Yosua 19 - Katɔti Ɔku Kedee

Yosua Úle Kalɔ Kadi Úte Simeon Kaba

¹ Ka Yosua ɔ́sɔ ɔ́tu egulabi kunyɔdi ɔ́nu ni, Simeon kaba ɔdi nálɛ. Na bana kalɔ kakya Yuda kaba ɔdi akɔ.

² Na lɛma lɛmmɔ ndi Beer-Seba iye Seeba ku Molada

³ ku Hasar-Sual ku Bala ku Asem

⁴ ku Eltolad ku Betul ku Horma

⁵ ku Siklag ku Bet-Markabot ku Hasar-Susa

⁶ ku Bet-Lebaot ku Saruben na ɔdi lɛma leevu-ɛtɛ ku nina akpaklɔ.

⁷ Ain ku Rimon ku Etar ku Asan. Anwu lɛnɔ ɔdi lɛma ine ku nina akpaklɔ

⁸ ku akpaklɔ ani nkya lɛma lɛmɛni amadɔ úti útédu Baalat-Beer ɔni lɛnɔ baalɔ banii Ramat ku kalɔ kakwiidi na kada kakɛ. Kalɔ kamɛni béle béte Simeon kaba bekyuli.

⁹ Na ka kalɔ kani na béti béte Yuda kaba bekyuli kébomo kágya ɔsu ni, bámini kadi béte Simeon kaba.

Yosua Úle Kalɔ Kadi Úte Sebulon Kaba

¹⁰ Kalɔ katɛdi ka Yosua ɔtu egulabi ni, kese Sebulon kaba lɛlɔ. Na kalɔ kani béti béte-ma késie kétédu Sarid.

¹¹ Na ɔkɛ ɔƒɛ kanukɔ útédu Marala ɔkɛ útédu Dabeset, na útáwɔlɔ Yokneam Kɔwɛ kemmo.

¹² Na údeyi ɔ́kɛ Sarid ɔƒɛ katukɔ, na ɔkɛ Kislot-Tabor ɔmii lɛlɔ na ɔkɛ Daberat na údeyi ɔkɔ útásia Yaƒia.

¹³ Na ɔkɛ ɔƒɛ katukɔ kakɛ úsie Gat-Heƒer ku Et-Kasin. Na ɔkɛ Rimon na údeyi ɔkɛ Nea.

¹⁴ Na ɔ́bu ɔ́kɛ katɔ kakɛ úti útédu Hanaton na nwuna kenye kátáwɔlɔ Yiƒta-El Kɔwɛ kemmo.

¹⁵ Na ɔdanku Katat ku Nahalal ku Simron ku Yidala ku Betlehem. Na lɛma lɛmmɔ lɛdi leevu-inyɔ ku nina akpaklɔ.

¹⁶ Na lɛma lɛmɛni ku nina akpaklɔ ndi kalɔ kani béti béte Sebulon kaba.

Yosua Úle Kalɔ Kadi Úte Isakar Kaba

¹⁷ Kalɔ kenedi ka Yosua ɔ́sɔ ɔ́tu egulabi ɔ́nu ni, késie Isakar kaba lɛlɔ.

¹⁸ Na bana lɛma ndi Yesreel ku Kesulot ku Sunen

¹⁹ ku Haƒraim ku Sihon ku Anaharat

²⁰ ku Rabit ku Kision ku Abes

²¹ ku Remet ku En-Ganim ku En-Hada ku Bet-Pases.

²² Na ɔmii ɔmmɔ útáwɔlɔ Tabor Kɔbi ku Sahasima ku Bet-Semes útédu Yordan Ketu. Na lɛma lɛmmɔ ƒui lɛdi leevu-ɛku ku ana akpaklɔ.

²³ Na lɛma lɛmɛni ku ana akpaklɔ na beti béte Isakar kaba.

Yosua Úle Kalɔ Kadi Úte Aser Kaba

²⁴ Kalɔ kalɔndi ni, Yosua ka ɔtu egulabi ni, késie Aser kaba lɛlɔ.

²⁵ Na bana lɛma lɛmmɔ lɛdanku Helkat ku Hali ku Beten ku Aksaƒ

²⁶ ku Alamelek ku Amad ku Misel. Na ɔmii ɔmmɔ ɔsi Karmel Kɔbi ku Sihor-Lidnat na ɔƒɛ kanukɔ kakɛ.

²⁷ Na údeyi ɔ́kɛ ɔƒɛ katukɔ kakɛ na úti úsie Bet-Dagon, na útédu Sebulon Kɔwɛ na Yiƒta-El na ɔkɛ katɔ kakɛ úsie Bet-Emek ku Neiel, na úti úsie Kubul

²⁸ ku Ebron ku Rehob ku Hamon ku Kana úti útédu Sidon-bonwu kemmo.

