Yohane 3 1 - Katɔti Ɔku Kedee

¹ Ɔkpana ɔyɔne Gaio, ami baƒɔtaadine unengu muunweni ɔku ɔmɛni lite-ɔ. Mɔɔyɔ́-ɔ na litemi geen lɛmmɔ kemmo.

² Ɔkpana ɔbuni, mɔɔkpali katɔ nnii lɛla biala lɛtɛ lite-ɔ kaduɛ na akɛ ɔlɔkplu aani kalɛ na ebo ɔlɔkplu na kɔyu kemmo.

³ Lɛlɔ lɛ́yɔ-mi geen uwi ɔni na banwani badi bébo na bábasu-mi kalɛ na aadi litemi geen lɛmmɔ lɛlɔ aani kalɛ na ngyi ka asiaku-ni kama.

⁴ Lɛla biala lilayɔ-mi kaƒɔ teetulo ɔni na muunú ka mina bebi basiaku litemi geen lɛmmɔ kama.

Baƒɔtaadine Bémwi Gaio

⁵ Mina ɔkpana buni, ka aanu banwa baƒɔtaadine ina ka badi badi baƒɔ bani na aaagyi muedi ɔsu ni, aabla ala ulu lɛlɔ teete Katɔti.

⁶ Baƒɔ bammɔ bábasu baƒɔtaadine bani nkya mɛni kalɛ na aayɔ́-ma. Anwuɔsu muuvele-ɔ nnii bunku-ma na bakɛ ala ani ƒui na baawia na bana ulu busie kemmo aani kalɛ na ɔ́manku-ma aani Katɔti kabla bablane.

⁷ Ɔsika bése bana ulu busie kalɔ na Kristo kabla bɔbla kemmo, na bátaƒɔ kebunku kadi bátasiku bekyuli bani nátaƒɔ bátadi kudɔ.

⁸ Ɔmɛni ɔsu ni, abu Kristoƒuɔ ɔlɛka bubunku bekyuli bamɛni udu kalɛ na bunyeku-ma na bugyingya Kristo litemi geen lɛmmɔ.

Yohane Ɔ́su Lɛla Lɛdi Na Diotreƒe Ku Demetrio Lɛlɔ

⁹ Línweni ɔku ɔdi líte ƒula baƒɔtaadine lɛkpa lɛmmɔ. Nsu ka Diotreƒe ɔɔyɔ́ ka ɔtalaku lɛlɔ katɔ aani ɔtɔnkune na mmɔ ɔsu ni, ulábu lɛla lɛni na abu batalane bɔɔsu.

¹⁰ Si líbo ni, ndubudie-nwu keyi na lɛla lɛni na ɔ́bla lɛlɔ ku ala ekpidi ani na ɔɔsu tasiku-bu lɛlɔ ku ɔkɔ ɔni na ɔ́nyi ɔ́sia-bu. Nsu ɔmmɔ lɛti bɔbla bútabɔ-nwu. Ɔsika ulátuna ɔnii ɔɔƒɔ́ banwa si bébo. Na uutile bekyuli bamba bani mɔɔyɔ́ ka baƒɔ-ma lɛnɔ kuƒi, na ɔɔbɔku-ma teedie lɛkpa lɛmmɔ kemmo.

¹¹ Mina ɔkpana ɔyɔne, tasiaku likpidi bɔbla kama. Mmomu siaku lɛbuni bɔbla kama. Na ukyuli biala ɔni mɔɔbla lɛbuni ni, ɔdi Katɔti ɔdi. Nsu ukyuli ɔni mɔɔbla ala ekpidi ni, ɔɔɔgyi Katɔti.

¹² Na Demetrio anwu ni, ukyuli biala ɔɔlɔ-nwu lɛnyi buni. Na kalɛ na bɔɔnu litemi geen lɛmmɔ na nwuna lɛlɔ kemmo ni, úte-nwu lɛnyi buni. Na abu lɛnɔ bɔɔlɔ-nwu lɛnyi buni. Na bɛgyi ka lɛla lɛni na bɔɔsu lise lɛni.

Yohane Ɔ́kada-ma

¹³ Mbo ala pii na lɛsu-mii, nsu naaayɔ ka linweni ala ammɔ limene-ɔ.

¹⁴ Mɔɔwia ka libo-ɔ kudɔ uwi klukui kemmo na bɔtɛmi anumi ku anumi.

¹⁵ Lɛ́wɔ mɛni. Keyi buɛɛ kasiaku-ɔ. Bakpana bani nkya mɛni ƒui beegyele-ɔ kaduɛ. Lɔ bakpana bani nkya mmɔ anyi unwi unwi na egyele-ma ete-mi.