Yohane 8 - Katɔti Ɔku Kedee

¹ Nsu Yesu anwu ɔ́tɔlɔ úsie kɔbi kɔni baalɔ Inɔ Egyii Kɔbi lɛlɔ.

² Kadi kégye ɔtanta tutuutu ni, ɔ́sɔ únwini úsie Yudaƒuɔ kakpakɔ. Na bekyuli bammɔ ƒui báka bámana-nwu, na anwu úlie-ma ntɛ na úsie kalɔ ɔɔtina-ma ala.

³ Amu na ɔda bubo ala batinane ku Ƒarisiƒuɔ bákpanku uleku ɔdi béƒie kɔnu ku kɔnu na kɔsɔnɔ kadikɔ béboku. Amu na báya na ɔ́sɔ únye bana ƒui anumi.

⁴ Amu na béye Yesu banini, “Ala ɔtinane, uleku ɔmɛni ni, béƒie-nwu kɔnu ku kɔnu ka ɔɔdi kɔsɔnɔ.

⁵ Ɔƒɛni na bula ɔda bubo kenye aani kalɛ na Mose ɔ́tina ni, ɔlɛka bubo-nwu atabi bɔdu. Na dɛ na awɔ aasu?”

⁶ Béye-nwu ɔmɛni banii beti bakywɛ-nwu kakpagyuɛ kalɛ na si ɔ́nu-ka kemmo ni, na bakɛ kasiakɔ na beƒie-nwu. Nsu Yesu ɔ́yu ɔ́ƒa na únweni ala na ɔtumu akɔ ku nwuna lɛnimi.

⁷ Amu ka básɔ benye mmɔ beeye-nwu etemila ni, ɔ́talaku lɛlɔ na ɔ́su-ma ɔnini, “Bina akɔ ɔni nátabla likpidi lɛdi kudii ni, anwu ɔka-nwu lɛtabi bubo.”

⁸ Amu na anwu ɔ́sɔ ɔ́yu ɔ́ƒa na únweni ala ɔ́sia kalɔ ku lɛnimi.

⁹ Ka benengu bammɔ bénu lɛni ni, bágyu bátɔlɔ unwi unwi ɔ́si unengudi lɛlɔ. Na báda Yesu ku uleku ɔmmɔ lɛti bényene bekyuli bammɔ ntɛ.

¹⁰ Amu na Yesu ɔ́talaku lɛlɔ na úye uleku ɔmmɔ ɔnini, “Uleku, ńtɛlɛ-ma? Ɔdi biala útadu-ɔ kɔtɔ?”

¹¹ Amu na uleku ɔmmɔ ɔnini, “Oowo, Ati.” Anwuɔsu Yesu ɔ́su-nwu ɔnini, “Lɛni kani na ami lɛnɔ naaadu-ɔ kɔtɔ. Anwuɔsu teesie. Mmomu tasɔ telie ataabla likpidi.”

Yesu Kenye Budie Bubo Unu

¹² Ɔmmɔ kama ni, Yesu ɔ́sɔ ɔ́tɛmiku bekyuli bammɔ na ɔ́su-ma ɔnini, “Ami ndi kayawi kamɛni bukeye. Na ukyuli ɔni nsiaku-mi kama ni, ɔdubɔkɛ bukeye bɔni muute ukyuli ngba geen, na ulese ulávi lɛdisa kemmo kudii.”

¹³ Amu na Ƒarisiƒuɔ básu-nwu banini, “Awɔ ɔlati muudie ƒula lɛlɔ kenye. Anwuɔsu ƒula kenye budie buuubo unu.”

¹⁴ Amu na Yesu ɔ́su-ma ɔnini, “Si ina muudie lɛlɔ kenye ni, mina kenye budie bubo unu, ɔsika ngyi kesii kani na lɛ́si, na ngyi kesii kani na lísela. Nsu amii bɛɛɛgyi kesii kani na lɛ́si iye kesii kani na lísela.

¹⁵ Kayawi kasusu kemmo na bɛɛtɛ litemi. Nsu ami ni, naaatɛku ɔdi litemi.

