Yohane 6 - Katɔti Ɔku Kedee

Yesu Úte Nkyuli Mpim Ɛlɔ Adila Na Bádi Bémo

¹ Na ɔmmɔ kama ni, Yesu ɔ́via ɛpu ɔni baalɔ banii Galilea Ɛpu na básɔ baalɔ-nwu Tiberia Ɛpu úsie nwuna ɔvi unyɔdi.

² Na bekyuli pii badi basiaku-nwu, ɔsika bánu akɔla budie bɔtina bɔni na Yesu ɔ́bla na uwi ɔni na ɔ́bwi balɛne ɔsu.

³ Amu na Yesu ku nwuna batɛyane bákɔ bésie abi lɛlɔ na bátáyu bélie kalɔ na mmɔ.

⁴ Uwi ɔmmɔ ni, Yudaƒuɔ Kukpi Lili Bɔvia Limeyi bɔdi uwi ɔdaku budu.

⁵ Amu ka Yesu ɔ́tala anumi na ɔ́nu bekyuli lisu lɛni ndubo-nwu kudɔ mmɔ ni, úye Ƒilipo ɔnini, “Wɛ na bɔdubo adila bɔkɛ buye bute bekyuli bamɛni na badi?”

⁶ Nsu Yesu úye Ƒilipo kenye kammɔ ɔnii uuti ɔkɔku-nwu ɔnu ina ka anwu Yesu ɔgyi lɛla lɛni na anwu ɔlati ɔdubo bɔbla.

⁷ Amu na Ƒilipo údie kenye ɔnini, “Nkyuli eti ene limeyi lɛyuƒɔla muedi nwuna bodobodo uledu na bekyuli bamɛni ƒui bakɛ badi blii blii!”

⁸ Amu na Yesu batɛyane akɔ unwi ɔni ndi Andrea na ɔdi Simon Petro ɔnwani ɔ́su-nwu ɔnini,

⁹ “Okloƒu ɔdi ulie mɛni na ɔda kakpa bodobodo ɛlɔ ku kɔkpaku inyɔ. Nsu bi na ɔmɛni ɔdubɔbla bekyuli pii bamɛni?”

¹⁰ Amu na Yesu ɔ́su nwuna batɛyane ɔnini, “Bɛya na bekyuli bammɔ bayu belie kalɔ.” Na livo pii liwi mmɔ, na bana ƒui báyu bélie kalɔ. Na banana lɛti bumomo bɔbla aani mpim ɛlɔ.

¹¹ Amu na Yesu úti bodobodo ɔmmɔ na ka ɔ́gya Katɔti enu ni, úle-nwu úte bani ƒui nlie kalɔ mmɔ. Lɛni kani na úti kɔkpaku lɛnɔ úle úte-ma kalɛ na baawia na bádi bémo.

¹² Ka bádi bémo báwɔlɔ ni, Yesu ɔ́su nwuna batɛyane ɔnini, “Bɛsala kɔkɛ kɔni nébu lisu kalɛ na ɔdi ulebie.”

¹³ Anwuɔsu básala kakpa bodobodo kɔkɛ kɔmmɔ ƒui na kúyi kɔgyigyɛ leevu-inyɔ.

¹⁴ Amu ka bekyuli bammɔ bánu akɔla budie taatina bɔmɛni ni, básu banini, “Sɔsɔ anwu ndi Katɔti Kenye Udiene ɔni mebo kayawi.”

¹⁵ Na ka Yesu ɔ́nu ɔ́ti ka báyɔ ka beƒie-nwu ɔkplu bɔdi bese lɛga ɔsu ni, ɔ́sɔ ɔ́kpɛ ɔ́lɛ-ma akɔ úsie abi lɛlɔ anwu lɛti.

Yesu Úsie Ɔ́vi Na Ɛpu Lɛlɔ

¹⁶ Na useyi uwi ɔmmɔ ni, nwuna batɛyane báyu bésie ɛpu kɔtu.

¹⁷ Na bákɔ béduo ɔkɔlɔ kemmo, na bávia bésela Kapernaum, ɔsika kadi kása na Yesu útebo-ma tɔ kudɔ.

¹⁸ Uwi ɔmmɔ ni, ɔƒɛƒɛɛ kpakplaa ɔdi úbo uukpó ɔni náya na ɛpu ɔmmɔ uukpóku lɛlɔ.

