Yona 1 - Katɔti Ɔku Kedee

Yona Úni Katɔti Litemi

¹ Unwoti ɔ́su Yona, Amitai ubidi, kenye kadi ɔnii,

² “Ta na esie ɔma unengudi ɔni baalɔ banii Niniwe, na atákɔ lɛsa ete-ma ka ami Unwoti mɔɔnu kalɛ na ɔma ɔmmɔ bekyuli baabla likyulikpi ala.”

³ Nsu ka Yona ulayɔ ka usie ɔsu ni, úkeli úsie Yopa ɔnii utéti ɔkɔlɔ ubendi na mmɔ na uteesie kalɔ kani baalɔ banii Tarsis. Amu na ɔ́ƒɔ kayu na úduo ɔkɔlɔ ubendi ɔmmɔ kemmo na básia ntu anumi bésela Tarsis kalɔ lɛlɔ likpo lɛni na watábɛ Unwoti.

⁴ Amu na Unwoti ɔ́ya na ɔƒɛƒɛɛ ubendi ɔdi úkpo na ɛpu lɛlɔ. Na ɔƒɛƒɛɛ ɔmmɔ ɔ́yu ɔkplu geen ɔni na ɔkɔlɔ ɔmmɔ ɔ́ya bɔbwɛ muedi.

⁵ Na liƒu libendi lɛ́da bekyuli bani ƒui nkya ɔkɔlɔ ɔmmɔ kemmo na ɔdi biala ɔɔva momoomo taakpali nwuna unwoti. Na kalɛ na ɔkɔlɔ ɔmmɔ walɛ unu ɔsu ni, béƒwimi bana etila ani ƒui nkya ɔkɔlɔ ubendi ɔmmɔ kemmo bákya ɛpu kemmo. Nsu uwi ɔmmɔ kemmo ni, Yona ɔ́yu úsie ɔkɔlɔ ubendi ɔmmɔ kalɔ ɔtɔ unwi kemmo útátɛ ɔlɛɛ geen.

⁶ Amu na unengu ɔni mɔɔka ɔkɔlɔ ɔmmɔ útánu Yona ka ɔtɛ ɔlɛɛ, na úye-nwu ɔnini, “Bi ɔsu na atɛ alɛɛ lɛni? Ta pla na akpali ƒula Katɔti na eye kebunku. Ɔƒɛni kalɛ ɔdubɔnu bu kɔnyana na ɔƒɔ-bu ngba.”

⁷ Amu na bekyuli bani ƒui nkya ɔkɔlɔ ubendi ɔmmɔ kemmo básala eli lisu na básu banini, “Bɔdubo egulabi bɔtu bɔnu ukyuli ɔni lɛlɔ ɔsu na bɔɔkɛ́ ɔgbankpi ɔmɛni udu.” Na ka bátu-ni, Yona lɛnyi nálɛ.

⁸ Amu na básu-nwu banini, “Ɔƒɛni su-bu, ɔma ɔsu na bɔɔkɛ́ ɔgbankpi ɔmɛni udu! Na bi ndi ƒula kalabla? Na wɛ na asi? Kalɔ kamani na asi? Kadi ukyuli ɔmani na adi?”

⁹ Mmɔ na Yona údie kenye ɔnini, “Hebrini na ndi. Na mɔɔkpali Unwoti Katɔti ɔni nkya katɔ. Na anwu nédie kalɔ ku ɛpu.”

¹⁰ Liƒu lɛ́da bekyuli bani ƒui nkya ɔkɔlɔ ubendi ɔmmɔ kemmo, ɔsika Yona ɔ́ɔsu-ma úbavi ka Unwoti na uukeli. Ɔmmɔ ɔsu béye-nwu banini, “Bi ndi ƒula kabla?”

¹¹ Na uwi ɔmɛni ƒui kemmo ni, na ɔƒɛƒɛɛ ɔmmɔ bukpo bɔɔkɔ́ katɔ teebu, ɔmɛni ɔsu ɔkɔlɔ ɔmmɔ kemmo bekyuli béye-nwu banini, “Bi na ɔlɛka bɔbla-a ɔƒɛni asa na ɔƒɛƒɛɛ ɔmmɔ ɔda ɔya?”

¹² Amu na Yona ɔ́su-ma ɔnini, “Ngyi ka mina bɔƒiɔ ɔsu na ɔƒɛƒɛɛ ubendi ɔmɛni udu uukpó. Anwuɔsu bibo-mi bɛkya ɛpu kemmo na ɔƒɛƒɛɛ ɔmmɔ ɔdubɔda bukpo bɔya.”

¹³ Nsu ɔkɔlɔ ɔmmɔ kemmo bekyuli bákya ɔkplu ka basɔku ɔkɔlɔ ɔmmɔ besienku ketudɔ. Nsu uwi ɔmmɔ geen na ɔƒɛƒɛɛ ɔmmɔ ɔ́sɔ ɔ́nyi anyi úbu. Ɔmɛni ɔsu bátakana.

¹⁴ Ɔmɛni ɔsu béwulo bákpali Unwoti banini, “Unwoti, buuvele-ɔ, teti ukyuli ɔmɛni kukpi tani-bu kɔtu si búbo-nwu bɔ́kya ɛpu kemmo. O Unwoti, awɔ mɔɔbla lɛla lɛni na aayɔ́.”

¹⁵ Amu na bágyu Yona na béƒwimi-nwu bákya ɛpu kemmo. Na ɔƒɛƒɛɛ ɔmmɔ ɔ́da bukpo ɔ́ya kɔnakunwi.

¹⁶ Ɔmɛni ɔ́ya na ɔkɔlɔ ɔmmɔ kemmo bekyuli ƒui báyia Unwoti, na béti enugya akpala béte-nwu na bése kenye lɛnɔ béte-nwu.

¹⁷ Amu na Unwoti údie lɛdi na kabɛ kebendi kadi kébweli Yona. Na Yona úlie kabɛ kammɔ kaƒɔ kemmo usien ku ɔƒɛ, emeyi atɛ.