Yohane 16 - Katɔti Ɔku Kedee

¹ “Lɛ́ɛsu-mii ɔmɛni kalɛ na enu alaƒɛ-mii na bina bɔƒɔtaadi kemmo.

² Badubo-mii bɔgya bɔlɛku Yudaƒuɔ kasalakɔ. Na uwi ɔdi lɛnɔ ɔdubo ubedu ɔni na bekyuli badubɔdu-mii. Na bani ndubɔbla lɛni ni, badubɔkali banii Katɔti kabla na baabla.

³ Bekyuli badubo-mii ɔmɛni bɔbla, ɔsika baaagyi ami iye Katɔti.

⁴ Mmomu lɛ́su-mii ɔmɛni kalɛ na si uwi ɔni na bábla ala amɛni údu ni, na binyimo lɛla lɛni na lɛ́su-mii. “Ńtasu-mii ala amɛni ńtasiku kalɔ kesekɔ, ɔsika nkya-mii kudɔ uwi ɔmmɔ.

⁵ Nsu ɔƒaani ni, bɔtɔlɔ na nda. Lísela mina Ɔti ɔni nátala-mi kudɔ. Nsu bina ɔdi úteye-mi ɔnii, ‘Wɛ na ésela?’

⁶ Na ka lɛ́ɛya na bɛ́ti ɔmɛni ɔsu ni, bina lɛlɔ lɛ́bla-mii kɔnyana.

⁷ Nsu mɔɔsu-mii geen ka ni, si lɛ́tɔlɔ-mii kudɔ ni, ɔdia-mii utulo. Ɔsika si ńtatɔlɔ ni, Ubunkune ɔmmɔ ulebo-mii kudɔ. Nsu si lɛ́tɔlɔ ni, ndubɔtala-nwu lɛkya-mii.

⁸ Na si úbo ni, ɔdubo ubedie ɔtina kayawi bekyuli ƒui nwaa ka baabla likpidi, na baaasiaku ulu siin ɔmmɔ lɛlɔ, na benye Katɔti anumi kalɛ na ɔtɛku-ma litemi.

⁹ Na badubɔnu ka baabla likpidi, ɔsika bátaƒɔ-mi bátadi.

¹⁰ Na badubɔnu ka baaasiaku ulu siin ɔmmɔ lɛlɔ, ɔsika lísela mina Ɔti kudɔ na bɛsɔ bɛɛɛdubo-mi bɔnu.

¹¹ Na badubɔnu ka Katɔti ɔɔtɛku bekyuli litemi, ɔsika Katɔti ɔ́ɔtɛku ukyuli ɔni mɔɔdi kayawi kamɛni lɛlɔ litemi kukuuku na ɔ́ɔdu-nwu kɔtɔ.

¹² “Mbo ala pii na lɛsu-mii. Nsu adubo bumomo butulo-mii ɔƒɛni.

¹³ Nsu si uwi ɔni na Katɔti Kɔyu kɔni muudie litemi geen lɛni ndanku Katɔti lɛlɔ mmɔ úbo ni, ɔdubo-mii bɔtɔnku kalɛ na bɛnu litemi geen lɛmmɔ ƒui bɛti. Na ulatɛmi na anwu ɔlati ɔyikun kemmo. Mmomu lɛla lɛni na únu ni, ɔdubo-mii bɔsu na ɔsu-mii ala ani ndubo bɔlɛ.

¹⁴ Ɔdubɔya na bekyuli bakɔliku-mi lɛnyi katɔ, ɔsika lɛla lɛni na masu-nwu ni, ani na ɔdubuti ubasu-mii.

¹⁵ Ala ani ƒui nse Katɔti ni, adi ami adi. Anwuɔsu na lɛ́su nnii ala ani nse-mi ni, Katɔti Kɔyu kɔdubuti-nya ɔtina-mii.

Batɛyane Kɔnyana Kɔdubunwini Lɛlɔyɔ

¹⁶ “Kébu uwi blii ɔdi na bɛsɔ bilanu-mi. Na ɔmmɔ kama blii lɛnɔ ni, bɛdubɔsɔ bɛnu-mi.”

¹⁷ Amu na nwuna batɛyane badi béye lɛlɔ banini, “Lɛla lɛni na ɔɔsu kalɔ ndi bi? Ɔnii kébu uwi blii ɔdi na bɔsɔ bulanu-nwu. Na ɔmɛni kama blii lɛnɔ bɔdubɔsɔ bɔnu-nwu. Na ɔ́sɔ ɔ́su-bu lɛnɔ ɔnii, ‘Ɔsika lísela mina Ɔti kudɔ.’

¹⁸ Lɛla lɛni na ɔ́su ɔnii kébu uwi blii kalɔ ndi bi? Bɔɔɔgyi lɛla lɛni lɛlɔ na ɔɔtɛmi taasiku!”

