Yohane 9 - Katɔti Ɔku Kedee

Yesu Ɔ́bwi Ɔnumbwɛne Ɔdi

¹ Ka Yesu ɔkɛ ɔɔví ni, útánu ɔnana ɔdi na anumi ábwɛ ɔ́si uwi ɔni na báwɔ-nwu ƒui.

² Mmɔ na nwuna basiakune béye-nwu banini, “Ala ɔtinane, ɔma ekpidi náya na ɔnana ɔmɛni anumi ábwɛ asa na báwɔ-nwu? Anwu ɔlati ekpidi ɔsu, munuu nwuna bawɔne ekpidi ɔsu?”

³ Amu na Yesu údie kenye ɔnini, “Ɔnana ɔmɛni anumi ani nábwɛ-nwu ni, aaadanku nwuna ekpidi iye nwuna bawɔne ekpidi ani na bábla ɔsu. Mmomu anumi ábwɛ-nwu kalɛ na bekyuli banu Katɔti ɔyikun bati na ukyuli ɔmɛni lɛlɔ.

⁴ Si uwi ɔni na kadi kátasa tɔ ni, ɔdi ka butaabla Katɔti ɔni nátala-mi kabla. Ɔƒɛ ɔdubo bɔsa ɔni na ukyuli biala ɔsɔ ulakana lɛla lɛdi biala bɔbla.

⁵ Na lebo lɛni kemmo na nkya bayawine akɔ ni, ami ndi bana bukeye.”

⁶ Ka Yesu ɔ́su lɛni ɔ́wɔlɔ ni, útuo lisuo úwi kalɔ na úti ɔ́sala ku lɛti, na úti-ni úsusu ɔnana ɔmmɔ anumi.

⁷ Na ɔ́su-nwu ɔnini, “Teesie na atáƒɔ anumi na lɛba blii lɛni baalɔ banii Siloa kemmo.” Na Siloa kalɔ ndi bátala-nwu. Anwuɔsu ɔnana ɔmmɔ úsie na útáƒɔ nwuna anumi. Na nwuna anumi álɛmi na ɔɔnu, na ɔ́sɔ únwini úbo kaduli.

⁸ Amu na nwuna bakpana ku bekyuli bani ƒui nánu-nwu uwi ɔni na úteevele ala béye lɛlɔ banini, “Ɔɔɔdi ɔnana ɔmɛni néteelie mɛni teevele ala mmɔ, iye?”

⁹ Badi banii anwu na ɔdi. Nsu babambadi ama banii, “Oowo, ɔɔɔdi anwu na ɔdi. Bɔlɛ kani na ɔ́lɛ-nwu.” Amu na ukyuli ɔmmɔ ɔlati ɔnini, “Ami na ɔdi!”

¹⁰ Mmɔ na béye-nwu banini, “Dɛ na ɔ́bla asa na aakana bɔnu?”

¹¹ Amu na údie kenye ɔnini, “Ukyuli ɔni baalɔ Yesu ni, anwu nábla aba úsusu-mi anumi. Na ɔ́su-mi ɔnii ntésie na ntáƒɔ mina anumi na Siloa lɛba kemmo. Anwuɔsu lísie. Na ka lɛ́nya lɛ́ƒɔ anumi lɛ́wɔlɔ kani na líse kalɔ mɔɔnu.”

¹² Mmɔ ni, béye-nwu banii, “Ńtɛlɛ ukyuli ɔmmɔ?” Amu na údie kenye ɔnini, “Lɛɛɛgyi.”

Ƒarisiƒuɔ Béye Ɔnumbwɛne Ɔmmɔ Kalɛ Na Béti Bábwi-nwu

¹³ Ɔmmɔ kama ni, bekyuli bammɔ béti ukyuli ɔni na nka anumi ábwɛ-nwu mmɔ bésienku Ƒarisiƒuɔ kudɔ.

¹⁴ Na limeyi lɛni lɛlɔ na Yesu úti aba úsusu ɔnana ɔmmɔ anumi na ɔ́bwi-nwu ni, ɔdi lɛnwunameyi.

