Yosua 1 - Katɔti Ɔku Kedee

Unwoti Úbo Yosua Ɔda

¹ Ka Mose ɔni ndi Unwoti kabla ɔblane úkpi kama ni, Unwoti ɔ́su Yosua ɔni ndi Nun ubidi ɔnini,

² “Mina kabla ɔblane Mose úkpi. Anwuɔsu awɔ ku Israelƒuɔ ƒui bɛklibi lɛlɔ na bɛvia Yordan Ketu na biteesie kalɔ kani na ndubuti lite-mii kemmo.

³ Na kesii biala bísie bɛ́vi na kalɔ kammɔ kemmo ni, ndubuti-ka lite-mii aani kalɛ lɛ́su Mose.

⁴ Na kalɔ kammɔ ɔmii ɔ́si kalɔ kani nákwii na kewi mɛni útédu Lebanon ɔ́vi úsie útédu Euƒrate Ketu bonwu kammɔ kemmo na ɔƒɛ katukɔ. Na ɔ́kɛ Hetiƒuɔ kalɔ ƒui kemmo úti útédu Mediterenia Ɛpu ɔni nwi ɔƒɛ kanukɔ.

⁵ Na mɔɔsu-ɔ ka ukyuli ndi ukyuli ɔdi ulakana bɔta bukpoku-ɔ ƒula ngba emeyi ƒui kemmo. Na kalɛ kani na lílieku Mose ni, lɛni kani na ndubulieku-ɔ. Na lɛɛɛdubo-ɔ bɔnyonu iye lidie-ɔ atu kudii.

⁶ “Kya ɔkplu na taya na enu aƒɛ-ɔ. Ɔsika awɔ ndubo bekyuli bamɛni bɔtɔnku butéduo kalɔ kani na líse kenye ka meti mete bina bati kuuku.

⁷ Nye kpakplaa na ese kayi. Na anu kaduɛ ataadi ɔda bubo bɔni ƒui na lɛ́ya mina kabla ɔblane Mose úbo-mii mmɔ lɛlɔ. Na tada tavia ɔda bubo bɔmmɔ tesie kɔmii iye kɔdianu. Na si ábla lɛni ni, ɔdubɔtɛku-ɔ na lɛla biala kemmo.

⁸ Na tada ɔda bubo ɔku ɔmɛni kemmo etemila kalɔ budie teete bekyuli taya. Nu kaduɛ na eteeduo-nya kemmo usien ku ɔƒɛ. Kalɛ na eteenyimo na ataabla taasiaku etemila ani ƒui bénweni bákya ɔku ɔmmɔ kemmo. Na si aabla lɛni ni, ɔdubɔtɛku-ɔ na lɛla biala na aabla ni, lɛdubuse-ɔ kaduɛ.

⁹ Nyimo ka lɛ́su-ɔ ka nye kpakplaa na ese kayi. Na taya na liƒu lɛdi lɛda-a iye enu aƒɛ-ɔ. Ɔsika ami ɔni ndi ƒula Unwoti Katɔti nlieku-ɔ uwi biala kemmo.”

Yosua Úbo Nwuna Bekyuli Ɔda

¹⁰ Anwuɔsu Yosua úbo Israelƒuɔ batɔnkune bammɔ ɔda ɔnini,

¹¹ “Bɛvi bekyuli bammɔ lɛlɔ na bana kɔkyakɔ na bɛsu-ma bɛnini, ‘Bɛklibi lɛlɔ na bɛwia adila adi bise bite lɛlɔ. Ɔsika emeyi atɛ kama bɔdubɔvia Yordan Ketu na busie kalɔ kani na bina Unwoti Katɔti ɔ́su ka wete-mii kemmo.’ ”

¹² Amu na Yosua ɔ́su Ruben ku Gad kaba bekyuli ku Manase kaba kakɛ kadi bekyuli ɔnini,

¹³ “Binyimo Unwoti kabla ɔblane Mose ɔda ɔni na úbo-mii ɔnini, ‘Bina Unwoti Katɔti úti kalɔ kakɛ kani na Yordan ɔƒɛ katukɔ mɛni úte-mii ka kenwini bina keliekɔ.’

¹⁴ Na si bídu mmɔ ni, bina beleku ku bina bebi ku bebuo basɔ bakya mmɔ. Nsu bina bekpone bani na bátu-ma akpagya ni, ɔlɛka bagyu batɔ bana banwa bakladi kalɛ na bebunku-ma

¹⁵ úti útédu ka Unwoti úte-ma keliekɔ aani kalɛ na ɔ́bla úte-mii. Na si Unwoti ɔ́ya na Israelƒuɔ bakladi bammɔ bákɛ keliekɔ ni, uwi ɔmmɔ na bekpone bammɔ badubɔsɔ benwini besie bana keliekɔ kani na Unwoti kabla ɔblane Mose úte-ma na Yordan ɔƒɛ katukɔ kakɛ.”

¹⁶ Amu na bekyuli bammɔ bédie kenye na básu Yosua banini, “Lɛla biala na ásu-bu ni, bɔdubɔdi-ni lɛlɔ. Na kesi kesii na átala-bu ni, bɔdubusie.

¹⁷ Na kalɛ kani na búnu Mose litemi ni, lɛni kani na bɔdubunu ƒula litemi lɛnɔ. Na buuvele bɔnii ƒula Unwoti Katɔti ulieku-ɔ aani kalɛ kani na úlieku Mose.

¹⁸ Na ukyuli biala ɔni mata menye-ɔ lɛlɔ na uladi ƒula litemi iye ɔda ɔni na ébo-nwu lɛlɔ ni, bɔdubɔdu-nwu. Mmomu awɔ ni, nye kpakplaa na ese kayi.”