¹⁶ Si banii bɔtɛ na ntɛ litemi muedi ni, nka mina litemi bɔtɛ bɔkɛ ulu lɛlɔ. Ɔsika ɔɔɔdi ami lɛti mɔɔtɛ litemi lɛmmɔ. Mmomu Katɔti ɔni nátala-mi unye-mi kama.

¹⁷ Na bina ɔda bubo kemmo ni, bénweni banii nkyuli inyɔ lɛla kenye budie bubo unu.

¹⁸ Na ami ndi bana akɔ unwi ɔni muudie lɛlɔ kenye. Na Ati ɔni nátala-mi ndi unyɔdi.”

¹⁹ Amu na béye-nwu banini, “Ńtɛlɛ ƒ'ɔti ɔmmɔ?” Yesu údie kenye na ɔ́su-ma ɔnini, “Bɛɛɛgyi-mi iye mina Ɔti. Ɔsika si bɔgyi na bɛgyi-mi ni, nka bɛdubɔti mina Ɔti lɛnɔ.”

²⁰ Kenye kamɛni na ɔ́su-ma na kesii kani nde egulabi kesekɔ na kakpakɔ kemmo mmɔ. Nsu ukyuli ɔdi útakana-nwu buƒie, ɔsika nwuna uwi ɔmmɔ útedu tɔ.

²¹ Yesu ɔ́sɔ ɔ́su-ma ɔnini, “Ndubo bɔtɔlɔ na bɛdubo-mi bɔwia na bikpi bɛkya bina ekpidi kemmo. Na kesii kani lísela ni, bilakana mmɔ bubo.”

²² Amu na Yudaƒuɔ bammɔ béye lɛlɔ banini, “Bɔdu na ɔdubo lɛlɔ ka ɔ́su ɔnii, ‘Kesii kani na lísela ni, bilakana bubo’?”

²³ Amu na ɔ́su-ma ɔnini, “Amii ni, kalɔ mɛni na bɛ́si. Na ami ni, lɛ́si katɔ. Kayawi kamɛni ɔdi na bɛdi. Na ami ni, ɔɔɔdi kayawi kamɛni ɔdi na ndi.

²⁴ Lɛ́su-mii ka bɛdubo bukpi bɔkya bina ekpidi kemmo. Na si bítaƒɔ bítadi ka ami ndi Anwu ɔmmɔ ni, bɛdubo bukpi bɔkya bina ekpidi kemmo sɔsɔ.”

²⁵ Amu na béye-nwu banini, “Awɔ ndi ɔma?” Amu na údie kenye ɔ́su-ma ɔnini, “Lɛla lɛni na lɛ́su-mii ɔ́si kalɔ kesekɔ kani na ndi.

²⁶ Mbo ala pii na lɛsu lɛsiku-mii lɛlɔ na lɛdu-mii kɔtɔ na bina ɔbladu ɔsu. Nsu ukyuli ɔni nátala-mi ni, ulányi ɔkɔ. Na ala ani na línu lɛ́siku-nwu kudɔ ni, anya muuti taasu kayawi bekyuli.”

²⁷ Mmɔ ni, bétenu kalɔ banii Ɔti lɛlɔ na ɔɔtɛmi taasiku.

²⁸ Anwuɔsu Yesu ɔ́su-ma ɔnini, “Si uwi ɔni na bɛ́kɔliku Ukyuli Ɔyawine Ubi katɔ ni, mmɔ na bɛdubɔti ka ami ndi Anwu ɔmmɔ. Na naaabla lɛla lɛdi na ami ɔlati ɔyikun kemmo. Mmomu mɔɔtɛmi kalɛ kani na mina Ɔti ɔ́tina-mi.

²⁹ Na anwu ɔni nátala-mi ni, unyeku-mi. Na útada-mi útese, ɔsika mɔɔbla lɛla lɛni mɔɔyɔ́-nwu kaƒɔ uwi biala.”

³⁰ Na ka ɔ́tɛmi lɛni ni, bekyuli pii báƒɔ-nwu bádi.