¹⁹ Uwi ɔni na béesie ɔgyu na ntu bɔmmɔ anumi aani eluku atɛ iye ene ni, bánu ka Yesu úsie ɔdubo ntu anumi na ɔ́kpɛ úde ɔkɔlɔ ɔmmɔ. Ɔmɛni ɔsu ɔtɔtɔ ɔ́gyu-ma!

²⁰ Nsu ɔ́su-ma ɔnini, “Bitayia! Ami na ɔdi.”

²¹ Amu na lɛlɔ lɛ́yɔ-ma! Na ka Yesu ɔ́kɔ úduo ɔkɔlɔ kemmo ni, bánu ka béduo likpo lɛni bésela kɔnakunwi.

²² Ka kadi kégye ni, bekyuli bani náƒɔ lɛlɔ bátɛ ɛpu ɔvi ɔmmɔ ni, bánu ka nka ɔkɔlɔ unwi pɛ ntɛ ɛpu kɔtu mmɔ. Na uwi ɔni na Yesu batɛyane bammɔ béduo ɔkɔlɔ ɔmmɔ kemmo na baavia ketu ni, nka Yesu ɔɔɔsiaku-ma.

²³ Uwi ɔmmɔ kemmo ni, lɛkɔlɔ bamba lɛni nási Tiberia líbo líbedi línye-ma kudɔ na kesii kani na Yesu úti bodobodo úte-ma na bádi mmɔ uwi ɔni na Blɔti ɔ́gya Katɔti enu ɔ́wɔlɔ kemmo.

²⁴ Anwuɔsu ka bekyuli bammɔ bánu ka Yesu iye nwuna batɛyane beeenye mmɔ ɔsu ni, ama alati bákɔ béduo lɛkɔlɔ lɛmmɔ kemmo na bátɔlɔ bésie Kapernaum batáwia Yesu.

Yesu Ndi Adila Ani Muute Ngba

²⁵ Ka bánu Yesu na ɛpu ɔvi ɔmmɔ ni, béye-nwu banini, “Ala ɔtinane, uwi ɔmani na ébo mɛni?”

²⁶ Amu na Yesu údie kenye ɔnini, “Mɔɔsu-mii geen ka ni, bodobodo ɔni na bɛ́kɛ bɛ́di bímo ɔsu na bɛɛwia-mi. Na ɔɔɔdi ɔni na bínu akɔla budie taatina ani na lɛ́bla kalɔ ɔsu.

²⁷ Bitekpoku lɛlɔ bitawia adila ani muubie kama ulu. Mmomu bɛwia adila ani neeebie na ese ésela uwi ƒui. Adila ammɔ udu na ami Ukyuli Ɔyawine Ubi ndubo-mii bute. Ɔsika ami na Katɔti ɔ́sia kɔnu úse.”

²⁸ Mmɔ na bekyuli bammɔ béye Yesu banini, “Bi na ɔlɛka bɔbla si bɔnii bɔɔbla kabla kani na Katɔti ɔɔwia?”

²⁹ Amu na Yesu údie kenye ɔnini, “Lɛla lɛni na Katɔti ɔɔwia ka bɛbla ndi ka bɛƒɔ ukyuli ɔni na ɔ́tala bɛdi.”

³⁰ Amu na básɔ béye-nwu banini, “Akɔla budie taatina bɔmani na adubɔtina-bu kalɛ na bɔƒɔ-ɔ bɔdi? Bi na aakana bɔbla?

³¹ Bula bati kuuku bádi adila ani baalɔ banii manna na ketele kemmo aani kalɛ na ɔkya Bunweni Kedee Ɔku kemmo banii, ‘Úte-ma adila ɔ́siku katɔ na bádi.’ ”

³² Mmɔ na Yesu ɔ́su-ma ɔnini, “Mɔɔsu-mii geen nnii ɔɔɔdi Mose néte-mii adila ani nási katɔ. Mmomu mina Ɔti ni, anwu muute adila geen ani nási katɔ ébo.

³³ Ɔsika Katɔti adila geen ani na uute bekyuli ndi ami ɔni mɔɔyá na bekyuli beelie ngba.”

³⁴ Anwuɔsu básu-nwu banini, “Ati, teete-bu adila ɔmɛni uwi biala.”

³⁵ Mmɔ na Yesu ɔ́su-ma ɔnini, “Ami ndi adila ani mɔɔyá na bekyuli beelie ngba. Na ukyuli ɔni muubo-mi kudɔ ni, kɔka kɔsɔ kulada-nwu. Na ukyuli ɔni mɔɔƒɔ́-mi taadi ni, utukwɛ ɔsɔ ulada-nwu kudi kudii.