¹⁹ Yesu ɔ́ti ka nwuna batɛyane bammɔ baayɔ́ beye-nwu lɛla lɛdi basiaku ɔmɛni lɛlɔ. Anwuɔsu na úye-ma ɔnini, “Lɛ́su nnii kébu uwi blii ɔdi na bɛsɔ bilanu-mi. Na ɔmmɔ kama blii lɛnɔ na bɛdubɔsɔ bɛnu-mi. Ɔmɛni lɛlɔ litemi na biiye lɛlɔ teenu?

²⁰ Mɔɔsu-mii geen nnii bɛdubo kɔnyana buwulo na biwulo keku. Nsu kayawi bekyuli badubo ebiti bɔkɛ mmomu. Na amii ni, bɛdubɔbla kɔnyana, nsu bina kɔnyana kɔdubunwini lɛlɔyɔ.

²¹ Si uleku ɔɔyɔ́ ɔwɔ ni, ubo kɔnyana, ɔsika uwi ɔni na uubo abi údu. Nsu si uwi ɔni na ɔ́wɔ ubi ɔmmɔ ɔ́wɔlɔ ni, ɔɔyiƒala abi ani na úbo. Ɔsika ɔɔkɛ́ ebiti ka ɔ́wɔ ubi ɔ́kya kayawi.

²² Lɛni geen na use ute amii lɛnɔ. Ɔƒaani ni, bina lɛlɔ libo kɔnyana. Nsu ndubɔsɔ mbanu-mii. Na mmɔ ni, lɛlɔyɔ lɛdubɔƒɔ-mii kayi kemmo ƒui. Lɛlɔyɔ lɛmɛni udu na ukyuli ɔdi biala ulakana bɔƒɔ bɔsiku-mii kudɔ kudii!

²³ “Si uwi ɔni na limeyi lɛmmɔ líbo líbedu ni, bileye-mi lɛla lɛdi. Ɔsika mɔɔsu-mii geen ka lɛla biala na bɛdubɔkpali-mi lɛnyi bivele mina Ɔti ni, ɔdubute-mii.

²⁴ Úti úbedu uwi ɔmɛni kemmo ni, bítakpali-mi lɛnyi bítevele tɔ Katɔti lɛla lɛdi. Bivele-nwu na ɔdubute-mii, na bina ebiti adubudu awɔlɔ.

²⁵ “Agba kemmo sɔɔn na lɛ́su-mii ala amɛni ƒui. Nsu uwi ɔdubo ɔni na nsɔ lɛɛɛdubo agba bubo. Mmomu ndubo-mii bɔtɛmiku nwaa bɔsiku mina Ɔti lɛlɔ.

²⁶ Na si limeyi lɛmmɔ lídu ni, bɛdubo-mi lɛnyi bɔkpali bivele-nwu ala. Naaasu nnii ami ndubo-nwu ala buvele bute-mii.

²⁷ Ɔsika Ati ɔlati ɔɔyɔ́-mii. Ɔɔyɔ́-mii ɔsika amii lɛnɔ bɛɛyɔ́-mi, na bɛ́ƒɔ bɛ́di ka Katɔti kudɔ na lɛ́si líbo.

²⁸ Sɔsɔ na ɔdi ka Ati kudɔ na lɛ́si líbo kayawi. Na ɔƒɛni mɔɔtɔlɔ kayawi kamɛni kemmo nteesie Ati kudɔ.”

²⁹ Mmɔ na Yesu batɛyane bammɔ básu-nwu banini, “Ɔƒɛni na aatɛmi nwaa, na asɔ elebo lɛgba.

³⁰ Na ɔƒɛni na bɔ́ti ka agyi lɛla biala, na ɔ́sɔ útalɛka ukyuli ɔdi uye-ɔ litemi lɛdi. Ɔmɛni lɛti pɛ ɔ́ya na bɔ́ti ka Katɔti kudɔ na ási ébo.”

³¹ Amu na Yesu úye-ma ɔnini, “Bɛ́ƒɔ bɛ́di ɔƒɛni kani?

³² Uwi ɔdubo, na úudu lɛnɔ ɔni na bɛdubo bugyingya bɛtɔlɔ-mi kudɔ, na ɔdi biala uteesie nwuna kaduli na bɛda ami lɛti binyene. Nsu geen ni, ɔɔɔdi ami lɛti nnye. Ɔsika mina Ɔti unye-mi kudɔ.

³³ Ala amɛni na lɛ́su-mii kalɛ na kayi kasɔ kelékpoku-mii si biliku-mi. Kayawi bekyuli badubo bɔya na bibo abi. Nsu binye kpakplaa! Ɔsika lɛ́ɛdi kayawi kamɛni lɛbibo biala lɛlɔ.”