Yosua 2 - Katɔti Ɔku Kedee

Yosua Ɔ́tala Bekyuli Badi Ka Batábɛ Na Beduo Yeriko

¹ Ɔmmɔ kama ni, Nun ubidi Yosua ɔ́tala batu inyɔ badi ɔ́siku Sitim kesii kani bákya. Na ɔ́su-ma ɔnini, “Bɛbɛ bitánu Kanaan kalɔ kammɔ. Ɔni ntulo ƒui ndi ka biduo bana ɔma unengudi ɔni baalɔ banii Yeriko na bɛnu mmɔ kalɛ na use.” Amu ka bétéduo Yeriko ni, bésie bétéduo uleku ɔyalɛ ɔni baalɔ banii Rahab kaduli na bátɛ mmɔ.

² Amu na Yeriko ɔga ɔmmɔ únu ka Israelƒuɔ badi bébo ɔma ɔmɛni usien bébelie mɛni na bávi bánu bula kalɔ ƒui.

³ Ɔmɛni ɔsu Yerikoƒuɔ ɔga ɔmmɔ ɔ́tala bekyuli ɔ́kya Rahab ka basu-nwu banini, “Baƒɔ bani na áƒɔ ákya ƒula kaduli mmɔ ni, búbo na bebo ka bebeyu banu bula kalɔ ƒui. Anwuɔsu die-ma te pla!”

⁴ Nsu Rahab ka úti batu inyɔ bani bási Israel mmɔ ɔ́bala ɔsu ni, údie kenye ɔnini, “Sɔsɔ na ɔdi ka baƒɔ badi bébo mina kaduli bɔdi. Nsu lɛɛɛgyi kesii kani bási.

⁵ Na uwi ɔni na ɔƒɛ úsela kanukɔ ni, bévele ulu na bátɔlɔ. Na bátɔlɔ asa na bákalɛ ɔma kayakun kammɔ. Na ńteye-ma lɛnɔ kesii kani bésela. Na si bɛ́sia-ma kama kɔnakunwi ngyi ka bɛdubo-ma bɔnu.”

⁶ Nsu Rahab ɔ́ya na bákɔ bésie ɔtɔ eli na bátábɛ livo lɛdi kalɔ.

⁷ Anwuɔsu bekyuli bani na ɔga ɔ́tala mmɔ bávi balɛ ɔma kayakun kammɔ na bátábi básiaku Israelƒuɔ inyɔ bammɔ. Ka bánya bávi bálɛ kani bákalɛ kayakun kammɔ. Na ɔga batalane bamɛni básia Israelƒuɔ inyɔ bammɔ kama laa bétédu Yordan Ketu kaviakɔ. Nsu bátanu-ma.

⁸ Na asa na Israelƒuɔ inyɔ bamɛni badubo bɔtɛ usien ɔmmɔ ni, Rahab ɔ́kɔ úsie-ma kudɔ na ɔ́su-ma ɔnini,

⁹ “Ngyi ka Unwoti úuti kalɔ kamɛni úte-mii. Ɔsika ukyuli biala ɔni nkya kalɔ kamɛni kemmo ɔtɔtɔ ɔɔgyú-nwu geen ɔ́si amii ɔsu.

¹⁰ Na búnu kalɛ na Unwoti ɔ́ya na Ɛpugyie ɔ́kwii uwi ɔni na bísie bɛ́via Egyipte kalɔ bɛdubo. Na bɔ́sɔ búnu lɛnɔ kalɛ na bɛ́du Amoriƒuɔ baga inyɔ bani nlie Yordan ɔƒɛ katukɔ kakɛ na baalɔ-ma banii Sihon ku Og.

¹¹ Uwi ɔni na bɔ́nya búnu ala amɛni ƒui ni, ɔtɔtɔ úse kalɔ ɔɔgyú-bu. Na enu ése kalɔ aaƒɛ-bu ɔ́si amii ɔsu. Ɔsika Unwoti Katɔti ɔmɛni ndi katɔ ku kalɔ ɔti.

¹² “Na mɔɔwia ka bise-mi kenye na Katɔti lɛnyi kemmo ka bɛdubɔbla ami ku mina kaduli bekyuli lɛƒɔndia aani kalɛ na lɛ́bla líte-mii. Anwuɔsu bɛbla likpose lɛla lɛdi bɛtina-mi kalɛ na makana maƒɔ-mii madi.

