Yosua 18 - Katɔti Ɔku Kedee

Yosua Úle Kɔlɔ Kɔkladi Kɔni Nébu

¹ Uwi ɔni na Yosua ku Israelƒuɔ békpo báƒɔ kɔlɔ kɔmmɔ ƒui báwɔlɔ ni, amu na Israelƒuɔ bása na Silo na bátu Unwoti Adi Kevo bálɛ mmɔ. Na kalɔ kammɔ kéduo-ma lɛlɔ bɔnu kalɔ na baadi-ka lɛlɔ.

² Nsu kaba maatɛ kébu ɔni na bétele tɔ kalɔ kadi bétete-ma na bakɛ bana kadikɔ.

³ Anwuɔsu Yosua úye Israelƒuɔ ɔnini, “Uwi ɔmani na bɛdubulie bitédu asa na bɛta na biteesie bitélie kalɔ kani na bina Bati kuuku Unwoti Katɔti úti úte-mii mmɔ lɛlɔ?

⁴ Na mɔɔyɔ́ ka bidie banana ɛtɛ na kaba biala kemmo. Na betésie na bavi kalɔ kammɔ ƒui kemmo na balɛ ɔmii bete kaba biala. Na si báwɔlɔ ni, na basɔ benwini bebo babasu-mi kalɛ bábla-nwu bávinku.”

⁵ Na Yosua ɔ́su-ma ka bele kalɔ kammɔ akpa maatɛ. Na Yuda kaba benye besie ɔmii ɔni ntɛ úsie kada kakɛ. Na Yoseƒ kaba benye besie ɔmii ɔni ntɛ úsie katɔ kakɛ.

⁶ Na ɔ́su-ma ɔnini, “Si béle-ka bɛ́wɔlɔ na binweni kalɛ bíle kalɔ kammɔ akpa maatɛ lɛlɔ kɔtɛ bɛsia kakunkɛ lɛlɔ na biti biboku-mi. Na ndubɔtu egulabi na liye bula Unwoti Katɔti kasusu lite-mii.

⁷ Na Lewiƒuɔ bani nkya-mii akɔ bitete-ma kalɔ kadi. Ɔsika bana kabla ndi ka beteeti akpala teete Unwoti kani. Na Gad kaba ku Ruben kaba ku Manase kaba kakɛ amu ni, Mose ɔni ndi Unwoti kabla ɔblane úle bana kalɔ úte-ma na Yordan Ketu ɔvi úti úsie ɔƒɛ katukɔ kakɛ.”

⁸ Amu ka banana bani na Yosua ɔ́tala ka besie na batálɛ lɛmii mmɔ badubo bɔtɔlɔ ni, úbo-ma ɔda kpakplaa ɔnini, “Bɛvi kalɔ kammɔ ƒui kemmo na bɛlɛ lɛmii na binweni kalɛ na bɛ́bla kabla kammɔ bɛ́vinku na biti biboku-mi. Na ndubɔtu egulabi lɛnu na Silo mɛni na liye Unwoti kasusu leti-mii.”

⁹ Anwuɔsu banana bammɔ bávi kalɔ kammɔ ƒui kemmo na bénweni bákya kakunkɛ kemmo kalɛ na béle kalɔ kammɔ akpa maatɛ ku lɛma lɛni nkya-ka kemmo. Na bénwini bébo Yosua kudɔ na Silo.

¹⁰ Na Yosua ɔ́tu egulabi ɔ́nu na úye Unwoti kasusu ute-ma. Na mmɔ na Yosua úle kalɔ kammɔ úte Israelƒuɔ kalɛ na ɔ́manku úte-ma.

Yosua Ɔ́tina Benyamin Kaba Bana Ɔmii

¹¹ Amu ka ɔ́tu egulabi ɔ́nu ni, Benyamin kaba bekyuli ɔdi nálɛ na úti kalɔ kani nkya Yuda ku Yoseƒ kaba ntɛ úte-ma.

¹² Na bana ɔmii ɔni nkya katɔ kakɛ úse kalɔ ɔ́si Yordan Ketu. Na ɔkɛ Yeriko katɔ kakɛ na ɔ́kɛ ɔ́vi kɔbi lɛlɔ útédu ɔƒɛ kanukɔ. Na nwuna kenye kétédu Bet-Awen kalɔ kakwiidi lɛlɔ.

¹³ Na ɔ́kanti úsie kada kakɛ na Betel ɔni basɔ baalɔ banii Lus. Na ɔkɛ Atarot-Adar Kɔbi kɔni ntɛ kada kakɛ na Bet-Horon.

¹⁴ Na ɔkɛ na útédeyi ɔkɛ ɔƒɛ kanukɔ kakɛ, na ɔkɛ kɔbi kɔni ntɛ Bet-Horon na kada kakɛ. Na ɔdubudu Kiriat-Baal ɔni basɔ baalɔ banii Kiriat-Yearim na ɔdi Yudaƒuɔ ɔma.

¹⁵ Na kada ɔmii ɔ́si Kiriat-Yearim úsie ɔƒɛ kanukɔ, na ɔkɛ úsie Neƒtoa Ketu kenye.

¹⁶ Na údeyi ɔkɛ kɔbi kɔni ntɛ Hinom úsie utédu Reƒaiƒuɔ Kɔwɛ kemmo na katɔ kakɛ. Na údeyi ɔkɛ Hinom utédu kɔwɛ úsie Yebusiƒuɔ kada ntɛ, na ɔ́kanti ɔkɛ En-Rogel.

¹⁷ Na údeyi ɔkɛ katɔ kakɛ, na ɔkɛ En-Semes, na ɔkɛ úsie Gelilot, na ɔ́kɔ úsie Adumim Kɔwɛ na ɔ́bu úsie Ruben ubidi Bohan lɛtakpɛ lɛlɔ.

¹⁸ Na ɔkɛ úsie katɔ na Bet-Araba Kɔbi na ɔkɛ utédu Yordan Ketu kɔwɛ kemmo.

¹⁹ Na udeyi ɔkɛ Bet-Hogla katɔ kakɛ ɔkɛ utédu kesii kani na Yordan Ketu ku Mma Ɛpu kasakɔ Na ɔmɛni ndi kada ɔmii.

²⁰ Na Yordan ndi ɔmii ɔni ntɛ úsie ɔƒɛ katukɔ kakɛ. Na ɔmɛni ndi kalɔ kani na béti béte Benyamin kaba bekyuli.

²¹ Na lɛma lɛni na béti béte Benyamin kaba bekyuli ndi Yeriko ku Bet-Hogla ku Emek-Kesis

²² ku Bet-Araba ku Semariam ku Betel

²³ ku Awim ku Para ku Oƒra

²⁴ ku Keƒar-Amonai ku Oƒni ku Geba. Lɛma lɛmmɔ libo leevu-inyɔ ku nina akpaklɔ.

²⁵ Ku Gibeon ku Rama ku Beerot

²⁶ ku Mispa ku Keƒira ku Mosa

²⁷ ku Rekem ku Yirpeal ku Taral

²⁸ ku Sela ku Ha-Eleƒ ku Yerusalem kesii kani na Yebusiƒuɔ bélie, ku Gibeat ku Kiriat-Yearim. Lɛdi lɛma leevu-ine ku nina akpaklɔ. Na ɔmɛni ndi kalɔ kani na béte Benyamin kaba bekyuli.