³⁶ Nsu lɛ́su-mii nnii ina ka bɛ́ɛnu-mi ni, bilaƒɔ-mi taadi.

³⁷ Bekyuli bani ƒui na Ati úte-mi ni, badubo-mi kudɔ. Na bani muubo-mi kudɔ mmɔ ni, lɛɛɛdubo-ma buni.

³⁸ Ɔsika ńtasi katɔ ńtebo nnii mɔɔbla ami ɔlati lɛƒɔyɔ. Mmomu líbo nnii mbabla anwu ɔni nátala-mi lɛƒɔyɔ.

³⁹ Na ukyuli ɔni nátala-mi lɛƒɔyɔ ndi ka bekyuli bani ƒui na úte-mi ni, naaayila bana akɔ ɔdi, mmomu kalɛ na lɛgyila-ma na bana ƒui basɔ bata bebelie ngba na limeyi likplodi lɛlɔ.

⁴⁰ Ɔsika lɛla lɛni na mina Ɔti ɔɔwia ndi ka ukyuli biala ɔni muuti anu taasia ami Katɔti Ubidi lɛlɔ na ɔ́ƒɔ-mi ɔ́di ni, ɔdubɔkɛ ngba bɔni nsɔ naaadubo bɔsa kudii na lɛgyila-nwu na limeyi likplodi lɛmmɔ lɛlɔ na ɔsɔ ubelie ngba.”

⁴¹ Amu na Yudaƒuɔ bammɔ bése kalɔ baatɛmi teewi-nwu, ɔsika ɔ́su ɔnii, “Ami ndi adila ani nási katɔ líbo” ɔsu.

⁴² Anwuɔsu béye banii, “Ɔɔɔdi Yesu ɔmɛni ndi Yoseƒ ubidi yoo? Bɔgyi ɔti ku uni. Dɛ na ɔ́bla na ɔɔsu ɔnii, ‘Katɔ na lɛ́si líbo’?”

⁴³ Amu na Yesu údie kenye ɔnini, “Bɛda bɔdɔ na bina lɛlɔ kemmo bɛya.

⁴⁴ Ukyuli ɔdi ulakana-mi kudɔ bubo si ɔɔɔdi Ati ɔni nátala-mi náya na ɔ́ni úde-mi. Na ndubɔgyila-nwu na limeyi likplodi lɛlɔ.

⁴⁵ Katɔti kenye udiene ɔdi únweni ɔnii, ‘Katɔti ndubɔtina bana ƒui ala.’ Anwuɔsu ukyuli biala ɔni nénu na ɔ́tɛya ala ɔ́siku Ati kudɔ ni, anwu muubo-mi kudɔ.

⁴⁶ Ɔmɛni ulátina ka ukyuli ɔdi ɔ́ɔnu Ati ɔmmɔ. Mmomu ami ɔni lɛti nási Katɔti kudɔ ni, ami lɛti náanu-nwu.

⁴⁷ Mɔɔsu-mii geen ka ukyuli ɔni mɔɔƒɔ́-mi taadi ni, uulie ngba bɔni nsɔ naaadubo bɔsa kudii.

⁴⁸ Ami ndi adila ani muute ngba.

⁴⁹ Bina bati kuuku bádi adila ani baalɔ banii manna na ketele kemmo, nsu békpi.

⁵⁰ Nsu adila ani nási katɔ áyu ébo ni, adi adila ani udu na ukyuli biala ɔni madi-nya ni, ulekpi.

⁵¹ Ami ndi adila ani muute ngba. Na lɛ́si katɔ lɛ́yu líbo. Ukyuli biala ɔni mɔɔdi adila amɛni adi ni, ɔdubo ngba bulie uwi ƒui. Na adila ani ndubute bekyuli ni, anya ndi mina ɔlɔna.”

⁵² Ɔmɛni ɔsu Yudaƒuɔ bammɔ bésie kalɔ baakya unyeƒi kpakplaa na ama alati akɔ banini, “Dɛ na ukyuli ɔmɛni wakana-bu nwuna ɔlɔna buti bute ɔnii bɔdi?”

⁵³ Amu na Yesu ɔ́su-ma ɔnini, “Mɔɔsu-mii geen ka ni, si bítadi ami Ukyuli Ɔyawine Ubi ɔlɔna na bɛni mina ubugya ni, biiibo ngba bɔdi na bina lɛlɔ kemmo.