¹⁵ Mmɔ na Ƒarisiƒuɔ bammɔ lɛnɔ básɔ béye-nwu kalɛ na ɔ́bla asa na ɔ́sɔ ɔ́kana na ɔɔnu. Na ɔnana ɔmmɔ ɔ́su-ma ɔnini, “Ukyuli ɔmmɔ úti aba adi úsusu-mi anumi. Na lɛ́ƒɔ mina anumi. Na ɔƒɛni ni, mɔɔkana mɔɔnu.”

¹⁶ Amu na Ƒarisiƒuɔ bammɔ badi básu banini, “Ukyuli ɔni nábla lɛla lɛmɛni ni, ɔɔɔdi Katɔti nátala-nwu! Ɔsika uládi lɛnwunameyi ɔda ɔni na Katɔti úbo-bu lɛlɔ.” Na babambadi ama banini, “Dɛ na ukyuli ɔni na ɔdi alaekpidi ɔblane wakana na wabla akɔla budie taatina amɛni udu?” Mmɔ ni, bekyuli bammɔ béle lɛlɔ akpa anyɔ.

¹⁷ Amu na Ƒarisiƒuɔ bammɔ básɔ béye ɔnana ɔmmɔ banini, “Ka aasu anii anwu nábwi-ɔ lɛnumbwɛ ni, bi na awɔ ɔlati aasu taasiku ukyuli ɔmmɔ lɛlɔ?” Amu na ɔnana ɔmmɔ údie kenye ɔnini, “Katɔti kenye udiene na ɔdi.”

¹⁸ Ina amu ni, Yudaƒuɔ bammɔ bátaƒɔ bátadi ka sɔsɔ na ɔdi ka ɔnana ɔmmɔ anumi ábwɛ-nwu asa na ɔ́sɔ ɔ́kana na ɔɔnu úti útédu uwi ɔni bálɔ nwuna bawɔne.

¹⁹ Mmɔ na béye-ma banini, “Bina ubi na ɔdi mɛni? Na ka bɛɛsu bɛnii bɛ́wɔ-nwu na ɔdi ɔnumbwɛne ni, dɛ na ɔ́bla asa na ɔɔkana bɔnu ɔƒɛni?”

²⁰ Amu na nwuna bawɔne bédie kenye banini, “Bɔgyi ka bula ubi na ɔdi. Na bɔgyi lɛnɔ ka ɔni na bɔ́wɔ-nwu ni, ulánu.

²¹ Nsu kalɛ na ɔ́bla asa na ɔ́kana na ɔɔnu ni, bulákana bɔti. Na bɔɔɔgyi ukyuli ɔni nábwi-nwu lɛnumbwɛ lɛmmɔ lɛnɔ. Biye-nwu na anwu ɔlati ɔdubudie lɛlɔ kenye, ɔsika ɔ́ɔbi lɛlɔ kanaalɛ!”

²² Nwuna bawɔne básu ɔmɛni, ɔsika bátaayia Yudaƒuɔ benengu bammɔ. Ɔsika benengu bammɔ báalɛ ugyii bése ka ukyuli biala ɔni medie kenye ka Yesu ndi Ukyuli Ɔƒunadi ɔmmɔ ni, badubudie-nwu bana akɔ na Yudaƒuɔ kasalakɔ.

²³ Ɔmmɔ ɔsu na nwuna bawɔne básu banii, “Ɔ́ɔbi lɛlɔ kanaalɛ, ɔsu biye-nwu!”

²⁴ Benengu bammɔ básɔ bálɔ ɔnana ɔni na nka anumi ábwɛ-nwu mmɔ, na básu-nwu banini, “Yia Katɔti, na asu-bu litemi geen lɛmmɔ! Abu bɔgyi ka ukyuli ɔmmɔ ɔdi alaekpidi ɔblane!”

²⁵ Amu na ɔnana ɔmmɔ údie kenye ɔnini, “Ami lɛɛɛgyi si ɔdi alaekpidi ɔblane iye ɔɔɔdi. Lɛla linwi lɛni kani na ngyi ndi ka anumi ábwɛ-mi dii. Nsu ɔƒɛni ni, mɔɔnu!”

