Yosua 10 - Katɔti Ɔku Kedee

Ɔƒɛ Údi Unye Útédu Ka Israelƒuɔ Bádi Amoriƒuɔ Lɛlɔ

¹ Yerusalem ɔga ɔni baalɔ banii Adoni-Sedek únu ka Yosua úkpo ɔ́di Ai lɛlɔ na ɔ́yila ɔma ɔmmɔ udu kede kede na ɔ́du Aiƒuɔ ɔga aani kalɛ kani na ɔ́bla Yerikoƒuɔ ɔga. Na únu lɛnɔ ka Gibeonƒuɔ bésie bétévele Israelƒuɔ na bényimiku-ma na bábla unwi. Na belie bede-ma.

² Na lɛla lɛmɛni lɛ́da Yerusalemƒuɔ ɔga liƒu geen. Ɔsika Gibeon ɔma ɔdi ɔma unengudi na bana ɔga ɔƒɔ kuye geen na ɔma ɔmmɔ úbomo útulo Ai, na bana banana ƒui lɛnɔ bagyi bukpo geen.

³ Ɔ́si ɔmmɔ ɔsu ni, Yerusalemƒuɔ Ɔga Adoni-Sedek ɔmɛni ɔ́tala bekyuli ka beteesie batasu Hebron ɔga ɔni baalɔ banii Hoham ku Yarmut ɔga ɔni baalɔ Piram ku Lakis ɔga ɔni baalɔ Yaƒia ku Eglon ɔga ɔni baalɔ Debir banii

⁴ beti bana bekpone ƒui na bebo na bebebunku-nwu na bekpoku Gibeonƒuɔ. Ɔsika Gibeonƒuɔ bábla ku Yosua ku Israelƒuɔ ƒui unwi.

⁵ Ɔmmɔ kama Amoriƒuɔ baga ɛlɔ bammɔ ku Yerusalem ɔga ku Hebron ɔga ku Yarmut ɔga ku Lakis ɔga ku Eglon ɔga básala bana bekpone na bátáka bámana Gibeon na békpoku-ma.

⁶ Amu na Gibeonƒuɔ bátala bekyuli bésienku Yosua kudɔ na Gilgal kesii kani na Israelƒuɔ básala belie, ka bátásu-nwu banii, “Ati, buvele bɔda-a, ta ku ƒula bekpone kɔnakunwi na bibekpo bɛƒɔ-bu! Ɔsika Amoriƒuɔ baga bani nlie abi amadɔ ƒui básala lisu na béti bana bekpone na bébo bébekpoku-bu.”

⁷ Anwuɔsu Yosua úti nwuna bekpone ƒui ku bani muukpó kaduɛ ƒui na báta bási Gilgal na bésie.

⁸ Mmɔ na Unwoti ɔ́su Yosua ɔnini, “Tayia Amoriƒuɔ baga ku bana bekpone bammɔ Líiti-ma lɛ́kya-a enu kemmo kukuuku. Na mɔɔsu-ɔ ka ni, ina ukyuli unwi ulakana-a anumi bɔkpɛ bude.”

⁹ Na usien umodi Yosua ku nwuna bekpone bésie bási Gilgal bétéduo Gibeon. Na kɔnakunwi bátáda balɛ Amoriƒuɔ lɛlɔ na bése kalɔ beekpóku-ma.

¹⁰ Na Unwoti ɔ́ya na Amoriƒuɔ beƒu uwi ɔni kani na bánu Israelƒuɔ bekpone. Na Israelƒuɔ bádu Amoriƒuɔ kaduɛ na Gibeon mmɔ na bábɔku-ma betédu ulu ɔni uti ɔɔkɔ́ use Bet-Horon. Na básiaku-ma baadu-ma laa betédu Aseka ku Makeda.

¹¹ Uwi ɔni Amoriƒuɔ badaku bukeli taatɔlɔ Israelƒuɔ bekpone kudɔ ni, Unwoti ɔ́ya na etubankɛ bonwu bonwu ánu ábayu-ma lɛlɔ úti útédu Aseka, na békpi ƒui kede kede. Na bani na etubankɛ áyu-ma lɛlɔ na békpi ni, bémomo bétulo bani na Israelƒuɔ bekpone bádu.

¹² Limeyi lɛmmɔ ni, Unwoti Katɔti úti Amoriƒuɔ ɔkya Israelƒuɔ enu kemmo. Na únye-ma kama na badaku-ma lɛlɔ bɔdi. Na ka ɔƒɛ úsela bɔnu ni, Yosua ɔ́kpali Katɔti momoomo, na Israelƒuɔ bammɔ ƒui bénu ka ɔ́su ɔnini, “Bula Unwoti, ya na ɔƒɛ udi unye na Gibeon ɔma eli, na aya na kɔbuli lɛnɔ kɔsɔ kɔkya Ayalon Kɔwɛ.”