¹³ Na bise kenye ka bɛɛɛdubo bula ɔdi bɔdu! Mina ɔti iye mina uni iye mina banwani bananabi ku belekubi ku bana kɔduli bekyuli ni, biládu bula ɔdi!”

¹⁴ Na Israelƒuɔ batu inyɔ bamɛni básu Rahab banini, “Si bútadi lɛla lɛni bɔdubo-ɔ bɔsu mɛni lɛlɔ ni, Katɔti ɔdu-bu. Na si átasu ukyuli ɔdi lɛla lɛni ɔsu búbo mɛni ni, buusé-ɔ kenye ka bɔdubɔbla-mii lɛƒɔndia si Unwoti úti kalɔ kamɛni ɔ́kya-bu enu kemmo.”

¹⁵ Na Rahab ɔtɔ ɔmmɔ ɔdanku ɔma ɔmmɔ lɛwoduku bonwu lɛmmɔ. Ɔmɛni ɔsu ɔ́lɛmi nwuna ƒansili na ɔ́ya na béti kabuli bébo bada. Na Israel batu inyɔ bammɔ básia kabuli kammɔ lɛlɔ báyu bátɔlɔ.

¹⁶ Uwi ɔni na badubo bɔtɔlɔ ni, Rahab ɔ́su-ma ɔnini, “Bikeli bɛsia abi lɛlɔ ulu ɔmmɔ. Na si bídu abi lɛlɔ mmɔ ni, na bɛbɛ bilie mmɔ emeyi atɛ úti útédu ka bekyuli bani mɔɔsia-mii kama mmɔ básɔ bénwini. Ɔmmɔ kama ni, ulu ɔdubɔbla nwaa na bɛtɔlɔ. Si ɔɔɔdi lɛni ni, bekyuli bammɔ badubɔnu-mii.”

¹⁷ Na asa na Israelƒuɔ batu bammɔ badubɔtɔlɔ ni, básu Rahab banini, “Lɛla lɛni na éye-bu ni, bɔdubɔdi linyese lɛmmɔ lɛlɔ.

¹⁸ Na ɔmɛni ndi lɛla lɛni na ɔlɛka abla! Si búbeduo kalɔ kamɛni kemmo ni, na eti kɔdi kugyiedi kɔmɛni ebo ada ƒansili ɔni lɛlɔ bɔ́sia bɔɔlɛ́ mɛni lɛlɔ. Na alɔ ƒula ɔti ku uni ku ƒula banwani bananabi ku ƒula ɔtɔ bekyuli ƒui na babasala lisu na ƒula kaduli.

¹⁹ Na si ukyuli ɔdi ɔ́vi ɔlɛ kaduli kamɛni kemmo úsie ɔblɔnu lɛlɔ na útásiaku kukpi kɔdi utadu-bu kɔtɔ. Ɔsika útasi-bu. Nsu si ukyuli ɔdi ɔ́kya kaduli kammɔ kemmo na lɛla lɛdi lɛ́bla-nwu ni, na ɔ́si-bu.

²⁰ Nsu si ásu ukyuli ɔdi lɛla lɛni ɔsu búbo mɛni ni, tasu anii lɛla lɛni na éye-bu ni, butadi linyese lɛmmɔ lɛlɔ!”

²¹ Anwuɔsu Rahab únu kalɔ na ɔ́ya na bátɔlɔ. Uwi ɔni bátɔlɔ ni, Rahab úbo kɔdi kugyiedi kɔmmɔ ɔda ƒansili ɔmmɔ lɛlɔ.

²² Amu na Israelƒuɔ batu bammɔ bátɔlɔ bésie abi lɛlɔ mmɔ na bátábɛ. Na ɔga batu bammɔ bátɛ-ma anu laa na ulu lɛlɔ emeyi atɛ. Nsu bátanu-ma. Ɔmmɔ ɔsu básɔ bénwini bésie Yeriko.

²³ Ɔmmɔ kama Israelƒuɔ batu bammɔ báyu abi eli mmɔ bébo kalɔ. Na bátávia Yordan Ketu na bénwini bésie Yosua kudɔ. Na básu-nwu lɛla biala nálɛ.

²⁴ Na básu-nwu banini, “Bɔɔƒɔ́ taadi ka Unwoti úti kalɔ kammɔ ƒui úte-bu. Ɔsika bekyuli bani ƒui nkya kalɔ kammɔ lɛlɔ ɔtɔtɔ úse kalɔ ɔɔgyú-ma ɔ́si abu ɔsu.”