²⁶ Mmɔ na benengu bammɔ béye-nwu banini, “Bi na ɔ́bla-a, na dɛ na ɔ́bwi ƒula lɛnumbwɛ lɛmmɔ?”

²⁷ Amu na ɔnana ɔmmɔ údie kenye ɔnini, “Lɛ́ɛsu-mii ḿbavi, nsu bilayɔ ka binu. Na bi ɔsu na bɛsɔ bɛɛyɔ́ binu ɔƒɛni? Bɛɛwia ka binwini nwuna basiakune lɛnɔ?”

²⁸ Mmɔ na benengu bammɔ bábɔku-nwu banii, “Awɔ ndi ukyuli ɔmmɔ kama ɔsiakune. Abu Mose basiakune na bɔdi.

²⁹ Bɔgyi ka Katɔti ɔ́tɛmiku Mose. Na ukyuli ɔmmɔ anwu ni, bɔɔɔgyi kesii kani na ɔ́si muedi!”

³⁰ Amu na ɔnana ɔmmɔ ɔnini, “Bi litemi lɛdi mɛni? Bɔsu bɛda bɛnii bɛɛɛgyi kesii kani na ɔ́si, nsu anwu nábwi-mi lɛnumbwɛ!

³¹ Bɔgyi ka Katɔti ulenu alaekpidi bablane katɔ bɔkpali. Na bekyuli babuni bani mɔɔbu-nwu na baabla nwuna lɛƒɔyɔ mmomu katɔ bɔkpali na uunú.

³² Na ɔ́si kayawi kalɔ kesekɔ ƒui ni, ɔma nénu ka ukyuli ɔdi ɔ́ya na ɔnumbwɛne ɔni na báwɔ-nwu lɛni ɔkana bɔnu?

³³ Na si ɔɔɔdi Katɔti kudɔ na ukyuli ɔmɛni ɔ́si ni, nka ulakana lɛla lɛdi bɔbla.”

³⁴ Amu na benengu bammɔ banini, “Awɔ ɔni na likpidi kemmo na báwɔ-ɔ bákya na lɛni kani na éti ábi lɛlɔ ni, awɔ mɔɔwia ka atina-bu ala?” Mmɔ ni, bábɔku-nwu bédie Yudaƒuɔ kasalakɔ mmɔ.

Bekyuli Badi Baakali Banii Baanu Ala Nwaa

³⁵ Ka Yesu únu ka bábɔku-nwu bédie mmɔ ni, ɔ́wia ɔnana ɔmmɔ ɔ́nu. Na úye-nwu ɔnini, “Áƒɔ Ukyuli Ɔyawine Ubi ádi?”

³⁶ Mmɔ na ɔnana ɔmmɔ ɔnini, “Ati, tina-mi ukyuli ɔmmɔ na makana-nwu bɔƒɔ bɔdi.”

³⁷ Amu na Yesu ɔ́su-nwu ɔnini, “Áanu ukyuli ɔmmɔ ábavi. Na ami ɔmmɔ ndi ukyuli ɔni mɔɔtɛmiku-ɔ ɔƒɛni.”

³⁸ Mmɔ kani na ɔnana ɔmmɔ ɔ́su ɔnini, “Blɔti, lɛ́ƒɔ lɛ́di!” Na ɔ́lɛ akɔnkɔ na Yesu anumi na úmwi-nwu.

³⁹ Amu na Yesu ɔ́su ɔnini, “Líbo kayawi kamɛni mbatɛku bekyuli litemi kalɛ na banumbwɛne bataanu, na bani mɔɔnu ni, anumi abwɛ-ma.”

⁴⁰ Ka Ƒarisiƒuɔ bani nkya-ma akɔ bénu lɛla lɛni na Yesu ɔ́su ni, béye-nwu banini, “Bi na aasu? Abu lɛnɔ banumbwɛne na bɔdi?”

⁴¹ Mmɔ na Yesu ɔ́su-ma ɔnini, “Si banii anumi nábwɛ-mii ni, nka bítaƒiɔ. Nsu ka amii alati bɛnii bɛɛnu ɔsu ni, ɔmɛni ɔɔtina ka bɛ́ƒiɔ.”