¹³ Ɔmmɔ ɔsu ɔƒɛ údi unye, na kɔbuli lɛnɔ kúdi kunye úti útédu ka Israelƒuɔ bádi bana bekisine lɛlɔ. Na lɛla lɛni nálɛ mɛni bénweni-nya bákya ɔku ɔni na Yasor únweni kemmo. Na mmɔ na bénweni banii ɔƒɛ údi unye kayaa limeyi limodi na útéduo lɛyu.

¹⁴ Na limeyi lɛmmɔ udu lɛdi lítalɛ kudii lɛni. Na Unwoti únu na ɔ́bla ɔsia ukyuli ɔyawine litemi lɛni ɔ́su-nwu lɛlɔ. Na Unwoti únye Israelƒuɔ kama na úkpo úte-ma.

¹⁵ Amu ka Yosua ku nwuna bekpone békpo báwɔlɔ ni, básɔ bénwini bésie Gilgal.

Yosua Ɔ́du Amoriƒuɔ Baga Ɛlɔ

¹⁶ Amu na Amoriƒuɔ baga ɛlɔ bani nkya mmɔ békeli bátábɛ bakya atabi ubu ɔdi kemmo na Makeda.

¹⁷ Na bekyuli badi bánu baga bamɛni na bébo bábasu Yosua.

¹⁸ Na Yosua ɔ́su bekyuli bammɔ ɔnini, “Bisie na bitéminime atakpɛ ebendi adi na biti-nya bitile ubu ɔmmɔ kenye. Na bɛya na bagyumanane badi basɔ benye ubu ɔmmɔ kenye mmɔ.

¹⁹ Nsu amii bitasɔ bitenye mmɔ. Mmomu bɛvi bitada-ma bɛsiku kama kakɛ kalɛ balakɛ kuƒi beduo bana lɛma. Ɔsika Unwoti bina Katɔti úti bina bekisine bammɔ ɔkya-mii enu kemmo.”

²⁰ Anwuɔsu Yosua ku nwuna bekpone bádu bekisine bammɔ ƒui. Nsu badi bakana bukeli bétéduo bana lɛma lɛni bátu awodu bámana-nya kemmo na bátadu-ma.

²¹ Na Yosua bekpone bani ɔ́tala mmɔ ƒui básɔ bénwini bebo Makeda kesii kani na Israelƒuɔ bákya. Na bekyuli bani nlie amadɔ ƒui ɔdi biala ɔyia ka ɔlɔ Israel lɛnyikpi.

²² Amu na Yosua ɔ́su nwuna bekpone bammɔ badi ɔnini, “Bidi atakpɛ ammɔ bidie ubu ɔmmɔ kenye. Na bɛni baga ɛlɔ bammɔ biboku-mi anumi.”

²³ Anwuɔsu bédi atakpɛ ammɔ bédie na báni Amoriƒuɔ baga ɛlɔ bani ndi Yerusalem ɔga ku Hebron ɔga ku Yarmut ɔga ku Lakis ɔga ku Eglon ɔga bálɛku ubu ɔmmɔ kemmo.

²⁴ Na béti-ma bábava Yosua anumi. Na Yosua ɔ́ya na Israelƒuɔ ƒui bálɛ bébo, na úbo bekpone batɔnkune bani na ama ku Yosua bése kekpokɔ ɔda ka balɛ na beti bana lɛgba banya baga bammɔ amɔ lɛlɔ. Na ama lɛnɔ bábla lɛni.

²⁵ Amu na Yosua ɔ́su bekpone bammɔ banini, “Bitayia, na enu lɛnɔ ataƒɛ-mii. Mmomu bɛkya ɔkplu na bise kayi. Na lɛni na Unwoti ɔdubuti ɔbla bina bekisine bani ƒui amii ku-ma bɛdubo bukpo.”

²⁶ Na Yosua ɔ́du baga ɛlɔ bammɔ na úti-ma ɔ́ƒala egyii alɔ lɛlɔ. Na báƒa mmɔ útédu useyi uwi.

²⁷ Amu ka ɔƒɛ úsela kanukɔ ni, Yosua ɔ́ya na báƒami-ma na bétéƒwimi-ma bakya ubu ɔni kemmo na nka bábɛ bakya mmɔ. Na béti atakpɛ bonwu bonwu bétile ubu ɔmmɔ kenye. Na atakpɛ ammɔ amu ese mmɔ ubedu ɔmwi.