⁵⁴ Ukyuli ɔni mɔɔdi mina ɔlɔna na ɔɔní mina ubugya ni, anwu muulie ngba bɔni nsɔ naaadubo bɔsa kudii. Na ndubɔgyila-nwu na limeyi likplodi lɛlɔ.

⁵⁵ Ɔsika mina ɔlɔna ɔdi adila geen na mina ubugya lɛnɔ ɔdi lɛla lɛnidi geen.

⁵⁶ Ukyuli ɔni mɔɔdi mina ɔlɔna na ɔɔní mina ubugya ni, ɔɔblaku-mi unwi, na ami lɛnɔ mɔɔblaku-nwu unwi.

⁵⁷ Kalɛ na Ati ɔni nli ngba ɔ́tala-mi na ɔkɛnku anwu ɔsu na nli ngba ni, lɛni kani na ukyuli ɔni mɔɔdi mina ɔlɔna lɛnɔ welie ngba ɔkɛnku ami ɔsu.

⁵⁸ Anwuɔsu ɔmɛni ndi adila ani nási katɔ áyu ébo. Na aaadi ani udu na bina bati kuuku bádi nsu békpi. Ukyuli ɔni madi adila ani mɔɔsu mɛni ni, ɔdubulie ngba uwi ƒui.”

⁵⁹ Ala amɛni na Yesu ɔ́tina-ma na Yudaƒuɔ kasalakɔ na Kapernaum.

⁶⁰ Ka nwuna basiakune pii bénu ɔmɛni ni, básu banii, “Litemi lɛmɛni kalɔ bunu bubo ɔkplu geen, énu! Ɔma ndubɔkana na use atu unu lɛmɛni?”

⁶¹ Nsu ina ka ukyuli ɔdi útasu Yesu lɛla lɛdi ni, únu ka baadɔ na bana lɛlɔ kemmo na úye-ma ɔnini, “Lɛla lɛmɛni lɛtu-mii atu?

⁶² Amu dɛ na wabla-mii si banii bɛ́nu ka ami Ukyuli Ɔyawine Ubi lɛ́kɔ lísela katɔ kesii kani na nka nli?

⁶³ Katɔti Kɔyu muute ngba. Na ukyuli ɔlɔna ɔɔɔdi lɛla lɛdi. Ala ani ƒui na mɔɔsu-mii ni, ndanku Katɔti Kɔyu kɔni muute ngba líboku-mii.

⁶⁴ Nsu bina akɔ badi balaƒɔ-mi taadi.” Yesu ɔ́su ɔmɛni ɔsika ɔ́si kalɔ kesekɔ ƒui ni, ɔ́ti bekyuli bani naaadubo-nwu bɔƒɔ bɔdi ku ukyuli ɔni ndububo-nwu kakya bɔkya.

⁶⁵ Amu na ɔ́su ɔnini, “Ɔmɛni ɔsu na lɛ́su-mii nnii ukyuli ɔdi ulakana-mi kudɔ bubo si ɔɔɔdi Ati náya na ɔ́kɛ ulu ɔmmɔ.”

⁶⁶ Na ɔmɛni kama ni, nwuna basiakune pii bénwini kama na básɔ bátasiaku-nwu.

⁶⁷ Amu na Yesu úye nwuna batalane leevu-inyɔ bammɔ ɔnini, “Amii lɛnɔ bɛɛwia ka bɛsɔ binwini yoo?”

⁶⁸ Amu na Simon Petro údie kenye ɔnini, “Blɔti, ɔma kudɔ na búnwini búsela? Awɔ nda ngba bɔni nsɔ naaadubo bɔsa kudii etemila.

⁶⁹ Na abu bɔ́ɔƒɔ bɔdi na bɔ́ɔnu bɔ́ti ka awɔ ndi Katɔti Ubidi Kedee ɔmmɔ.”

⁷⁰ Amu na Yesu údie kenye ɔnini, “Ami náƒuna bina leevu-inyɔ bamɛni ina ka bina akɔ unwi ɔdi ukisine.”

⁷¹ Yesu ɔ́su ɔmɛni ɔ́siku Yuda ɔni ndi Simon Iskariot ubidi lɛlɔ. Ɔsika na bana leevu-inyɔ akɔ ni, anwu ndubo-nwu kakya bɔkya.