Yosua 14 - Katɔti Ɔku Kedee

Yosua Úle Kalɔ Kani Nkya Yordan Ɔƒɛ Kanukɔ Úte Israelƒuɔ

¹ Uwi ɔmmɔ ni, Eleasar ɔni ndi Unwoti Ɔkpane ku Yosua ɔni ndi Nun ubidi ku Israelƒuɔ ɔtɔ benengu béle Kanaan kalɔ béte Israelƒuɔ.

² Na bátu egulabi bánu kalɛ na badubuti bele kɔlɔ kɔmmɔ bete-ma aani kalɛ na Unwoti úbo Mose ɔda ɔnii ule kɔlɔ kammɔ ute Israelƒuɔ kaba yaalenwi ku kakɛ kani nébu.

³ Ɔsika Mose úule kalɔ kani nkya ɔƒɛ katukɔ na Yordan Ketu ɔvi úte kaba inyɔ ku kakɛ. Nsu Lewiƒuɔ bani nkya-ma akɔ ama ni, bétete-ma kadikɔ kadi.

⁴ Na Yoseƒ ɔtɔ kemmo bekyuli ni, kaba inyɔ kási mmɔ. Na kaba kammɔ ndi Manase ku Eƒraim. Na bétete Lewiƒuɔ kadikɔ kadi na kalɔ kammɔ. Mmomu lɛma na béte Lewiƒuɔ bammɔ ka basɔ belieku bana bebuo. Na béte-ma bebuo kadikɔ kalɔ lɛnɔ.

⁵ Na Yosua ku benengu bammɔ béle kalɔ kammɔ béte Israelƒuɔ aani kalɛ na Unwoti úbo Mose ɔda.

Béti Hebron Béte Kaleb

⁶ Limeyi lɛdi ni, bekyuli bani nási Yuda kaba kemmo bébo Yosua kudɔ na Gilgal. Na bekyuli bammɔ kemmo unwi ndi Kaleb ɔni ndi Yeƒune ubidi ɔdi Kenesini. Na úbasu Yosua ɔnini, “Agyi lɛla lɛni na Unwoti ɔ́su Mose, nwuna kabla ɔblane, uwi ɔni na bɔ́kya Kades-Barnea na ami ku-ɔ lɛlɔ.

⁷ Uwi ɔni na lɛ́ƒɔ akwa aavlene ni, Unwoti kabla ɔblane Mose ɔ́tala-mi na Kades-Barnea ka lisie na ntéyu kalɔ kammɔ kemmo ala lɛnu. Na ka lísie ni, líti kenye kabuni líboku-nwu.

⁸ Nsu bekyuli bani na ami ku-ma búsie ni, báya na bɔyia ku liƒu liduo bula bekyuli kemmo. Nsu ami lɛ́di Mina Unwoti Katɔti litemi lɛlɔ geen.

⁹ Ɔsi lɛla lɛni lɛ́bla-mɛni ɔsu ni, Mose úse ami ku mina bebi kenye ka ni, kalɔ kani kemmo na lísie lɛ́vi ƒui kadubo bunwini ami ku mina bebi kadi.

¹⁰ “Nsu nu! Akwa aavlene-alɔ kemmo na bɔkya mɛni ka Unwoti ɔ́su Mose litemi lɛmɛni. Uwi ɔmmɔ kemmo na bɔ́mu bɔkɛ kalɔ kakwiidi kemmo. Na ka Unwoti ɔɔdi nwuna litemi lɛlɔ ɔsu ni, lɛ́mu nli ngba úti úbedu ɔƒɛni. Aanu-mi ɔmwi! Lɛ́ɛkɛ akwa liti ku avlaatɛ-alɔ sɔɔn.

¹¹ Nsu lɛ́mu mbo ɔlɔkplu kaduɛ úti úbedu ɔmwi. Na kalɛ kani na mbo ɔlɔkplu asa na Mose ɔ́tala-mi ni, ɔyikun ɔmmɔ ɔmu ɔkya-mi lɛni kani. Na lɛni kani na mbo ɔyikun na lisie kekpokɔ ɔƒɛni kalɛ kani na úse-mii kuuku.

¹² Anwuɔsu ti kalɔ ku lɛma lɛni nwi abi lɛlɔ te-mi aani kalɛ na Unwoti úse kenye úte-mi limeyi lɛni na ami ku mina bekyuli búnwini búbeduo mmɔ. Ɔsika limeyi lɛmmɔ ni, énye mmɔ na énu kalɛ na básu kalɛ na bekyuli kangyaa bani nli mmɔ bese ku kalɛ bátu bana awodu bonwu báka bamana lɛma lɛmmɔ. Nsu lɛ́ƒɔ lɛ́di ka Unwoti ɔdubunyeku-mi na lɛbɔku-ma na bekeli balɛ aani kalɛ na use kenye úse.”

¹³ Ɔmmɔ kama Yosua úte Kaleb ɔni ndi Yeƒune ubidi kusɛ kusɛ na úti ɔma ɔni baalɔ Hebron úte-nwu ka úti mmɔ ɔbla nwuna kadikɔ.

¹⁴ Anwuɔsu Yeƒune ubidi Kaleb ɔni nási Kenesin kaba kemmo ni, anwu mɔɔdi Hebron ɔ́si uwi ɔmmɔ kemmo. Ɔsika Kaleb ɔ́di Unwoti ɔnii ndi Israelƒuɔ Katɔti litemi lɛlɔ ku kayi ƒui ɔsu.

¹⁵ Kuuku ni, Hebron bátaalɔ Kiriat-Arba. Na Arba ɔmɛni ndi ukyuli ɔni mbo ɔyikun ntulo na bekyuli kangyaa bani baalɔ Anakƒuɔ bammɔ akɔ. Na ɔmmɔ kama ni, Israelƒuɔ bánwuna na básɔ bétekpoku bekyuli badi.