²⁹ Na ɔmii ɔmmɔ ɔkanti ɔkɛ Rama úti útédu ɔma ɔni na bátu kowodu bámana na baalɔ-nwu Tiro. Na údeyi ɔ́kɛ Hosa. Na ɔkɛ utédu Mediterenia Ɛpu na Aksib kalɛkɛ,

³⁰ ɔdanku Uma ku Aƒek ku Rehob. Na lɛma lɛmmɔ ƒui lɛdi aavlanyɔ-inyɔ ku ana akpaklɔ.

³¹ Kɔlɔ ku lɛma lɛmɛni ku ana akpaklɔ na béti béte Aser kaba.

Yosua Úle Kalɔ Kadi Úte Naƒtali Kaba

³² Kalɔ kakundi ni, Yosua ɔ́tu egulabi ɔ́nu na késie Naƒtali kaba lɛlɔ.

³³ Na bana ɔmii ɔ́si Heleƒ ku Saananim kugyii kubendi lɛlɔ ku Adami-Nekeb ku Yabneel úti úsie Lakum. Na nwuna kenye kátáwɔlɔ Yordan Ketu.

³⁴ Na únwini ɔ́kɛ ɔƒɛ kanukɔ na Asnot-Tabor, na úti úsie Hukok, na útédu Sebulon na kada kakɛ ku Aser na ɔƒɛ kanukɔ ku Yordan Ketu na ɔƒɛ katukɔ kakɛ.

³⁵ Na lɛma lɛni bátu awodu bámana ndi Sidim ku Ser ku Hamat ku Rakat ku Kineret

³⁶ ku Adama ku Rama ku Hasor

³⁷ ku Kedes ku Edrei ku En-Hasor

³⁸ ku Yiron ku Migdal-El ku Horem ku Bet-Anat ku Bet-Semes. Na lɛma lɛmɛni lɛdi lɛma leevu-yaalenwi ku ana akpaklɔ.

³⁹ Lɛma lɛmɛni ku nina akpaklɔ na béti béte Naƒtali kaba.

Yosua Úle Kalɔ Kadi Úte Dan Kaba

⁴⁰ Kalɔ maatɛdi ni, ka Yosua ɔtu egulabi ni, késie Dan kaba lɛlɔ.

⁴¹ Na lɛma lɛmmɔ ndi Sora ku Estaol ku Ir-Semes

⁴² ku Saalbim ku Ayalon ku Yitla

⁴³ ku Elon ku Timna ku Ekron

⁴⁴ ku Elteke ku Gibeton ku Baalat

⁴⁵ ku Yehud ku Bene-Berak ku Gat-Rimon

⁴⁶ ku Me-Yarkon ku Rakon. Na ɔkɛ mmɔ útédu Yopa.

⁴⁷ Na ka Danƒuɔ bamɛni báyila bana kalɔ kadi ni, bésie na bétékpo-ku Lesemƒuɔ na bádi-ma lɛlɔ na bádu bekyuli bammɔ ƒui na béti bana kalɔ kammɔ. Amu na bétélie mmɔ na bávumana ɔma ɔmmɔ lɛnyi na báti básia banii Dan. Na Dan ɔmmɔ ɔdi bana ɔti kuuku lɛnyi.

⁴⁸ Na kalɔ ku lɛma lɛmɛni ku ana akpaklɔ na béti béte Dan kaba.

Israelƒuɔ Béti Kalɔ Kadi Béte Yosua

⁴⁹ Na ka Israelƒuɔ béle kalɔ kammɔ báwɔlɔ ni, bébu kakɛ kadi na béti-ka béte Yosua ɔni ndi Nun ubidi.

⁵⁰ Na ɔda ɔni na Unwoti úbo-ma ɔsu ni, béti ɔma ɔni na Yosua údie béte-nwu. Na ɔma ɔmmɔ ndi Timnat-Sera ɔni ntɛ Eƒraim abi lɛlɔ. Na ɔ́sɔku ɔma ɔmɛni ɔ́da na úti mmɔ ɔ́bla nwuna keliekɔ.

⁵¹ Egulabi na bátu béle kɔlɔ kɔmmɔ ƒui. Na Katɔti Ɔkpane Eleasar ku Yosua ɔni ndi Nun ubidi ku Israel batɔnkune bani nnye nte Israel kaba bekyuli néle kalɔ kammɔ na Silo na egulabi bɔtu kenye na beti béye Unwoti kasusu. Mmɔ na bátu Unwoti Adi Kevo ɔtɔ bálɛ kesii kani na bátu béte kaba kammɔ ƒui. Na ulu ɔmmɔ lɛlɔ básia asa na bákana kalɔ kammɔ bule báwɔlɔ.