Yesu Údie Bekyuli Bani Ndi Abraham Bebi Ɔ́tina

³¹ Amu na Yesu ɔ́su Yudaƒuɔ bani náƒɔ-nwu bádi mmɔ ɔnini, “Si bɛɛbla taasiaku mina ala ani na lɛ́tina-mii lɛlɔ ni, na bɛdi mina basiakune sɔsɔ.

³² Na bɛdubɔti litemi geen, na litemi lɛmmɔ lɛya na bɛkɛ bɔnwuna.”

³³ Amu na Yudaƒuɔ bammɔ básu-nwu banini, “Abraham kaba bebi na bɔdi, na bɔɔɔkya ukyuli ɔdi kalɔ! Dɛ na ɔ́bla na aasu anii bɔdubɔkɛ bɔnwuna?”

³⁴ Amu na Yesu ɔ́su-ma ɔnini, “Mɔɔsu-mii geen ka ni, ukyuli biala ɔni mɔɔbla likpidi ni, ɔkya likpidi kalɔ.

³⁵ Na ukyuli ɔni mɔɔbla ukyuli bamba kabla ni, ulénwini kaduli kammɔ ala ɔdine geen. Mmomu ubi ɔni na ɔtɔlati ɔ́wɔ na kaduli kammɔ kemmo geen ni, anwu mɔɔdi kaduli kammɔ ala uwi ƒui.

³⁶ Anwuɔsu si ami Katɔti Ubidi lɛ́ya na ákɛ bɔnwuna ni, na ebo bɔnwuna geen sɔsɔ.

³⁷ Ngyi ka Abraham kaba bebi na bɛdi. Nsu bɛɛwia ka bɛdu-mi, ɔsika bilaƒɔ mina ala ani na mɔɔtina-mii taadi.

³⁸ Lɛla lɛni na mina Ɔti ɔ́tina-mi ni, ani na mɔɔsu. Na amii lɛnɔ bɛɛbla lɛla lɛni na bínu bɛ́siku bina ɔti kudɔ.”

³⁹ Amu na Yudaƒuɔ bammɔ básu-nwu banini, “Abraham ndi bula ɔti.” Mmɔ na Yesu ɔ́su-ma ɔnini, “Si Abraham bebi na bɛdi geen ni, bɛdubɔbla ala ani na Abraham ɔ́bla.

⁴⁰ Nsu ami ɔni mɔɔsu-mii litemi geen lɛni na línu lɛ́siku Katɔti kudɔ ni, ami mmomu na bɛɛwia bɛdu. Ɔɔɔdi ɔmɛni udu na Abraham ɔ́bla.

⁴¹ Ala ani na ukyuli ɔni ndi bina ɔti ɔ́bla ni, anya na bɛɛbla.” Amu na básu-nwu banini, “Ɔɔɔdi kɔsɔnɔ bebi na bɔdi! Ɔti unwi na bubo, na anwu ndi Katɔti!”

Yesu Údie Bekyuli Bani Ndi Ukisine Bebi Ɔ́tina

⁴² Amu na Yesu ɔ́su-ma ɔnini, “Si Katɔti ndi bina ɔti ni, bɛdubɔyɔ-mi. Ɔsika Katɔti ɔmmɔ kudɔ geen na lɛ́si líbo mɛni. Ńtebo na ami ɔlati bɔyɔ kemmo. Mmomu anwu ɔmmɔ nátala-mi.

⁴³ Bi ɔsu na bilenu-mi kalɔ? Ngyi ka bilátuna bɛnii biisé atu na binu lɛla lɛni na mɔɔsu.

⁴⁴ Bina ɔti ndi ukisine ɔmmɔ, na bɛwia ka bɛbla nwuna lɛƒɔyɔ. Bekyuli ɔdune kani na ɔdi ɔ́si kalɔ kesekɔ ƒui. Na ulayɔ litemi geen lɛmmɔ, ɔsika ulasu lɛla siin lɛdi kudii. Si ɔ́nyi ɔkɔ ni, nwuna udu na uudie taatina na bɔtɛmi kemmo. Ɔsika ɔkɔ ɔnyine na ɔdi, na anwu ndi ɔkɔ bɔnyi ƒui ɔti.

