bɛkɛ adala pii.” Na ɔ́sɔ ɔ́su-ma ɔnini, “Si bísie ni, akɛla ani bɛ́kɛ bɛ́siku bina bekisine enu kemmo ni, bite bina banwa ɔdi.” Amu ka ɔ́tɛmiku-ma ɔ́wɔlɔ ni, ɔ́ya na bátɔlɔ.

⁹ Amu na Ruben ku Gad kaba ku Manase kaba bekyuli kakɛ bamɛni bénwini bésie bana keliekɔ. Na bada Israelƒuɔ bakladi bákya Silo na Kanaan kalɔ lɛlɔ. Na ama bátɔlɔ bésie Gilead kalɔ kani na Unwoti úbo Mose ɔda ka badubɔƒɔ babla bana kadikɔ.

Bátu Lɛkpabi Na Yordan Ɔvi

¹⁰ Uwi ɔni na Ruben ku Gad kaba ku Manase kaba kakɛ bétéduo Yordan Ketu kalɔ kani nkya Kanaan ni, bekyuli bamɛni bátu lɛkpabi bonwu lɛdi na ketu kammɔ kɔtu.

¹¹ Na ka Israelƒuɔ bakladi bénu ka bekyuli badi bakya baasu banini, “Rubenƒuɔ ku Gadƒuɔ ku Manase kaba kakɛ bekyuli bátu lɛkpabi bonwu lɛdi bálɛ Kanaan ɔmii lɛlɔ na Yordan kalɛkɛ lɛlɔ na ɔvi ɔni ndi Israelƒuɔ kalɔ” ni,

¹² Israelƒuɔ ƒui bátásala lisu na Silo ka betékpoku-ma.

¹³ Anwuɔsu Israelƒuɔ bátala Pinehas Katɔti Ɔkpane Eleasar ubidi ka uteesie Ruben ku Gad kaba ku Manase kaba kakɛ bekyuli bammɔ kudɔ.

¹⁴ Na bédie ɔtɔ benengu leevu bani ntɔnku Israel kaba ka basiaku-nwu.

¹⁵ Amu na bátásu Ruben ku Gad kaba ku Manase kaba kakɛ bekyuli banini,

¹⁶ “Israelƒuɔ ƒui benye Unwoti lɛnyi kemmo beeye-mii lɛla lɛni ɔsu na bɛ́bla lɛla likpidi lɛmɛni udu biti bɛta binye Israelƒuɔ Katɔti lɛlɔ? Ɔsika ɔbladu ɔmmɔ ɔ́ta únye Unwoti lɛlɔ ɔkɛnku lɛkpabi lɛni na bɛ́tu bite lɛlɔ ɔsu! Dɛ na ɔ́bla asa na bínwini kama bɛ́kya-nwu?

¹⁷ Binyimo lɛla lɛni nálɛku-bu na Peor ɔkɛnku likpidi lɛni bɔ́bla ɔsu. Unwoti ɔ́ya na ɔlɛ ukpidi ɔdi úbeduo-bu akɔ. Na úti úbedu ɔmwi kadi bɔɔmu bɔkya buubo abi ɔ́si ɔlɛ ɔmmɔ ɔsu. Na buuye-mii si ukpidi ɔmmɔ útemo-mii tɔ?

¹⁸ Na buuye-mii bɔnii bɛɛyɔ́ ka bɛsɔ binwini kama bɛkya Unwoti kunyɔdi? “Na si bɛ́ta bínye Unwoti lɛlɔ ɔmwi kadi ni, ɔdubuti kɔnyi ɔkya Israelƒuɔ ƒui kɔnaadi.

¹⁹ Anwuɔsu si kalɔ kani lɛlɔ na bilie kaaadia ka bɛkpa Unwoti ni, bɛta na bibo Unwoti kalɔ lɛlɔ na kesii kani na nwuna kakpakɔ kalɛ. Na bibelie-bu kudɔ. Na bitata bitenye Unwoti lɛlɔ na wabla aani si bula ƒui náta bunye-nwu lɛlɔ. Ɔkɛnku lɛkpabi lɛni na bɛ́tu bite lɛlɔ mɛni biti biibunku bula Unwoti Katɔti lɛkpabi.

²⁰ Na binyimo Serah ubidi Akan atu ɔkplu ani na ɔ́bla kalɛ na ɔ́bɛ úti ala ani na Unwoti ɔ́su-bu ka bɔyila-nya udu. Na ɔmmɔ ɔsu ɔ́ya na Unwoti kɔnyi kúbo bula ƒui lɛlɔ ɔni na ɔɔɔdi Akan lɛti nékpi ina ka anwu lɛti nábla likpidi lɛmmɔ.”