Yosua Ku Nwuna Bekpone Békpo Bádi Amoriƒuɔ Lɛma Pii Lɛlɔ

²⁸ Ɔmmɔ kama ni, Yosua ku Israelƒuɔ besie na bétékpoku Makedaƒuɔ na ɔ́di-ma lɛlɔ limeyi lɛmmɔ kani. Na ɔ́du ukyuli biala na ɔkya ɔma ɔmmɔ kemmo ɔni na ukyuli biala útebu. Na lɛla lɛni na ɔ́bla Yeriko ɔga ni, lɛni kani na ɔ́bla Makeda ɔga.

²⁹ Na ka bási Makeda ni, bésie bétékpoku Libnaƒuɔ.

³⁰ Na Unwoti ɔ́ya na Israelƒuɔ bádi Libnaƒuɔ lɛlɔ. Na bádu bekyuli bani ƒui nkya ɔma ɔmmɔ kemmo ɔni na bátanu ukyuli ɔdi kɔnyana. Na lɛla lɛni na béti bábla Yeriko ɔga ni, lɛla lɛmmɔ kani na béti bábla Libna ɔga lɛnɔ.

³¹ Ɔmmɔ kama ni, Yosua ku nwuna bekpone bátɔlɔ Libna mmɔ bésie Lakis bátáka-ma bakya na békpoku-ma. Na limeyi linyɔdi lɛlɔ ni, Katɔti ɔ́ya na békpo bádi Lakisƒuɔ lɛlɔ.

³² Na bádu ukyuli biala ɔni na bátanu ɔdi kɔnyana.

³³ Na uwi ɔni na bakya beekpóku Lakisƒuɔ bamɛni ni, Ɔga Horam ɔni nási Geser ku nwuna bekpone bébo bébebunku-ma. Nsu Yosua ku nwuna bekpone békpo bádi-ma lɛlɔ. Na bádu-ma ƒui kede kede ɔni na ina ukyuli unwi útebu.

³⁴ Ɔmmɔ kama Yosua ku nwuna bekpone básɔ báta Lakis bésie Eglon na báka-ma bákya na békpoku-ma.

³⁵ Na bádi-ma lɛlɔ limeyi lɛmmɔ kani. Na bádu bekyuli bammɔ ƒui kede kede aani kalɛ kani na béti bábla Lakisƒuɔ pɛpɛɛpɛ.

³⁶ Ɔmɛni kama ni, Yosua ku nwuna bekpone báta Eglon na bésie Hebron na bétékpoku-ma.

³⁷ Na bádi Hebronƒuɔ lɛlɔ na bádu bekyuli bani ƒui nkya ɔma ɔmmɔ kemmo ku bana ɔga. Na bávi bésie akpaklɔ ani nde Hebron na bádu bekyuli bani nkya mmɔ ƒui kede kede aani kalɛ na bábla Eglonƒuɔ. Na báyila ɔma ɔmmɔ udu ku bekyuli bani nli-nwu kemmo.

³⁸ Na Yosua ku nwuna bekpone bénwini bésie Debir na bétékpoku-ma.

³⁹ Na bádi Debirƒuɔ lɛlɔ na béƒie Debirƒuɔ ɔga ku bekyuli bani ƒui nkya Debir mmɔ ku akpaklɔ ani nde mmɔ bekyuli na bádu-ma kede kede. Na kalɛ kani na úti ɔ́bla Debir ku nwuna ɔga ku bekyuli bammɔ ƒui ni, lɛni kani na ɔ́bla Hebron ku Libna baga lɛnɔ.

⁴⁰ Anwuɔsu Yosua ɔ́di kalɔ kammɔ bekyuli ku baga bammɔ ƒui lɛlɔ. Úti ɔ́si lɛma lɛni nwi abi lɛlɔ na ɔƒɛ katukɔ ku lɛma lɛni nwi kɔbi kaƒɔna na ɔƒɛ kanukɔ lɛma lɛni nwi kalɔ ƒiaa lɛlɔ na kada kakɛ ni, ɔ́yila lɛla biala mbo bɔnwuna udu aani kalɛ na Unwoti ɔni ndi Israelƒuɔ Katɔti úbo-ma ɔda.

⁴¹ Na Yosua ɔ́di bekyuli bammɔ lɛlɔ ɔ́si Kades-Barnea útédu Gasa, na ɔ́si Gosen kalɛkɛ útédu Gibeon.

⁴² Na Yosua ɔ́di baga bamɛni ƒui ku bana kɔlɔ ƒui lɛlɔ uwi unwi pɛ kani kemmo. Ɔsika Israelƒuɔ Unwoti Katɔti nékpo úte-ma.

⁴³ Ka békpo bawɔlɔ ni, Yosua ku nwuna bekpone básɔ bénwini bésie Gilgal na bana kakyakɔ.