⁴⁵ Nsu ka mɔɔsu-mii litemi geen lɛmɛni ɔsu ni, bilaƒɔ-mi taadi.

⁴⁶ Bina akɔ ɔmani na madu-mi likpidi lɛdi kɔtɔ? Si mɔɔsu-mii litemi geen ni, bi ɔsu na bilaƒɔ-mi taadi.

⁴⁷ Ukyuli ɔni ndi Katɔti ɔdi ni, anwu muunú ala ani na Katɔti ɔɔsu. Na lɛla lɛni ɔsu na bilabla taasiaku mina litemi lɛlɔ ndi ka bɛɛɛdi Katɔti ɔdi.”

Yesu Údie Lɛlɔ Kenye Ɔ́tina Yudaƒuɔ

⁴⁸ Mmɔ na Yudaƒuɔ básu Yesu banini, “Ɔdi litemi geen ka bɔ́su-ɔ ka Samariani ukpidi na adi, na kɔyu kukpidi kɔsiaku-ɔ!”

⁴⁹ Amu na Yesu údie kenye ɔnini, “Kɔyu kukpidi kɔdi kɔɔɔsiaku-mi. Ami mɔɔtalaku mina Ɔti lɛnyi katɔ, nsu amii biibile-mi lɛnyi.

⁵⁰ Naaawia lɛnyi teete lɛlɔ. Nsu ukyuli ɔni mɔɔwia ka bekyuli bakɔliku-mi lɛnyi katɔ ni, anwu ɔkya. Na anwu mɔɔtɛ litemi ulu lɛlɔ.

⁵¹ Mɔɔsu-mii geen nnii ukyuli ɔni madi ala ani na mɔɔtina mɛni lɛlɔ ni, ulekpi kudi kudii!”

⁵² Mmɔ na Yudaƒuɔ bammɔ básu-nwu banini, “Ɔƒɛni na bɔti nwaa ka kɔyu kukpidi kɔsiaku-ɔ! Abraham úkpi, na Katɔti kenye bediene lɛnɔ békpi, nsu awɔ aasu ka ukyuli biala ɔni madi ƒula ala ani na aatina lɛlɔ ulekpi kudi kudii!

⁵³ Bulaƒɔ taadi ka bɔsu na ada anii etulo bula ɔti Abraham, munuu lɛni na aasu? Anwu úkpi, na Katɔti kenye bediene lɛnɔ békpi. Ɔma na aabu ka adi tɔ?”

⁵⁴ Amu na Yesu údie kenye ɔnini, “Si banii mina lɛlɔ na muumwi ni, nka bumwi bɔmmɔ bɔɔɔdi lɛla lɛdi. Nsu ukyuli ɔni muumwi-mi ni, anwu ndi mina ɔti. Anwu ndi ɔni na bɛnii anwu ndi bina Katɔti.

⁵⁵ Amii bɛɛɛgyi-nwu. Nsu ami ngyi-nwu. Na ndubunwini ɔkɔ ɔnyine bina kalɛ si líni ɔmɛni. Ɔsika ngyi-nwu geen, na mɔɔdi nwuna etemila lɛlɔ.

⁵⁶ Ebiti áda bina ɔti Abraham ka ɔ́ti ka ndubo. Anwuɔsu úti anu ɔ́sia mina bubo lɛlɔ ku lɛlɔyɔ.”

⁵⁷ Mmɔ na Yudaƒuɔ bammɔ básu-nwu banini, “Awɔ átaƒɔ tɔ ina akwa liti, na anii áanu Abraham?”

⁵⁸ Amu na Yesu ɔ́su-ma ɔnini, “Mɔɔsu-mii geen nnii asa badubɔwɔ Abraham ni, Ami nli.”

⁵⁹ Mmɔ ka ɔ́su lɛni ni, bála atabi banii beebó-nwu, nsu Yesu ɔ́bɛla lɛlɔ na ɔ́vi ɔ́lɛ-ma akɔ na kakpakɔ mmɔ.