²¹ Amu na Rubenƒuɔ ku Gadƒuɔ ku Manase kaba kakɛ bekyuli bamɛni básu Israelƒuɔ batɔnkune bamɛni banini,

²² “Unwoti Katɔti ndi Katɔti Ɔyikune Ƒui. Na anwu ndi Unwoti, na ɔgyi lɛla lɛni ɔsu na bɔ́bla lɛla lɛmɛni. Na abu lɛnɔ bɔɔyɔ́ ka amii lɛnɔ bɛti lɛla lɛni ɔsu na bɔ́tu lɛkpabi lɛmɛni. Na si bɔtu na bɔ́tu-nwu ka buuti bɔta bunye Unwoti lɛlɔ iye ka bɔɔlɛ́-nwu kama ni, bibo kuƒi ka bɛdu-bu.

²³ Na si bɔtu na bɔ́tu-ni na bunwini kama bɔkya Unwoti iye buti-ni butaabla akpala lidu lidu ni, Unwoti ɔlati ɔni-bu kɔtu.

²⁴ “Mmomu bɔ́tu lɛkpabi lɛmmɔ, ɔsika bɔɔyia ka limeyi lɛdi ni, bina bawɔ badubɔta na basu bula bawɔ banii, ‘Bi na bibo bɔblaku Unwoti ɔni ndi Israelƒuɔ Katɔti?

²⁵ Ɔsika Unwoti néti Yordan Ketu ɔ́bla abu ku amii Rubenƒuɔ ku Gadƒuɔ ɔmii. Anwuɔsu biiibo-ku lɛla lɛdi bɔblaku Unwoti.’ Na bina bawɔ badubɔya na bula babi bada Unwoti bɔyia baya.

²⁶ “Ɔmɛni ɔsu na bɔ́tu lɛkpabi lɛmɛni. Na bútatu-ni ka buti butaabla bɔkyula akpala iye akpala adi.

²⁷ Mmomu bɔ́tu-ni búse aani likposela lɛni nse nte abu ku-mii ku bula bawɔ. Na bɔdubutaakpa Unwoti na nwuna Kevo ɔtɔ kenye na butaabla bɔkyula akpala ku edula akpala ku atu bɔyɔ akpala na mmɔ. Na bina bawɔ ku bula bawɔ banu bati ka bula ƒui bɔdi bekyuli benwi na bɔɔkpá Unwoti unwi.

²⁸ “Bula kasusu ndi ka si keegye kadi bina bawɔ báta baasu lɛla lɛdi lɛni ni, bula bawɔ badubɔsu-ma banini, ‘Bɛnu ka bula bati kuuku bátu lɛkpabi lɛni nse aani Unwoti lɛkpabi lɛni nlɛ nwuna kɔdi kevo ɔtɔ. Na lɛkpabi lɛmɛni liiise liiite akpala bɔbla. Mmomu ɔdi likposela lite bula bawɔ ku bina bawɔ ka bula ƒui bɔdi benwi.’

²⁹ “Na bútata bútenye Unwoti lɛlɔ iye bɔ́lɛ-nwu kama kudii. Na bútatu lɛkpabi lɛdi na butaabla akpala nina lɛlɔ. Ntu Unwoti ɔni ndi bula Katɔti lɛkpabi lɛni na ɔ́tu lɛlɔ kani na bɔdubutaabla bula akpala.”

³⁰ Amu ka Katɔti Ɔkpane Pinehas ku benengu ku Israelƒuɔ batɔnkune bani na bátala mmɔ bénu kenye kani na Rubenƒuɔ ku Gadƒuɔ ku Manase kaba kakɛ bekyuli bédie mmɔ ni, kaƒɔ káyɔ-ma.

³¹ Amu na Katɔti ɔkpane Pinehas ɔni ndi Eleasar ubidi ɔ́su-ma ɔnini, “Ɔƒɛni na bɔ́nu bɔ́ti ka Unwoti ɔkya-bu akɔ. Na bítata bítenye Unwoti lɛlɔ, na ɔmɛni ɔsu bɛ́ƒɔ-bu bɛlɛku Unwoti kɔtu bɔni kemmo.”

³² Amu na Pinehas ku batɔnkune bakladi béye ulu básiku Ruben kaba ku Gad kaba bekyuli kudɔ na Gilead, na bénwini bésie Kanaan. Na bátásu Israelƒuɔ kalɛ na ala ƒui ávi.

³³ Na ka Israelƒuɔ bénu etemila ammɔ ni, kaƒɔ káyɔ-ma na bémwi Katɔti. Anwuɔsu básɔ bétesie bétetékpoku-ma na bɔyila-ma udu.

³⁴ Ɔmɛni ɔsu Rubenƒuɔ ku Gadƒuɔ básu banini, “Lɛkpabi lɛmɛni lɛdi likposela lite bula ƒui uti ɔtina ka Unwoti ndi Katɔti.” Anwuɔsu básia lɛkpabi lɛmmɔ lɛnyi banii Likposela.