Yona 4 - Katɔti Ɔku Kedee

Yona Ɔ́kɛ Kɔnyi Ka Katɔti Ɔ́nu Niniweƒuɔ Kɔnyana Ɔsu

¹ Ɔƒɛ ɔ́da Yona, na úti kɔnyi geen.

² Ɔmɛni ɔsu ɔ́kpali Katɔti ɔnini, “Unwoti ɔɔɔdi ɔmɛni na lɛ́su nnii aaadubo ɔma ɔmɛni bɔkyula iye ɔ́si ɔni nkya ɔma. Ɔmɛni ɔsu na lɛ́kya ɔkplu ka likeli lisie Tarsis! Ngyi ka awɔ adi kɔnyana ɔnune Katɔti na ebo kayi buɛɛ uwi ndi uwi, na aakana tavumana ƒula kasusu uwi biala kemmo kalɛ na aláni ukyuli kɔtu lɛnɔ.

³ Ɔƒɛni ni, Unwoti, ya-mi likpi. Si líkpi ɔdia-mi utulo ka lilie ngba.”

⁴ Unwoti údie kenye ɔnini, “Bi ɔyikun na ebo ɔsu na eeti kɔnyi?”

⁵ Yona ɔ́vi ɔlɛ ɔma ɔmmɔ kemmo na útélie ɔƒɛ katukɔ kakɛ. Na ɔ́tu kevo kadi ute lɛlɔ na uli-ka kemmo ɔɔnu lɛla lɛni malɛ na ɔma ɔmmɔ kemmo.

⁶ Amu na Unwoti Katɔti ɔ́ya na kabuli kadi kákwɛ na Yona keliekɔ mmɔ na kátu kébi mmɔ, na uute-nwu ɔyuli ɔni nwuna kalɔ kese buɛɛ. Kubiti kɔ́da Yona geen na kabuli kammɔ ɔsu.

⁷ Nsu lɛdigye ni, Katɔti ɔ́ya na beklubi báyalɛ kabuli kammɔ békulo na káyɛyɛ.

⁸ Ka kadi kammɔ kaata ni, Katɔti ɔ́ya na ɔƒɛƒɛɛ ɔni náƒɔ ogya úkpo ɔ́si ɔƒɛ katukɔ úbewi Yona lɛlɔ, na ɔ́ya na ɔƒɛ ɔmmɔ kenye lɛnɔ káyu ɔkplu. Anwuɔsu anumi ánwu-nwu kɔnakunwi, na ɔɔyɔ́ ka ukpi muedi. Ɔmmɔ ɔsu Yona ɔkya ɔɔdɔ na ɔɔká ala ɔnini, “Si líkpi muedi ni, nka ɔdia-mi utulo ɔni na nli ngba mɛni.”

⁹ Amu na Katɔti úye-nwu ɔnini, “Bi ɔyikun na ebo ɔsu na eeti kɔnyi akya kabuli kammɔ?” Yona údie kenye ɔnini, “Mbo kuƒi ka liti kɔnyi kɔni nédu ka líkpi muedi.”

¹⁰ Amu na Unwoti ɔ́su-nwu ɔnini, “Kabuli kani nákwɛ usien uwi na káyii kákya lɛdigye na ɔɔɔdi awɔ náva kebii kammɔ ni, uukpóku-ɔ ka kékpi.

¹¹ Na Niniwe ɔma bonwu ɔmɛni kemmo ni, bekyuli bani metulo aani nkyuli apim eti anyɔ ku aavlanyɔ bakya. Na bebuo lidu lidu mpim eti anyɔ lɛnɔ bakya. Na bana ƒui baaagyi likpidi ku lɛbuni kavumana. Si ama baayii ku udu ni, utalɛka ukpoku-mi?”